మండలి నాయకుడిగా చిరు వర్గం నేత రామచంద్రయ్య

By Srinivas

Published: Wednesday, March 21, 2012, 7:44 [IST]

హైదరాబాద్: శాసనమండలి సభాపక్ష నేతగా తిరుపతి శాసనసభ్యుడు, కాంగ్రెసు నేత చిరంజీవి వర్గానికి చెందిన దేవాదాయ శాఖ మంత్రి రామచంద్రయ్య మంగళవారం నియమితులయ్యారు. ఈ విషయాన్ని రెవెన్యూ శాఖ మంత్రి రఘువీరా రెడ్డి శాసన మండలిలో ప్రకటించారు. రామచంద్రయ్య నియామకం పై చైర్మన్ చక్రపాణి సహా అధికార, విపక్ష నేతలు హర్షం వ్యక్తం చేస్తూ అభినందనలు తెలిపారు. శాసనమండలిలో సభాపక్ష నేత లేకుండా బడ్జెట్ సమావేశాలు కొనసాగింపుపై పలువురు సభ్యులు ప్రస్తావన చేశారు. మంగళవారం ఈ విషయాన్ని ప్రతిపక్ష నేత దాడి వీరభద్ర రావు లేవనెత్తారు. సభకు నాయకుడు లేకుండా సమావేశాలు పూర్తి కావడం సభకు గౌరవ ప్రదం కాదని అన్నారు.

దీంతో రఘువీరా రెడ్డి ముఖ్యమంత్రి కిరణ్ కుమార్ రెడ్డి వద్దకు వెళ్లి మాట్లాడారు. మండలి సభ్యుడు, మంత్రి రామచంద్రయ్యను ఈ పదవికి ఎంపిక చేశారు. ఆ తర్వాత అరగంటకు సభకు చేరుకున్న రఘువీరా రెడ్డి రామచంద్రయ్యను సభాపక్ష నేతగా ముఖ్యమంత్రి కిరణ్ కుమార్ రెడ్డి నియమించారని చెప్పారు. కాగా తనను శాసనసభా పక్ష నేతగా నియమించడం సంతోషంగా ఉందని సి.రామచంద్రయ్య చెప్పారు.

Published On March 21, 2012