మళ్లీ సిఎంగా యడ్యూరప్ప?ఒత్తిడికి తలొగ్గుతున్న పార్టీ

By Srinivas

Published: Monday, March 19, 2012, 17:07 [IST]

బెంగళూరు: భారతీయ జనతా పార్టీ సీనియర్ నేత, మాజీ ముఖ్యమంత్రి యడ్యూరప్పకు మళ్లీ ముఖ్యమంత్రి దక్కే అవకాశాలు కనిపిస్తున్నాయి. ఆయన తెస్తున్న ఒత్తిడికి అధిష్టానం తలొగ్గుతున్నట్లుగా కనిపిస్తోందని సమాచారం. గత కొంతకాలంగా తనను మళ్లీ సిఎం పీఠంపై కూర్చుండ బెట్టాలని యడ్యూరప్ప బిజెపి అధిష్టానంపై ఒత్తిడి తీసుకు వస్తున్న విషయం తెలిసిందే. రెండు రోజులుగా ఈ విషయంలో ఆయన దూకుడును పెంచారు. పార్టీలోని తన వర్గం ఎమ్మెల్యేలను ఓ రిసార్టులో ఉంచారు. సుమారు 75 మందికి పైగా ఎమ్మెల్యేలు ఆయనకు మద్దతిస్తున్నట్లుగా వార్తలు వచ్చిన విషయం తెలిసిందే. రిసార్టులో సుమారు 65 మంది ఎమ్మెల్యేలకు పైగా ఉన్నారని సమాచారం. పదిమంది ఎంపీలు కూడా ఆయనకే మద్దతు ఇస్తున్నారు. వారు ఢిల్లీలో పార్టీ అగ్రనేత లాల్ కృష్ణ అద్వానీని ఈ రోజు కలిసి యడ్డీని సిఎం చేయాలని విజ్ఞప్తి చేశారు. తన వర్గం ఎమ్మెల్యేలతోనూ ఆయన అధిష్టానంపై ఒత్తిడి తీసుకు వస్తున్నారు. యడ్డీని ముఖ్యమంత్రి చేయకుంటే తాము మూకుమ్మడి రాజీనామాలు చేస్తామని వారు అధిష్టానానికి హెచ్చరికలు జారీ చేశారు.

బిజెపి జాతీయ అధ్యక్షుడు నితిన్ గడ్కరీ, మరో నేత అరుణ్ జైట్లీ యడ్డీతో సోమవారం మాట్లాడి చల్లబరిచే ప్రయత్నాలు చేశారు. అయితే వారి బుజ్జగింపులకు ఏమాత్రం లొంగని యడ్డీ అధిష్టానానికి నలబై ఎనిమిది గంటల గడువు విధించారు. కొత్త సిఎం ఎన్నిక చేయాలని అందుకు శాసనసభా పక్ష సమావేశం నిర్వహించాలని ఆయన షరతు పెట్టారు. బుధవారం బడ్జెట్ సమావేశాలు ప్రారంభం కానున్నందున ఆ లోపే ఈ ప్రక్రియ పూర్తి కావాలని ఆయన చెప్పారని తెలుస్తోంది. అయితే ఆయన ఒత్తిడికి ఎట్టకేలకు బిజెపి తలొగ్గి ఆయనను ముఖ్యమంత్రిగా చేయాలని దాదాపు నిర్ణయించుకున్నట్లుగా కనిపిస్తోందని అంటున్నారు. యడ్యూరప్పపై ఉన్న క్రిమినల్ కేసులు రుజువు కాలేదని బిజెపి నేత అరుణ్ జైట్లీ వ్యాఖ్యానించడమే ఇందుకు నిదర్శనమంటున్నారు. సమస్య త్వరలో పరిష్కారమవుతుందని జైట్లీ చెప్పారు. మరోవైపు ముఖ్యమంత్రి సదానంద గౌడ బడ్జెట్ సమావేశాల అనంతరమే ఈ ప్రక్రియ నిర్వహించాలని చెబుతున్నారు. దీంతో ఎప్పుడు తిరిగి యెడ్డీకి పగ్గాలు అప్పగిస్తారో ఇంకా తెలియరాలేదని అంటున్నారు.

Published On March 19, 2012