చంద్రబాబుకు ఉరేయ్: మోత్కుపల్లికి చంద్రశేఖర్ సవాల్

By Pratap

Published: Saturday, December 24, 2011, 11:33 [IST]

హైదరాబాద్: తెలంగాణ రాష్ట్ర ఏర్పాటును అడ్డుకున్న మీ పార్టీ అధ్యక్షుడు నారా చంద్రబాబు నాయుడికి ఉరేయాలని తెలంగాణ రాష్ట్ర సమితి (తెరాస) నాయకుడు, మాజీ మంత్రి ఎ. చంద్రశేఖర్ తెలుగుదేశం తెలంగాణ ప్రాంత శానససభ్యుడు మోత్కుపల్లి నర్సింహులును ఉద్దేశించి అన్నారు. ఉరేసుకుందామని రా అంటూ మోత్కుపల్లి తాడుతో గన్ పార్కు చేరుకుని కెసిఆర్‌ను సవాల్ చేయడంపై ఆయన శనివారం మీడియా ప్రతినిధుల సమావేశంలో తీవ్రంగా ప్రతిస్పందించారు. కెసిఆర్ కోసం తాడు తెచ్చానని అంటున్న మోత్కుపల్లి ఆ తాడుతో చంద్రబాబుకు ఉరేయాలని అన్నారు. చంద్రబాబుకు మోత్కుపల్లి పాలేరులా వ్యవహరిస్తున్నారని ఆయన వ్యాఖ్యానించారు. మోత్కుపల్లి రేసు కుక్కలా అరుస్తున్నారని ఆయన అన్నారు. మోత్కుపల్లి సంస్కారంతో వ్యవహరించాలని ఆయన సూచించారు.

విద్యార్థులపై వందలాది కేసులున్నాయని మాట్లాడుతున్న మోత్కుపల్లి నర్సింహులు కెసిఆర్‌పై, తెలంగాణ రాజకీయ జెఎసి చైర్మన్ కోదండరామ్‌పై ఎన్ని కేసులున్నాయో తెలుసుకుని మాట్లాడాలని ఆయన సూచించారు. మోత్కుపల్లి అహంకారంతో వ్యవహరిస్తున్నారని ఆయన విమర్శించారు. తెలంగాణ ప్రజలపై, తెలంగాణ విద్యార్థుల త్యాగాలపై మోత్కుపల్లికి గౌరవం ఉంటే తెలంగాణను అడ్డుకున్న చంద్రబాబుకు ఉరేయాలని ఆయన అన్నారు. మోత్కుపల్లి వ్యవహరించే తీరు అది కాదని ఆయన అన్నారు.

తెలంగాణ రాష్ట్ర సాధనపై చిత్తశుద్ధి ఉంటే గతంలో కెసిఆర్ మాదిరిగా ఆమరణ నిరాహార దీక్షకు దిగాలని, తనతో కలిసి వచ్చేవారిని కలుపుకుని ఆమరణ నిరాహార దీక్ష చేస్తే కలిసి రావడానికి అవకాశం ఉంటుందని ఆయన అన్నారు. అందరం ఆమరణ నిరాహార దీక్ష చేద్దామంటూ ముందుకు రావాలని ఆయన మోత్కుపల్లికి సూచించారు. మోత్కుపల్లిని తమ జాతి నుంచి బహష్కరిస్తున్నామని ఆయన అన్నారు. అంబేడ్కర్‌ను కూడా మోత్కుపల్లి అవమానిస్తున్నారని ఆయన అన్నారు.

Published On December 24, 2011