కార్తీక దీపంతో నాలుగు ఇళ్ళు బూడిద చేసిన కాకి!

అదృష్టం అడ్డం తిరిగితే అరటి పండు తిన్నా పన్ను విరుగుతుంది అని ఏదో సినిమాలో చెప్పినట్టు మన టైం బాగోకపోతే తాడే పామై కరుస్తుంది. ఇక అటువంటి ఘటన విజయనగరం జిల్లాలో చోటుచేసుకుంది. సహజంగా మనం బయట ఏమైనా పెడితే పక్షులు, జంతువులు వాటిని తీసుకుని వెళ్లడం అప్పుడప్పుడు చూస్తూ ఉంటాం. అవేవో తినే వస్తువులు అయితే పర్వాలేదు కానీ ఒక కాకి దీపాన్ని ఎత్తుకెళ్లి విధ్వంసం సృష్టించింది.

కార్తీక మాసం పూజలు, దీపారాధన
విజయనగరం జిల్లాలో చోటు చేసుకున్న ఈ ఉదంతం ప్రతీ ఒక్కరినీ విస్మయానికి గురిచేసింది. అసలు కాకి దీపాన్ని తీసుకువెళ్లి ఏం చేసింది అనేది తెలుసుకుందాం. విజయనగరం జిల్లాలోని గరివిడి మండలం కోనూరు గ్రామంలో ఒక ఇంటి డాబా పైన కార్తీకమాసం సందర్భంగా పూజలు నిర్వహించారు. ఆ తర్వాత తులసి కోటలో దీపాన్ని పెట్టి పూజ చేసి వెళ్లిపోయారు.

కార్తీక దీపాన్ని ఎత్తుకెళ్ళి పూరి గుడిసెలపై వేసిన కాకి.. నాలుగిళ్ళు దగ్ధం
ఆపై అక్కడకు వెళ్లిన కాకి తులసికోట వద్ద పెట్టిన దీపాన్ని ఎత్తుకెళ్లి పక్కనే ఉన్న ఒక తాటాకు ఇంటి పైన పడేసింది. దీంతో ఒక్కసారిగా మంటలు అంటుకొని ఆ ఇల్లు తగలబడిపోగా, దాని పక్కనే ఉన్న మరో మూడు ఇళ్లకు కూడా మంటలు వ్యాపించి నాలుగు తాటాకు ఇళ్ళు బుగ్గిపాలయ్యాయి. నంబూరి గోపి, రెడ్డి సాంబ, కొక్కెర మాలచ్చమ్మ, మహంతి లక్ష్మీలకు చెందిన నాలుగు తాటాకు ఇళ్ళు అగ్నికి ఆహుతయ్యాయి.

పంట పెట్టుబడులకు తెచ్చిన డబ్బు, బంగారం కాలి బూడిద
అగ్నిమాపక సిబ్బంది సంఘటన స్థలానికి వచ్చి మంటలను అదుపులోకి తీసుకువచ్చారు. ఈ ప్రమాదంలో కౌలు రైతుగా పని చేసుకునే గోపి రబీ పెట్టుబడుల కోసం లక్ష రూపాయలు అప్పుగా తెచ్చి ఇంట్లో పెట్టారు. ఆ డబ్బుతో పాటు, అర తులం బంగారం కూడా కాలి బూడిదయ్యింది. తాసిల్దారు సిహెచ్ బంగారు రాజు సంఘటన స్థలాన్ని సందర్శించి నాలుగు లక్షల వరకు ఆస్తి నష్టం జరిగిందని అంచనా వేశారు.

English summary

A crow picked up a Karthika deepam lit in front of Tulsi during the month of Karthika and threw it at a house. Since the houses were thatched, a fire broke out and four houses were burnt down. This incident took place in Vizianagaram district