కలికాలం: శునకం పాలు తాగుతున్న లేగదూడ, వీడియో వైరల్.. ఎక్కడంటే

Published: Friday, February 26, 2021, 16:33 [IST]

బ్రహ్మాం గారూ చెప్పినట్టే జరుగుతున్నాయి. కలికాలంలో మాటకు నమ్మకం లేకుండా పోతోంది. కొందరు వరసలు మరచిపోతున్నారు. వింతలు- విశేషాలు వెలుగుచూస్తున్నాయి. ఆదిలాబాద్ జిల్లాలో ఇలాంటి ఘటన ఒకటి జరిగింది. ఓ లేగదూడ.. ఏకంగా శునకం పాలు తాగుతోంది. వినడానికి కాస్త ఆశ్చర్యంగా ఉన్న ఇదీ నిజం. ఆ డాగ్ కూడా తన పిల్లల మాదిరిగానే పాలు ఇస్తూ.. దూడ కడుపు నింపుతోంది. ఈ వీడియోనే ఓ నెటిజన్ పోస్ట్ చేయగా.. తెగ ట్రోల్ అవుతోంది. ఆ విశేషాలు ఏంటో తెలుసుకుందాం. పదండి.

ఆవు వద్దకు నో, డబ్బా పాలు కూడా వద్దు

కొద్ది రోజుల క్రితం తల్లి లేని లేగ దూడను ఆదిలాబాద్ జిల్లా ఇచ్చోడ మండల కేంద్రంలో గల జైశ్రీరాం గోశాలలో వదిలిపెట్టారు. ఆ దూడ ఇతర ఆవుల పాలు తాగి పెరుగుతుందని అంతా అనుకున్నారు. కానీ ఆ లేగదూడ ఏ ఆవు దగ్గర పాలు తాగడం లేదు. డబ్బా పాలు కూడా ముట్టలేదు. పాలు లేకపోయినా ఆ లేగ దూడ హుషారుగా కనిపించడంతో వారంతా ఆశ్చర్యపోయారు. కానీ అందులో ఓ కిటుకు ఉంది.

శునకం పాలు ఇవ్వడంతో

ఏం జరుగుతుందని వారు గమనించారు. గోశాలలో గల ఓ కుక్క పాలు తాగుతూ లేగదూడ కనిపించింది. దీంతో వారు ఆశ్చర్యపోయారు. గత కొన్ని రోజుల నుండి ఆ లేగ దూడ కుక్కల తో కలిసి తిరగడం, వాటితోనే కలిసి పడుకోవడం చేస్తోంది. కుక్క కూడా జాతి వైరం మరిచి ఆ తల్లి లేని లేగ దూడను అక్కున చేర్చుకొని తన పాలతో కడుపు నింపుతోంది. మిగతా శునకాలు కూడా సఖ్యంగా మెలగుతున్నాయి. జాతి వైరం మరచి శునకం, దూడ మెలగడం అందరినీ ఆశ్చర్యపరుస్తోంది.

మమకారం

కొన్ని సందర్భాల్లో ఆవులు/ శునకాలే దూడలు/ కూనలకు పాలు ఇవ్వవు. చాలా ఇబ్బంది పెడతాయి. కానీ ఇక్కడ శునకం మాత్రం లేగ దూడపై మమకారం చూపిస్తోంది. తన పాలను ఇస్తూ అదీ ఎదిగేందుకు దోహదం చేస్తోంది. ఇదీ విని/ చూసిన స్థానికులు నోరెళ్లబెట్టారు. అయ్యో ఇదేం విచిత్రం అంటూ ముక్కున వేలేసుకుంటున్నారు. ఇలాంటివి కామనే అని మరికొందరు అంటున్నారు. దూడలకు శునకాలు, కూనలకు ఆవులు పాలు ఇస్తున్నాయని చెబుతున్నారు. ఇదివరకు ఓ తల్లి కూడా దూడకు పాలు ఇచ్చిందని గుర్తుచేశారు.

Published On February 26, 2021