లక్ష్మీపార్వతి ఇల్లు ఖాళీ చేయించిన ఎన్టీఆర్ తనయుడు

By Srinivas

Published: Friday, December 2, 2011, 16:37 [IST]

హైదరాబాద్/గుంటూరు: ఎన్టీఆర్ టిడిపి అధ్యక్షురాలు నందమూరి లక్ష్మీ పార్వతి ఇంటిని కోర్టు అధికారులు శుక్రవారం ఖాళీ చేయించారు. బంజారాహిల్స్‌లోని రోడ్ నెంబర్ 13లో ఈ ఇల్లు ఉంది. దివంగత ముఖ్యమంత్రి నందమూరి తారక రామారావు ఉన్నప్పటి నుండి ఆమె అందులోనే ఉంటున్నారు. ఎన్టీఆర్ వీలునామా ప్రకారం ఆ ఇల్లు చిన్న కూతురు ఉమా మహేశ్వరికి దక్కింది. ఉమా మహేశ్వరి ఈ ఇంటి పవర్ ఆఫ్ అటార్నీని తన సోదరుడు రామకృష్ణకు ఇచ్చారు.

లక్ష్మీ పార్వతిచే ఇల్లు ఖాళీ చేయించాలంటూ రామకృష్ణ కోర్టును ఆశ్రయించారు. సిటీ సివిల్ కోర్టు ఇళ్లు ఖాళీ చేయాలంటూ లక్ష్మీ పార్వతిని ఆదేశించింది. అయితే ఇచ్చిన గడువులోగా ఆమె ఖాళీ చేయకపోవడంతో కోర్టు అధికారులు ఇంటిని ఖాళీ చేయించారు. ఇల్లు ఖాళీ చేయించేందుకు రామకృష్ణ వెళ్లారు. అయితే లక్ష్మీ పార్వతి లేని సమయంలో ఇల్లు ఖాళీ చేస్తుండటంతో అక్కడి పరిస్థితిలు కాస్త ఉద్రిక్తంగా మారాయి.

Published On December 2, 2011