నాకే అధికారం ఇస్తే ఉరి వేసేవాడిని: ప్రధానిపై నారాయణ

By Srinivas

Published: Sunday, November 27, 2011, 9:16 [IST]

విశాఖపట్నం: ప్రధాన మంత్రి మన్మోహన్ సింగ్ పైన సిపిఐ రాష్ట్ర కార్యదర్శి నారాయణ శనివారం తీవ్రస్థాయిలో విరుచుకు పడ్డారు. తనకు అధికారం ఇచ్చి ఉంటే దేశంలో లక్షల కోట్ల రూపాయల కుంభకోణాలు జరుగుతున్నా చూస్తూ ఊరుకున్న ప్రధానిని స్తంభానికి కట్టి, బహిరంగంగా ఉరి తీసేవాడినని ధ్వజమెత్తారు. ప్రజా వ్యతిరేక విధానాలను మా నుకోని పక్షంలో రాష్ట్ర ప్రభుత్వం బట్టలూడదీసి తరుముతామని హెచ్చరించారు. దేశంలో ఏఐసిసి అధ్యక్షురాలు సోనియా గాంధీ, మన్మోహన్‌ల హయాంలోనే భారీ అవినీతి చోటుచేసుకుందని ఆరోపించారు. రిటైల్ రంగంలో విదేశీ పెట్టుబడుల వల్ల లక్షలాది మంది చిరు వ్యాపారులు జీవనోపాధి కోల్పోయే ప్రమాదం ఉందని ఆయనఆందోళన వ్యక్తం చేశారు. కిరణ్ కుమార్ రెడ్డి చేతకాని ముఖ్యమంత్రి అని, పరిపాలన కంటే ప్రజలపై పన్నులు వేయడంలోనే ఆయన సమర్థంగా వ్యవహరిస్తున్నారని ఆయన విమర్శించారు.

కాగా మావోయిస్టు లు ఇప్పటికైనా తమ విధానాలపై పునరాలోచన చేయాలని నారాయణ విజ్ఞప్తి చేశారు. బెంగాల్లో కిషన్‌జీని మమత సర్కారు హత్య చేయించిందని, ఇటువంటి ప్రభుత్వాలకు మద్దతు ఇస్తే ఫలితం ఇలాగే ఉంటుందని అన్నారు. 34 సంవత్సరాలుగా అధికారంలో ఉన్న వామపక్ష ప్రభుత్వాన్ని కూలదోసేందుకు గతంలో మావోయిస్టులు మమతా బెనర్జీతో చేతులు కలిపారని, ఇలాంటి విధానాలపై మావోయిస్టులు పునరాలోచించుకోవాలని నా రాయణ కోరారు. కిషన్‌జీది ముమ్మాటికి బూటకపు ఎన్‌కౌంటరేనని, దీనిని సీపీఐ తీవ్రంగా ఖండిస్తోందని చెప్పారు.

Published On November 27, 2011