చిరంజీవి ప్రచార రూట్ ప్లాన్ సిద్ధం చేస్తున్న కాంగ్రెస్

By Srinivas

Published: Wednesday, February 29, 2012, 15:56 [IST]

హైదరాబాద్: తిరుపతి శాసనసభ్యుడు, కాంగ్రెసు పార్టీ నేత చిరంజీవి ఉప ఎన్నికల ప్రచార రూట్ మ్యాప్‌ను కాంగ్రెసు పార్టీ సిద్ధం చేస్తున్నట్లుగా తెలుస్తోంది. మార్చి 18వ తారీఖున తెలంగాణలోని ఆరు, శ్రీ పొట్టి శ్రీరాములు నెల్లూరు జిల్లాలోని కొవ్వూరు నియోజకవర్గంలో ఉప ఎన్నికలు జరగనున్న విషయం తెలిసిందే. ఆయా నియోజకవర్గాలలో చిరంజీవి ప్రచారం చేయాల్సిన రూట్ మ్యాప్‌ను సిద్ధం చేస్తున్నారు. కొవ్వూరుతో పాటు తెలంగాణలోనూ చిరంజీవి ప్రచారం చేసే అవకాశాలు కనిపిస్తున్నాయి. ప్రజారాజ్యం పార్టీ అధ్యక్షుడిగా ఆయన తెలంగాణను వ్యతిరేకించారు. అయితే కాంగ్రెసు పార్టీ నేతగా ఆయన తెలంగాణ బాధ్యతను ఆయన అధిష్టానం పైనే వేస్తారు. కాంగ్రెసులో విలీనం తర్వాత పలుమార్లు ఆయన తెలంగాణపై అధిష్టానం ఏ నిర్ణయం తీసుకున్నా కట్టుబడి ఉంటానని చెప్పారు. ఉప ఎన్నికల్లోనూ ఆయన అదే చెప్పే అవకాశముంది. చిరంజీవికి ఉన్న క్రేజ్ తెలంగాణలో కాంగ్రెసుకు కలిసి వస్తుందా లేదా చూడాలి.

మరోవైపు ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటి అధ్యక్షుడు బొత్స సత్యనారాయణ, ఉప ముఖ్యమంత్రి దామోదర రాజనర్సింహ కూడా ఉప ఎన్నికల ప్రచారంలో పాల్గొననున్నారు. పార్టీలోని ఈ ముఖ్య నేతలు నలుగురు కలిసే ప్రచారం చేస్తారా లేక వేరు వేరుగా చేస్తారా అనే అంశం ఇంకా స్పష్టం కాలేదు. అయితే పిసిసి చీఫ్ బొత్స మాత్రం తన పర్యటన కార్యాచరణను ఇప్పటికే సిద్ధం చేసుకుంటున్నారట.

Published On February 29, 2012