ఆత్మహత్యలపై టిఆర్ఎస్‌కు టిడిపి రివర్స్ పంచ్

By Srinivas

Published: Friday, January 6, 2012, 15:27 [IST]

హైదరాబాద్: కల్తీసారా బాధితులను పరామర్శించడానికి పరుగు పెట్టిన టిడిపి అధినేత నారా చంద్రబాబు నాయుడు తెలంగాణ కోసం ఆత్మహత్యలు చేసుకున్న అమరవీరుల కుటుంబాలలో ఒక్కరినైనా పరామర్శించారా అని ప్రశ్నించిన టిఆర్ఎస్‌కు టిడిపి రివర్స్ పంచ్ ఇచ్చింది. టిడిపి సీనియర్ నేత చంద్రశేఖర్ శుక్రవారం మాట్లాడుతూ వేల సంఖ్యలో రైతులు చనిపోయినా కెసిఆర్ ఒక్క కుటుంబానైన్నా పరామర్శించారా అని ప్రశ్నించారు. టిడిపిని ఎదుర్కొనే దమ్ము ఏ పార్టీకి లేదని ఖమ్మం పార్లమెంటు సభ్యుడు నామా నాగేశ్వర రావు అన్నారు. తెలంగాణ రైతుల ఆత్మహత్యల గురించి కెసిఆర్ ఏనాడైనా పార్లమెంటులో ప్రస్తావించారా అన్నారు.

రైతుల గురించి పట్టించుకోని కెసిఆర్‌కు రైతుల కోసం పోరు యాత్ర చేస్తున్న చంద్రబాబు గురించి మాట్లాడే హక్కు లేదన్నారు. విద్యార్థులను రెచ్చగొట్టి చంద్రబాబుపై రాళ్లు వేయిస్తున్నారని ధ్వజమెత్తారు. రైతుల కోసం చంద్రబాబు చేస్తున్న పాదయాత్రతోనైనా కెసిఆర్‌కు బుద్ధి రావాలన్నారు. తెరాసపై టిడిపి తెలంగాణ నాయకులు మోత్కుపల్లి నర్సింహులు, టి. దేవేందర్ గౌడ్ కూడా విరుచుకుపడ్డారు. తెలంగాణ ఇవ్వబోమని ప్రధాని చేత చెప్పించింది కెసిఆరేనని మోత్కుపల్లి అన్నారు.

Published On January 6, 2012