రాష్ట్ర కాంగ్రెసు అఫైర్స్: ఢిల్లీలో వేడెక్కిన పంచాయతీ

న్యూఢిల్లీ: రాష్ట్ర కాంగ్రెసు వ్యవహారాలతో ఢిల్లీ రాజకీయాలు వేడెక్కాయి. రాష్ట్రానికి చెందిన కాంగ్రెసు అగ్రనేతలు ఇప్పటికే ఢిల్లీకి చేరుకున్నారు. మంత్రివర్గం నుంచి డిఎల్ రవీంద్రా రెడ్డి బర్తరఫ్, తెలంగాణ అంశాలపై ప్రధానంగా చర్చలు జరుగుతున్నట్లు తెలుస్తోంది. రాష్ట్ర నాయకులతో చర్చలతో కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ రెండు రోజులుగా తీరిక లేకుండా ఉన్నారు. పిసిసి అధ్యక్షుడు బొత్స సత్యనారాయణ, కేంద్ర మంత్రి చిరంజీవి సోమవారం సాయంత్రం ఆజాద్‌తో సమావేశమయ్యారు.

డిఎల్ రవీంద్రా రెడ్డి బర్తరఫ్‌ను వ్యతిరేకిస్తున్న రాష్ట్ర నాయకులు మొత్తం ఢిల్లీకి చేరినట్లు భావిస్తున్నారు. డిఎల్ రవీంద్రారెడ్డిని బర్తరఫ్ చేయడాన్ని బొత్స సత్యనారాయణ కూడా వ్యతిరేకిస్తున్నారు. ఉప ముఖ్యమంత్రి దామోదర రాజనర్సింహ, సీనియర్ మంత్రి కె. జనా రెడ్డి కూడా డిఎల్ రవీంద్రా రెడ్డిని మంత్రివర్గం నుంచి బర్తరఫ్ చేయడాన్ని వ్యతిరేకిస్తున్నారు. ఇప్పటికే జానా రెడ్డి ఢిల్లీకి చేరుకున్నారు. జానారెడ్డి, పార్లమెంటు సభ్యుడు సిరిసిల్ల రాజయ్య మంగళవారం ఆజాద్‌తో సమావేశమయ్యారు.

పంచాయతీ ఎన్నికల గురించి చర్చించడానికే తనను ఆజాద్ ఢిల్లీకి ఆహ్వానించినట్లు జానా రెడ్డి చెప్పారు. అయితే, తెలంగాణపైనే కాకుండా డిఎల్ రవీంద్రారెడ్డి బర్తరఫ్‌పై కూడా జానారెడ్డి ఆజాద్‌తో మాట్లాడినట్లు తెలుస్తోంది. దామోదర రాజనర్సింహ మంగళవారం సాయంత్రం ఢిల్లీకి బయలుదేరి, హైదరాబాద్ విమానాశ్రయం నుంచి తిరిగి వెనక్కి వెళ్లారు. రేపు సాయంత్రం దామోదర రాజనర్సింహ ఎంసెట్ ఫలితాలను విడుదల చేయాల్సి ఉంది.

రేపు బుధవారం ముఖ్యమంత్రి కిరణ్ కుమార్ రెడ్డి ఢిల్లీ వస్తున్నారు. ఆయనతో డిఎల్ రవీంద్రా రెడ్డి బర్తరఫ్ తర్వాత తలెత్తిన పరిణామాలపై, తెలంగాణపై ఆజాద్ చర్చించే అవకాశం ఉన్నట్లు తెలుస్తోంది. ఢిల్లీలో బొత్స సత్యనారాయణతో మంత్రి జానా రెడ్డి, పార్లమెంటు సభ్యుడు వి హనుమంతరావు సమావేశమయ్యారు. సిఎల్పీలోకి డిఎల్ రవీంద్రారెడ్డిని అనుమతించకపోవడం బాధ కలిగించిందని హనుమంతరావు అన్నారు. డిఎల్ రాజీనామా సమర్పించినప్పుడే ఆమోదించి ఉండాల్సిందని ఆయన అభిప్రాయపడ్డారు.

ముఖ్యమంత్రి కిరణ్ కుమార్ రెడ్డి మంగళవారం సాయంత్రం గవర్నర్ నర్సింహన్‌ను రాజభవన్‌లో కలిశారు. తాజా పరిణామాలపై ఆయన గవర్నర్‌కు వివరించినట్లు సమాచారం.