సర్పంచ్ ఫలితాలు: ఏ రాజకీయ పార్టీ సత్తా ఎంత..

హైదరాబాద్: మొదటి దశ మంగళవారం జరిగిన పంచాయతీ సర్పంచ్‌ల ఎన్నికల్లో హస్తం హవా కనిపించింది. అధికార కాంగ్రెసు పార్టీ తన ఆధిక్యతను చాటుకుంది. అయితే, తెలుగుదేశం పార్టీ కాంగ్రెసుకు గట్టి పోటీ ఇచ్చింది. వైయస్సార్ కాంగ్రెసు తెలుగుదేశం పార్టీకి దీటుగా నిలబడడానికి ప్రయత్నించింది. తెలంగాణ రాష్ట్ర సమితి (తెరాస) కొన్ని జిల్లాల్లో పూర్తి పట్టు సాధించింది. తెలంగాణలో వైయస్ జగన్ నాయకత్వంలోని వైయస్సార్ కాంగ్రెసు పార్టీ ప్రభావం ఏ మాత్రం కనిపించలేదు.

సర్పంచ్ ఎన్నికలు పార్టీరహితంగా జరిగినప్పటికీ అన్ని పార్టీలు తమ తమ మద్దతుదారులను పోటీకి దింపి బలాన్ని పరీక్షించుకునే ప్రయత్నాలు చేశాయి. పలు జిల్లాల్లో స్వతంత్రులు పెద్ద యెత్తునే గెలిచారు. వారు ఏ పార్టీకి మద్దతు ఇస్తారనే దాన్ని బట్టి పార్టీల బలాబలాలు తారుమారు కూడా కావచ్చు. మంగళవారం సాయంత్రం అందిన ఫలితాల ప్రకారం పార్టీల పరిస్థితి జిల్లాల్లో ఈ విధంగా ఉంది.

శ్రీకాకుళం జిల్లాలో..

మంగళవారం సాయంత్రం ఏడు గంటల వరకు అందిన ఫలితాలను బట్టి శ్రీకాకుళం జిల్లాలో తెలుగుదేశం తన సత్తా చాటింది. ఈ పార్టీ మద్దతుదారులు 108 మంది విజయం సాధించారు. కాంగ్రెసు పార్టీ మద్దతుదారులు 82 మంది గెలిచారు. వైయస్సార్ కాంగ్రెసు పార్టీ (వైకాపా) 39 పంచాయతీలతో మూడో స్థానంలో నిలిచింది.

విజయనగరం జిల్లాలో..

పిసిసి అధ్యక్షుడు బొత్స సత్యనారాయణ సొంత జిల్లా విజయనగరం కాంగ్రెసు మద్దతుదారులు ఎక్కువ మంది గెలిచారు. కాంగ్రెసు మద్దతుదారులు 90 పంచాయతీల్లో విజయం సాధించగా, వైయస్సార్ కాంగ్రెసు పార్టీ 51 మంది సర్పంచ్ పదవులను గెలుచుకుంది. టిడిపి 43 స్థానాలతో మూడో స్థానంలో నిలిచింది.

విశాఖ జిల్లాలో

విశాఖపట్నం జిల్లాలో వైయస్సార్ కాంగ్రెసు పార్టీది పైచేయిగా ఉంది. ఈ పార్టీ 32 పంచాయతీలను గెలుచుకుంది. టిడిపి మద్దతుదారులు 19 మంది, కాంగ్రెసు మద్దతుదారులు 17 మంది విజయం సాధించారు.

తూర్పు గోదావరి జిల్లాలో..

తూర్పో గోదావరి జిల్లాలో వైయస్సార్ కాంగ్రెసు పార్టీ ఆధిక్యత ప్రదర్సించింది. ఈ పార్టీ మద్దతుదారులు 42 మంది విజయం సాధించగా, తెలుగుదేశం మద్దతుదారులు 35 మంది, కాంగ్రెసు మద్దతుదారులు 31 మంది గెలిచారు.

పశ్చిమ గోదావరి జిల్లాలో..

