అమ్మాయితోనే పెళ్లి, బెదిరింపులు: తెలుగు అమ్మాయి

బెహ్రంపూర్: తాను మెచ్చిన అమ్మాయిని పెళ్లి చేసుకోనివ్వకపోతే తాను ఆత్మహత్య చేసుకోవడమే కాకుండా ఆ అమ్మాయిని కూడా చంపేస్తానని నెల్లూరు జిల్లాకు చెందిన ఓ అమ్మాయి బెదిరించింది. దీంతో నెల్లూరు జిల్లా అమ్మాయిని ఒరిస్సాలోని బెహ్రంపూర్ పోలీసులు ఇటీవల అదుపులోకి తీసుకున్నారు. తన స్నేహితురాలు, రూమ్మేట్ అయిన అమ్మాయినే తాను పెళ్లి చేసుకుంటానని తెలుగు అమ్మాయి పట్టుబడుతోంది. స్వలింగానికి చెందిన వ్యక్తుల మధ్య వివాహానికి కేంద్ర ప్రభుత్వం వ్యతిరేకత చూపుతూ సుప్రీంకోర్టుకు తెలిపిన నేపథ్యంలో ఈ సంఘటన ప్రాధాన్యాన్ని సంతరించుకుంది.

తమ పెళ్లికి అంగీకరించకపోతే తీవ్ర పరిణామాలుంటాయని తెలుగు అమ్మాయి ఒరిస్సాకు చెందిన అమ్మాయి తల్లిదండ్రులను బెదిరించినట్లు తెలుస్తోంది. మరో అమ్మాయి తల్లిదండ్రులను బెదిరించినందున తెలుగు అమ్మాయిని అదుపోలికి తీసుకున్నామని బెహ్రంపూర్ పోలీసులు చెప్పారు. తెలుగు అమ్మాయి బెహ్రంపూర్‌లోని అమ్మాయి ఇంటికి వచ్చి గొడవ చేసిందని, తాము ఆ అమ్మాయిని అరెస్టు చేశామని పోలీసులు చెప్పారు.

హైదరాబాదులోని ఓ హాస్టల్ గదిలో ఉన్నప్పుడు ఇద్దరు అమ్మాయిల మధ్య సాన్నిహిత్యం పెరిగింది. రెండేళ్ల క్రితం వారిద్దరు కంప్యూటర్ కోర్సు పూర్తి చేశారు. ఆ తర్వాత కూడా ఇద్దరూ కలుసుకుంటూ వస్తున్నారు. ఒరిస్సా అమ్మాయికి పెళ్లి నిశ్చయం కావడంతో తెలుగు అమ్మాయికి కోపం వచ్చింది. దీంతో గొడవ చేసింది.