వివేకా లేఖ సంగతి తేల్చేందుకు కీలక పరీక్ష-సీబీఐ కోర్టు అనుమతి..

ఏపీలో తీవ్ర సంచలనం రేపుతున్న మాజీ మంత్రి వైఎస్ వివేకానందరెడ్డి హత్య కేసులో సీబీఐ దర్యాప్తు మరోసారి ఊపందుకుంటోంది. ఈ కేసులో ఇప్పటికే పలువురు నిందితుల్ని అరెస్టు చేసి జైలుకు పంపిన సీబీఐ.. కీలక ఆధారాల విషయంలో మాత్రం తడబడుతోంది. ముఖ్యంగా వివేకా రాశారని చెబుతున్న లేఖపై ఎవరి వేలుముద్రలు ఉన్నాయన్న దానిపై సీబీఐ ఇంకా ఓ నిర్ధారణకు రాలేకపోతోంది.

ఈ నేపథ్యంలో వైఎస్ వివేకానందరెడ్డి లేఖపై వేలి ముద్రల్ని తేల్చేందుకు కీలకమైన నిన్ హైడ్రిన్ టెస్ట్ చేయించాలని సీబీఐ నిర్ణయించింది. అయితే ఈ కేసులో కీలక ఆధారంగా ఉన్న వివేకా లేఖకు ఈ పరీక్ష చేయించాలంటే సీబీఐ కోర్టు అనుమతి తప్పనిసరి కావడంతో ఈ మేరకు సీబీఐ పిటిషన్ దాఖలు చేసింది. దీనిపై ఇవాళ విచారణ జరిపిన హైదరాబాద్ సీబీఐ కోర్టు.. నిన్ హైడ్రిన్ పరీక్షకు అనుమతిస్తూ కీలక నిర్ణయం తీసుకుంది.

అలాగే వివేకా రాసిన అసలు లేఖను కోర్టుకు సమర్పించి, ఈ లేఖకు సంబంధించి అవసరమైనన్ని సర్టిఫైడ్ కాపీలు తీసి పెట్టుకోవాలని సీబీఐకి సీబీఐ కోర్టు సూచించింది. నిన్ హైడ్రిన్ పరీక్ష వల్ల అసలు లేఖ దెబ్బతింటే మాత్రం ఈ సర్టిఫైడ్ కాపీని ఆధారంగా వాడుకోవాలని తెలిపింది. దీంతో సీబీఐ ఆ మేరకు ఏర్పాట్లు చేసుకుంటోంది. ఈ లేఖ సర్టిఫైడ్ కాపీలు తీసుకున్న తర్వాతే అసలు లేఖను నిన్ హైడ్రిన్ పరీక్షకు పంపే అవకాశముంది.

వివేకా రాశారని చెబుతున్న ఈ లేఖలో డ్రైవర్ ప్రసాద్ ను ఆలస్యంగా వచ్చినందుకు ప్రశ్నిస్తే తనను చంపేశాడని ఆయన స్వయంగా రాసినట్లు తేలింది. అయితే ఈ లేఖను ఇప్పటికే ఫోరెన్సిక్ కు పంపిన సీబీఐ.. ఒత్తిడిలో వివేకానే ఈ లేఖ రాసినట్లు నిర్ధారించుకుంది. అయితే ఈ లేఖను వివేకా అల్లుడు దాచిపెట్టారని తేలడంతో వైఎస్ అవినాష్ రెడ్డి ఇప్పుడు అదే అంశాన్ని హైలెట్ చేస్తూ సీబీఐని ఇరుకునపెట్టేందుకు ప్రయత్నిస్తున్నారు. దీంతో ఈ లేఖపై ఎవరెవరి వేలిముద్రలు ఉన్నాయో తేలిస్తే అసలు నిందితులు బయటికొస్తారని సీబీఐ భావిస్తోంది.

English summary

hyderabad cbi court on today given permission to cbi for ninhydrin test to late ys vivekananda reddy's alleged letter.