పశ్చిమ గోదావరి జిల్లాలో తెలుగుదేశం పార్టీ సత్తా చాటింది. ఈ పార్టీ మద్దతుదారులు 79 పంచాయతీలను కైవసం చేసుకున్నారు. కాంగ్రెసు 42 పంచాయతీలను, వైకాపా 30 పంచాయతీలను దక్కించుకున్నాయి.

కృష్ణా జిల్లాలో..

కృష్ణా జిల్లాలో కూడా తెలుగుదేశం పార్టీ తన ప్రాబల్యాన్ని చాటుకుంది. ఈ పార్టీ మద్దతుదారులు 62 మంది గెలువగా, కాంగ్రెసు మద్దతుదారులు 29 మంది, వైకాపా మద్దతుదారులు 25 మంది విజయం సాధించారు.

గుంటూరు జిల్లాలో..

గుంటూరు జిల్లాలో టిడిపి 83 స్థానాలతో రెండు పార్టీలపై ఆధిక్యత ప్రదర్శించింది. తర్వాతి స్థానాన్ని వైయస్సార్ కాంగ్రెసు పార్టీ దక్కించుకుంది. కాంగ్రెసు మద్దతుదారులు 20 మంది విజయం సాధించగా, వైకాపా అభ్యర్థులు 50 మంది విజయం సాధించారు.

ప్రకాశం జిల్లాలో

ప్రకాశం జిల్లాలో కూడా టిడిపి ఆధిక్యత చాటుకుంది. ఈ పార్టీ మద్దతుదారులు 78 పంచాయతీలను దక్కించుకున్నారు. కాంగ్రెసు మద్దతుదారులు 28 మంది, వైకాపా మద్దతుదారులు 44 మంది విజయం సాధించారు.

నెల్లూరు జిల్లాలో..

నెల్లూరు జిల్లాలో కాంగ్రెసు ఆధిక్యత చాటింది. కాంగ్రెసు మద్దతుదారులు 75 మంది గెలిచారు. వైకాపా మద్దతుదారులు 67 మంది, టిడిపి మద్దతుదారులు 55 మంది విజయం సాధించారు.

కర్నూలు జిల్లాలో..

రైల్వే శాఖ సహాయ మంత్రి కోట్ల సూర్యప్రకాశ్ రెడ్డి జిల్లా కర్నూలులో కాంగ్రెసు పార్టీ ఆధిక్యత ప్రదర్సించింది. కాంగ్రెసు మద్దతుదారులు 95 మంది విజయం సాధించగా, వైకాపా 42, టిడిపి 41 పంచాయతీలు గెలుచుకున్నాయి.

కడప జిల్లాలో..

వైయస్ జగన్ సొంత జిల్లా కడపలో వైయస్సార్ కాంగ్రెసు పార్టీ హవానే నడిచింది. వైయస్సార్ కాంగ్రెసు పార్టీ మద్దతుదారులు 89 మంది విజయం సాధించగా, కాంగ్రెసు మద్దతుదారులు 40 మంది, టిడిపి మద్దతుదారులు 17 మంది విజయం సాధించారు.

చిత్తూరు జిల్లాలో..

తన సొంత జిల్లా చిత్తూరులో ముఖ్యమంత్రి కిరణ్ కుమార్ రెడ్డికి ఎదురు దెబ్బ తగిలింది. తెలుగుదేశం పార్టీ అధ్యక్షుడు నారా చంద్రబాబు నాయుడు కూడా ఇదే జిల్లాకు చెందినవారు. టిడిపి ఈ జిల్లాలో ఆధిక్యత ప్రదర్సించింది. ఈ పార్టీ మద్దతుదారులు 116 మంది విజయం సాధించారు. రెండో స్థానం వైయస్సార్ కాంగ్రెసు పార్టీకి దక్కింది. ఈ పార్టీకి 88 పంచాయతీలు చేజిక్కాయి. కాంగ్రెసు 44 పంచాయతీలతో సరిపెట్టుకోవాల్సి వచ్చింది.

అనంతపురం జిల్లాలో..

అనంతపురం జిల్లాలో టిడిపి ఆధిక్యత ప్రదర్శించింది. ఈ పార్టీకి చెందిన 129 మద్దతుదారులు విజయం సాధించారు. వైయస్సార్ కాంగ్రెసు పార్టీ మద్దతుదారులు 76 మంది, కాంగ్రెసు మద్దతుదారులు 52 మంది విజయం సాధించారు.

