మిత్రులతో కలిసి ప్రియురాలిపై ప్రియుడి అత్యాచారం

విజయవాడ: ప్రేమించిన యువకుడే యువతిపై దారుణానికి ఒడిగట్టాడు. తన ప్రియురాలిపై మరో ముగ్గురితో కలిసి అత్యాచారం చేశాడు. కృష్ణా జిల్లా పెదపారుపూడికి చెందిన ఇంటర్ మొదటి సంవత్సరం విద్యార్థిని (17)పై సామూహిక అత్యాచారం చేశారు. ఆస్పత్రిలో చికిత్స పొందుతూ అమ్మాయి బుధవారం మరణించింది.

ఆ దళిత బాలికను ఆమె ప్రియుడు మరో ముగ్గురితో కలసి ఏప్రిల్ 3న అత్యాచారం చేశారని, ఆ కారణంగానే ఆమె మృతి చెందిందని ఒక అజ్ఞాత వ్యక్తి ఫోన్ చేసి చెప్పడంతో ఈ దారుణం వెలుగుచూసింది. గుడివాడలోని ఒక ప్రైవేట్ కళాశాలలో చదువుతున్న ఆ బాలికను ఆమె స్వగ్రామానికి చెందిన ఒక యువకుడు ప్రేమ పేరిట మభ్యపెట్టాడని ఆ బాలిక స్నేహితురాళ్లు చెప్పినట్లు తెలిసింది.

సంఘటన జరిగిన రోజున ఆ బాలిక రాజీవ్ యువకిరణాల శిక్షణ కోసం మచిలీపట్నం వెళ్లింది. ఈ విషయం తెలుసుకున్న ఆమె ప్రి యుడు ఆ బాలికను మచిలీపట్నం సమీపంలోని మంగినపూడి బీచ్‌కు తీసుకెళ్లి తన స్నేహితులతో కలసి ఈ దురాగతానికి పాల్పడ్డాడు. నాటినుంచి అస్వస్థతకు గురైన ఆ బాలికను ఆమె తల్లి మంగళగిరి సమీపంలోని ఎన్ఆర్ఐ ఆసుపత్రిలో చేర్చింది.

అయితే వైద్య ఖర్చులు భరించలేకపోవడంతో బాధితురాలిని విజయవాడ ప్రభుత్వ ఆసుపత్రికి తరలించారు. అక్కడ చికిత్స పొందుతూ బుధవారం ఆ బాలిక తుది శ్వాస విడిచింది. కాగా ఘటన జరిగిన రోజే నిందితులను అదుపులోకి తీసుకున్న మచిలీపట్నం పోలీసులు సొమ్ము తీసుకుని విడిచిపెట్టారని గ్రామస్తులు ఆరోపిస్తున్నారు.

English summary

An Intermediate first year girl student has been raped by her lover and other three persons in Krishna district.