ఆజాద్‌కు చిరంజీవి విందు, ముఖ్యమంత్రి గైర్హాజరు

By Srinivas

Published: Friday, January 6, 2012, 11:22 [IST]

హైదరాబాద్: తిరుపతి శాసనసభ్యుడు చిరంజీవి కేంద్రమంత్రి గులాం నబీ ఆజాద్‌కు శుక్రవారం ఇచ్చిన అల్పాహార విందుకు సమన్వయ కమిటీ సభ్యుల్లో ముఖ్యమంత్రి కిరణ్ కుమార్ రెడ్డి, పార్లమెంటు కావూరి సాంబశివ రావు మినహా మిగతా వారు హాజరయ్యారు. ఉదయం చిరంజీవి ఆజాద్‌కు అల్పాహార విందు ఇచ్చారు. దీనికి పిసిసి చీఫ్ బొత్స సత్యనారాయణ, మాజీ చీఫ్ డి శ్రీనివాస్, స్పీకర్ నాదెండ్ల మనోహర్, ఉపముఖ్యమంత్రి దామోదర రాజనర్సింహ, కెవిపి రామచంద్ర రావు, షబ్బీర్ అలీ, పలువురు చిరు వర్గం నేతలు హాజరయ్యారు. ఆజాద్ సుమారు పది నిమిషాలు అక్కడ ఉన్నారు. ఈ సందర్భంగా వారి మధ్య ఎమ్మెల్యేల అసంతృప్తి, మంత్రి పదవులపై చర్చ జరిగినట్లుగా తెలుస్తోంది. అనంతరం ఆజాద్ అక్కడి నుండి నేరుగా ఢిల్లీ వెళ్లేందుకు విమానాశ్రయానికి బయలుదేరారు.

ప్రధానంగా తన వర్గం నేతలకు మంత్రి పదవులు ఇప్పించుకునే ఉద్దేశ్యంలో భాగంగానే చిరంజీవి ఈ విందు ఏర్పాటు చేసినట్లుగా తెలుస్తోంది. చిరంజీవితో పాటు ఆయన వర్గం నేతలు పార్టీ పదవులపై అసంతృప్తితో ఉన్న విషయం తెలిసిందే. పిఆర్పీ విలీనం అయినప్పటి నుండి అదిగో పదవులు ఇదిగో పదవులు అనడమే తప్ప చిరు వర్గానికి ఇప్పటి వరకు ఒక్క ఎమ్మెల్సీ మించి ఏమీ దక్కలేదు. పిసిసి చీఫ్ బొత్స సత్యనారాయణ కూడా చిరు వర్గానికి పదవులు ఇచ్చేందుకు సుముఖత చూపుతున్నారు.

Published On January 6, 2012