రంగారెడ్డి జిల్లాలో...

రంగారెడ్డి జిల్లాలో టిడిపి ఆధిక్యత చాటుకుంది. ఈ పార్టీ మద్దతుదారులు 37 పంచాయతీలను కైవసం చేసుకున్నారు. కాంగ్రెసుకు 18 పంచాయతీలు దక్కగా, వైకాపాకు ఐదు, తెరాసకు మూడు పంచాయతీలు దక్కాయి.

మెదక్ జిల్లాలో..

తెరాస అధ్యక్షుడు కె చంద్రశేఖర రావు జిల్లా మెదక్‌లో తెరాస ఆధిక్యత ప్రదర్శించింది. ఈ పార్టీ మద్దతుదారులు 46 మంది సర్పంచులుగా విజయం సాధించారు. కాంగ్రెసుకు 27 పంచాయతీలు రాగా, టిడిపికి 9 వచ్చాయి. వైయస్సార్ కాంగ్రెసు పార్టీకి సాయంత్రం 7 గంటల వరకు ఒక్క పంచాయతీ కూడా దక్కలేదు.

నిజామాబాద్ జిల్లాలో..

నిజామాబాద్ జిల్లాలో కాంగ్రెసు, టిడిపి పోటాపోటీగా తలపడ్డాయి. ఈ పార్టీల మద్దతుదారులు 40 చొప్పున గెలిచారు. తెరాసకు 25 పంచాయతీలు దక్కగా, వైకాపాకు ఒక్క స్థానం చిక్కింది.

కరీంనగర్ జిల్లాలో..

కరీంనగర్ జిల్లాలో కాంగ్రెసు ఆధిక్యత ప్రదర్సించింది. ఆ పార్టీ 48 పంచాయతీ సర్పంచులను గెలిపించుకోగా, తెరాస 32 స్థానాలను దక్కించుకుంది. టిడిపి సర్పంచు అభ్యర్థులు 27 మంది గెలిచారు. వైకాపా అభ్యర్థి ఒక్కరు మాత్రమే గెలిచారు.

ఆదిలాబాద్ జిల్లాలో..

ఆదిలాబాద్ జిల్లాలో టిడిపి 27 పంచాయతీ సర్పంచులను గెలిపించుకోగా, కాంగ్రెసు 17 మందిని గెలిపించుకుంది. తెరాసకు ఏడు దక్కాయి. వైకాపాకు ఒక్కటి కూడా దక్కలేదు.

వరంగల్ జిల్లాలో...

వరంగల్ జిల్లాలో వైయస్సార్ కాంగ్రెసు పార్టీ ఉనికిని చాటుకుంది. ఆ పార్టీకి ఐదు పంచాయతీలు దక్కాయి. తెరాసకు అత్యధికంగా 39 పంచాయతీలు చిక్కాయి. కాంగ్రెసు 23, టిడిపి 17 స్థానాలు దక్కించుకున్నాయి.

నల్లగొండ జిల్లాలో...

నల్లగొండ జిల్లాలో కాంగ్రెసు ఆధిక్యత ప్రదర్సించింది. ఈ పార్టీ మద్దతుదారులు 51 మంది గెలిచారు. టిడిపి 22 పంచాయతీలను దక్కించుకోగా, తెరాస 39 పంచాయతీలను సాధించుకుంది. వైకాపాకు ఐదు పంచాయతీలు దక్కాయి.

మహబూబ్‌నగర్ జిల్లాలో...

మహబూబ్‌నగర్ జిల్లాలో కాంగ్రెసు ఆధిక్యత ప్రదర్శించింది. ఈ పార్టీ 93 పంచాయతీలను దక్కించుకుంది. టిడిపి మద్దతుదారులు 78 మంది గెలిచారు. వైయస్సార్ కాంగ్రెసు పార్టీ 44 పంచాయతీలను గెలుచుకుంది. తెరాస నాలుగు స్థానాలు మాత్రమే దక్కాయి.

English summary

The ruling Congress party has won the most of the Panchayats in the first phase of elections held today. Telugudesam party and YSR Congress struggled for second position.