జానాకు బుద్దీజ్ఞానం ఉందా: కెసిఆర్, మళ్లీ ఫామ్‌హౌస్‌కి

హైదరాబాద్: తెలంగాణకు చెందిన రాష్ట్ర మంత్రి కె. జానారెడ్డిపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తీవ్రంగా మండిపడ్డారు. ప్రత్యేక రాష్ట్రం కోసం ఇంకా వేచి చూద్దామనే జానారెడ్డికి మెదడుందా, బుద్ఢిజ్ఞానం ఉందా అని ఆయన అడిగారు. కాంగ్రెసు ప్రటకటనలో ఇంకా నిజాయితీ ఉందన్న జానారెడ్డి మాటలను ప్రజలు విశ్వసించబోరని, జానారెడ్డి ఓ రాజకీయ బేహారీ అని ఆయన ఆదివారం వ్యాఖ్యానించారు. ముఖ్యమంత్రి పీఠం కోసం గోతికాడి నక్కలా కూర్చున్న జానా రెడ్డి అవే మాటలు చెబుతారని ఆయన అన్నారు.

తెలంగాణపై చర్చలు ఒక నాటకమని, కాంగ్రెస్ పార్టీ తెలంగాణ రాష్ట్రం ఇస్తుందనడం బూటకమని ఆయన ఆగ్రహం వ్యక్తం చేశారు. ఆజాద్ ప్రకటనలో జానారెడ్డి ఏం నిజాయితీ కనిపించిందో చెప్పాలని డిమాండ్ చేశారు. చీము నెత్తురు ఉన్న, మంత్రులు, ఎంపీలు, ఎమ్మెల్యేలు, దిగువస్థాయి కార్యకర్తలు కాంగ్రెస్ పార్టీని విడి ఉద్యమంలో కలవాలని ఆయన పిలుపునిచ్చారు. తెలంగాణ వాదులు వేలాదిగా తరలివచ్చి సమరదీక్షను విజయవంతం చేయాలని ఆయన పిలుపునిచ్చారు. సమర దీక్షలోనే ఉద్యమ కార్యాచరణ ప్రకటిస్తామని ఆయన ఓ ప్రకటనలో తెలిపారు. కెసిఆర్ సోమవారంనాడు సమరదీక్షలో పాల్గొననున్నారు.

కాగా, అంతకు ముందు టీఆర్ఎస్ అధ్యక్షుడు కెసిఆర్ మళ్లీ తన వ్యవసాయ క్షేత్రానికి చేరుకున్నారు. ఆదివారం ఉదయం హైదరాబాద్ నుంచి బయలుదేరి మెదక్ జిల్లాలోని తన ఫామ్ హౌస్‌కు వెళ్లారు. ఈ నెల 16న మధ్యాహ్నం ఫామ్ హౌస్‌కి వెళ్లారు. 19న రాత్రి హైదరాబాద్‌లోని తన నివాసానికి వచ్చారు.

ఈ వారం రోజుల్లో ఆయనను పార్టీ శాసనసభ్యులు, నేతలతోపాటు, కాంగ్రెస్ ఎమ్మెల్యే కోమటిరెడ్డి వెంకట్‌రెడ్డి, ఉద్యోగ సంఘాల నేతలు, జేఏసీ చైర్మన్ కోదండరాం కలిశారు. పార్టీ పొలిట్‌బ్యూరో సభ్యురాలు సునీతారెడ్డి అనారోగ్యంతో చికిత్స పొందుతున్న ఒక ప్రైవేట్ ఆస్పత్రికి కేసీఆర్ శనివారం సాయంత్రం వెళ్లి ఆమెను పరామర్శించారు. ఆదివారం ఆయన తిరిగి ఫామ్‌హౌస్‌కు వెళ్లిపోయారు.

English summary

Telangana Rastra Samithi (TRS) president K Chandrasekhar Rao has lashed out at minister K Jana Reddy. He blamed Congress high command for not delivering decission on Telangana.