పుష్ప అడవుల్లో అర్ధరాత్రి విద్యార్దుల మిస్సింగ్-సుడిగుండంలో క్లాస్ మేట్ బలి..!

తిరుపతి జిల్లాలోని శేషాచలం అడవులకు వెళ్లిన ఆరుగురు బీటెక్ విద్యార్ధుల విహార యాత్ర విషాదంగా ముగిసింది. అడవిలో వాటర్ ఫాల్స్ అందాలను చూసేందుకు వెళ్లిన వారిలో ఒకరు చనిపోగా.. మిగిలిన వారు అర్ధరాత్రి తప్పిపోయారు. నానా కష్టాలు పడ్డాక చివరికి పోలీసులు వారిని కాపాడారు. దీంతో హమ్మయ్య అనుకుంటూ వారు ఇళ్లకు చేరుకున్నారు. రాష్ట్రంలో కలకలం రేపిన ఈ ఘటన వివరాలు ఓసారి చూద్దాం..

శ్రీకాహళహస్తికి చెందిన ఆరుగురు బీటెక్ విద్యార్ధులు శేషాచలం అడవుల్లో ఉన్న వాటర్ ఫాల్స్ ను చూద్దామని నిన్న ఉదయం వెళ్లారు. వాటర్ ఫాల్స్ లోకి దిగి కాసేపు ఉల్లాసంగా గడిపారు. అయితే అంతలోనే అక్కడ ఉన్న సుడిగుండంలో పడి సాయిదత్త అనే విద్యార్థి చనిపోయారు. దీంతో భయ భ్రాంతులైన మిగతా ఐదుగురు అడవుల్లోకి వెళ్లారు. అక్కడ వీరు దారి తప్పిపోయారు. ఓవైపు రాత్రి కావడం, దారి తెలియకపోవడంతో అర్దరాత్రంతా అక్కడే తిరుగుతూ ఉండిపోయారు. ఎటువెళ్లాలో తెలియదు, ఫోన్ సిగ్నల్స్ పనిచేయడం లేదు, ఇలాంటి పరిస్ధితుల్లో బీటెక్ విద్యార్ధులకు చివరిగా ఓ దారి దొరికింది.

అడవుల్లోనే కాస్త సిగ్నల్ వచ్చే ప్రాంతానికి వెళ్లి అక్కడి నుంచి పోలీసులకు కాల్ చేసి సంప్రదించారు. దీంతో పోలీసులు కూడా షాకయ్యారు. చివరికి విద్యార్ధులు అడవిలో తాము ఉన్న లొకేషన్ ను పోలీసులకు షేర్ చేశారు. దీంతో రైల్వే కోడూరు పోలీసులు, స్థానిక అటవీ అధికారులతో కలిసి వారిని చేరుకున్నారు. అర్ధరాత్రి వేళ అడవిలోకి వెళ్లి మరీ వారిని కాపాడారు. ఉదయానికి బీటెక్ విద్యార్ధుల్ని తీసుకుని అడవిలో నుంచి బయటికి వచ్చారు. రైల్వే కోడూరు పీఎస్ కు తీసుకొచ్చి వారి తల్లి తండ్రులకు అప్పగించారు. దీంతో కథ సుఖాంతమైంది.

English summary

Tirupati btech students' trip to seshachalam forest has ended in tragedy as one of them was died in waterfall and remained are missed in midnight, later police saved them.