ఓటమి ఎఫెక్ట్: టిఆర్ఎస్ నేత ఇంటిపై కార్యకర్తల దాడి!

By Srinivas

Published: Wednesday, March 21, 2012, 17:07 [IST]

మహబూబ్‌నగర్: మహబూబ్ నగర్ జిల్లాలో తెలంగాణ రాష్ట్ర సమితి నేత జితేందర్ రెడ్డి ఇంటి పైన కొందరు దాడి చేశారు. అదే పార్టీకి చెందిన కార్యకర్తలు కొందరు దాడి చేసినట్లుగా తెలుస్తోంది. మహబూబ్ నగర్ నియోజకవర్గం నుండి భారతీయ జనతా పార్టీ అభ్యర్థి యెన్నం శ్రీనివాస్ రెడ్డి గెలుపొందగా, తెరాస అభ్యర్థి ఇబ్రహీం ఓడిపోయిన విషయం తెలిసిందే. అయితే ఇబ్రహీం ఓటమికి జితేందర్ రెడ్డియే కారణమంటూ వారు దాడి చేశారని తెలుస్తోంది. వారి దాడిలో జితేందర్ రెడ్డి ఇంటి అద్దాలు పగిలిపోయాయి. ఇంటి ముందు ఉన్న కారు, లూనా కొద్దిగా ధ్వంసమైంది. జితేందర్ రెడ్డి ఇల్లు పద్మావతి నగర్‌లో ఉంది. తెరాస కార్యకర్తలే జితేందర్ రెడ్డి ఇంటిపై దాడి చేయడంతో అక్కడ పరిస్థితి ఉద్రిక్తతకు దారి తీసింది. ఆందోళనకారులు రాళ్లతో ఇంటి పైన దాడి చేశారు. దాడి సమయంలో జితేందర్ రెడ్డి ఇంట్లో లేరు.

కాగా తెలంగాణ రాష్ట్ర సమితి అధ్యక్షుడు, కల్వకుంట్ల చంద్రశేఖర రావు ఎంపిగా ప్రాతినిథ్యం వహిస్తున్న మహబూబ్ నగర్ నియోజకవర్గంలో గెలుపుపై ఆ పార్టీ గట్టి ఆశలు పెట్టుకుంది. అక్కడి ఫలితం మాత్రం తెరాసకు షాక్ ఇచ్చింది. మొదట నాలుగో స్థానంలో ఉన్న తెరాస ఏడెనిమిది రౌండ్లు పూర్తయ్యేసరికి ఒక్కసారిగా మొదటి స్థానంలోకి వచ్చింది. దాదాపు చివరి వరకు ఆ పార్టీయే గెలుపొందుతుందని అందరూ భావించారు. కానీ చివరి రెండు రౌండ్లు ఫలితాన్ని తారుమారు చేశాయి. ఆ రౌండ్లలో బిజెపి ఆధిక్యం సంపాదించి విజయం సాధించింది.

Published On March 21, 2012