పార్టీని గౌరవించాలి: నారా-నందమూరి విభేదాలపై బాబు

By Srinivas

Published: Sunday, April 1, 2012, 16:08 [IST]

హైదరాబాద్: నారా - నందమూరి కుటుంబాల మధ్య ఉన్న విభేదాల పైన తెలుగుదేశం పార్టీ అధినేత నారా చంద్రబాబు నాయుడు ఆదివారం ఎన్టీవి ముఖాముఖి కార్యక్రమంలో స్పందించారు. తనకు కుటుంబం ఎంత ముఖ్యమో పార్టీ కూడా అంతే ముఖ్యమని చెప్పారు. తాను వ్యక్తిగత జీవితానికి స్వస్తీ చెప్పి మరీ తెలుగుదేశం పార్టీ అభివృద్ధి కోసం పాటుపడ్డానని చెప్పారు. పార్టీనే చూసుకుంటూ కుటుంబానికి సమయం కేటాయించక పోవడంపై తన భార్య కూడా తనను పలుమార్లు మందలించిందన్నారు. ఎవరైనా పార్టీని గౌరవించాల్సిందేనని చెప్పారు. ఇక టిడిపిని కాంట్రాక్టర్ల పార్టీ అనడంపై చంద్రబాబు.. కాంట్రాక్టర్లు ఏ పార్టీలో లేరని ఆయన ప్రశ్నించారు. కొంతమంది కావాలనే ఉద్దేశ్య పూర్వకంగా టిడిపిని టార్గెట్ చేస్తున్నారని విమర్శించారు. కాంట్రాక్టర్ల పార్టీ అని ఒకరిద్దరు అనుకోవచ్చు.. కానీ అది సరికాదన్నారు. అన్ని పార్టీల్లోనూ ఉన్నారన్నారు.

వైయస్సార్ కాంగ్రెస్ పార్టీ కాంగ్రెసు విషపు చెట్టులోని ఓ కొమ్మ అన్నారు. నాకు వచ్చిన అవకాశాన్ని ఎప్పుడూ స్వార్థం కోసం ఉపయోగించుకోలేదని ప్రజల కోసమే వినియోగించానన్నారు. అవినీతిలేని భారత్‌ను నిర్మించాలనేది తన కోరిక అన్నారు. కాంగ్రెసు పార్టీ తెలంగాణ రాష్ట్ర సమితి, ప్రజారాజ్యం పార్టీని కలుపుకొని 2014లో తెలుగుదేశం పార్టీని దెబ్బతీయాలని చూసిందన్నారు. కానీ ఇంతలో జగన్ పార్టీ వైయస్సార్ కాంగ్రెసు వచ్చిందన్నారు. ఇప్పటికే పిఆర్పీని కాంగ్రెసు విలీనం చేసుకుందన్నారు.

తెలంగాణపై స్పందిస్తూ.. నిర్ణయం తీసుకోవాల్సింది కేంద్రమే అన్నారు. తెలంగాణపై మేం కేంద్రానికి ఇచ్చిన లేఖను వెనక్కి తీసుకోలేదన్నారు. రాజకీయ లబ్ధి కోసమే కొందరు తమపై ఆరోపణలు చేస్తున్నారన్నారు. తెలంగాణకు టిడిపి వ్యతిరేకం కాదన్నారు. టిడిపికి ఎప్పుడూ సవాళ్లు ఎదురవుతున్నాయని, వాటిని సమర్థవంతంగా ఎదుర్కొంటుందన్నారు. మాకు ఎప్పుడూ క్లిష్ట పరిస్థితే అన్నారు. అయినా వాటిని అధిగమిస్తున్నామన్నారు. దివంగత ముఖ్యమంత్రి వైయస్ రాజశేఖర రెడ్డి ఆర్థికంగా, రాజకీయంగా టిడిపిని దెబ్బతీయాలని చూశారన్నారు. తెలంగాణ విషయంలో వైయస్ ద్వంద్వ వైఖరి ప్రదర్శించారని విమర్శించారు.

Published On April 1, 2012