చింతచిగురు మటన్ కర్రీ.. ఇలా చేస్తే మళ్ళీ మళ్ళీ కావాలంటారు!
వేసవికాలం వచ్చిందంటే చాలు.. మార్కెట్లోకి పచ్చటి లేత చింతచిగురు అందుబాటులోకి వస్తుంది. ఈ కాలంలో మాత్రమే దొరికే చింతచిగురుతో రకరకాల వంటకాలు చేసుకుంటుంటారు. అయితే, నాన్-వెజ్ ప్రియులకు చింతచిగురు మటన్ కూర పేరు చెప్పగానే నోరూరడం ఖాయం. మటన్ ముక్కల కమ్మదనానికి, చింతచిగురులోని సహజసిద్ధమైన పులుపు తోడైతే వచ్చే రుచి మరే వంటకానికీ రాదు. నోటికి ఎంతో రుచిని, విభిన్నమైన ఫ్లేవర్ను అందించే ఈ వంటకాన్ని ఎలా తయారు చేసుకోవాలో చూద్దాం.
కావలసిన పదార్థాలు:
మటన్ – అర కిలో
లేత చింతచిగురు – 1 పెద్ద కప్పు
ఉల్లిపాయలు – 2 (సన్నగా తరిగినవి)
పచ్చిమిర్చి – 3 (పొడవుగా కట్ చేసినవి)
అల్లం వెల్లుల్లి పేస్ట్ – 1 టేబుల్ స్పూన్
పసుపు – అర టీస్పూన్
కారం – 2 నుండి 3 టీస్పూన్లు (మీ రుచికి తగినట్లు)
ధనియాల పొడి – 1 టీస్పూన్
గరం మసాలా పొడి – 1 టీస్పూన్
నూనె – 3 నుండి 4 టేబుల్ స్పూన్లు
ఉప్పు – రుచికి సరిపడా
కొత్తిమీర – కొద్దిగా
తయారీ విధానం:
ముందుగా మటన్ను శుభ్రంగా కడిగి నీరు లేకుండా పిండేయాలి. ఒక గిన్నెలో మటన్ ముక్కలు తీసుకుని అందులో కొద్దిగా పసుపు, ఒక స్పూన్ కారం, కొంచెం ఉప్పు, అల్లం వెల్లుల్లి పేస్ట్ మరియు ఒక చెంచా నూనె వేసి బాగా కలిపి అరగంట పాటు పక్కన పెట్టుకోవాలి. ఈలోపు చింతచిగురును శుభ్రం చేసుకుని, చేతులతో బాగా నలిపి (నలుపుకుంటే పొడిలా అవుతుంది) పక్కన ఉంచుకోవాలి.
కుక్కర్ లో ఇలా వండుకుంటే సూపర్ చింతచిగురు మటన్
స్టవ్ ఆన్ చేసి ప్రెజర్ కుక్కర్ పెట్టుకుని నూనె వేయాలి. నూనె వేడెక్కాక తరిగిన ఉల్లిపాయ ముక్కలు, పచ్చిమిర్చి వేసి ఉల్లిపాయలు బంగారు రంగులోకి వచ్చే వరకు వేయించాలి. ఆ తర్వాత మెరినేట్ చేసి పెట్టుకున్న మటన్ ముక్కలను కుక్కర్లో వేసి, హై ఫ్లేమ్పై 5 నిమిషాల పాటు బాగా కలుపుతూ వేయించాలి. దీనివల్ల మటన్లోని నీరంతా బయటకు వస్తుంది.
మటన్ ఇలా వండుకుంటే టేస్ట్ అదుర్స్
మటన్ ముక్కలు కాస్త వేగిన తర్వాత ధనియాల పొడి వేసి కలపాలి. ఇప్పుడు మటన్ ముక్కలు మునిగేలా సరిపడా నీళ్లు పోసి, కుక్కర్ మూత పెట్టి 4నుండి 5విజిల్స్ వచ్చే వరకు మటన్ సాఫ్ట్గా ఉడికేంత వరకు ఉడికించుకోవాలి. కుక్కర్ ప్రెజర్ తగ్గిన తర్వాత మూత తీసి మళ్లీ స్టవ్ను చిన్న మంటపై ఆన్ చేయాలి. ఇప్పుడు ముందుగా నలిపి పెట్టుకున్న చింతచిగురును మటన్ కూరలో వేసి నిదానంగా కలపాలి.
ఘాటుగా, పుల్లపుల్లగా చింతచిగురు మటన్ కర్రీ
చింతచిగురు వేసిన తర్వాత కూరను ఎక్కువ సేపు ఉడికించాల్సిన అవసరం లేదు. కేవలం 5 నుండి 7 నిమిషాల పాటు చిన్న మంటపై ఉడికిస్తే చాలు.. చింతచిగురు పులుపును మటన్ ముక్కలు బాగా పీల్చుకుంటాయి. కూర దగ్గరపడి నూనెపైకి తేలుతున్న సమయంలో గరం మసాలా పొడి మరియు సన్నగా తరిగిన కొత్తిమీర చల్లుకుని బాగా కలిపి ఒక నిమిషం తర్వాత స్టవ్ ఆఫ్ చేయాలి. ఎంతో ఘాటుగా, పుల్లపుల్లగా ఉండే చింతచిగురు మటన్ కర్రీ సిద్ధం. దీనిని వేడివేడి అన్నం లేదా బగారా రైస్తో తింటే రుచి అద్భుతంగా ఉంటుంది..
Click it and Unblock the Notifications
Sign in with Google