రేపు వారి ఖాతాల్లో నగదు జమ చేయనున్న ప్రభుత్వం..!!

ఏపీ ప్రభుత్వం కీలక నిర్ణయం తీసుకుంది. వరదల కారణంగా నష్టపోయిన వారికి ప్రభుత్వం ఇప్పటికే పరిహార ప్యాకేజీ ప్రకటించింది. నీట మునిగిన ప్రతీ ఇంటికి సాయం అందించాలని నిర్ణయించింది. ఇప్పటికే కొంత మందికి సాయం అందగా.. మరి కొంత మందికి అందలేదు. దీంతో, వారికి రేపు (సోమవారం) ప్రభుత్వం బ్యాంకుల్లో సాయం ప్రకటించిన నగదు జమ చేయనున్నట్లు వెల్లడించింది.

సాయం అందని బాధితులు ప్రభుత్వ కార్యాలయాల చుట్టూ తిరుగుతున్నారు. భారీగా నష్టపోయామని తమకు అండగా నిలవాలని కోరుతున్నారు. ప్రభుత్వం ప్రకటించిన పరిహారం అందటం లేదని వాపోతున్నారు. దీంతో, వారికి కలెక్టర్ హామీ ఇచ్చారు. వరద ప్రభావిత ప్రాంతాల కుటుంబాలకు రాష్ట్ర ప్రభుత్వం అందించే పరిహారానికి సంబంధించి బ్యాంకు ఖాతాల్లో సమస్యల వల్ల పెండింగ్ పడిందని ఎన్టీఆర్‌ జిల్లా కలెక్టర్‌ సృజన తెలిపారు. పెండింగ్‌లో ఉన్న 18 వేల కుటుంబాలకు గాను 4 వేల కుటుంబాలు ఇప్పటికే ఖాతాలను సరిచేసుకోవడం వల్ల పరిహారం అందిందన్నారు.

మిగిలిన 14 వేల కుటుంబాలకు సంబంధించి ఖాతాలను సచివాలయ కార్యదర్శుల ద్వారా ప్రభుత్వమే పరిష్కరించిందని, వీరికి రెండు రోజుల్లో పరిహారం అందుతుందని వెల్లడించారు. పలు కారణాలవల్ల పరిహారం అందజేయడంలో ఇబ్బంది ఎదురైనట్లు గుర్తించామన్నారు. వాటిని సచివాలయాల కార్యదర్శులు ఆయా కుటుంబాలను సంప్రదించి సరిచేశారని తెలిపారు. పరిహారం కోసం కలెక్టరేట్లో సమర్పించిన అర్జీలను క్షుణ్ణంగా పరిశీలించడం జరుగుతోందని, అర్హత ఉన్న ప్రతి కుటుంబానికి ఆర్థిక సహాయం అందజేయడం జరుగుతుందని, ఆందోళన చెందాల్సిన పని లేదని స్పష్టం చేశారు.

English summary

AP Govt to credit flood relief supporting amount in accounts on Monday.