కెసిఆర్‌తో మాట్లాడారా: టీ నేతలతో డిగ్గీ (పిక్చర్స్)

By Pratap

Published: Thursday, March 13, 2014, 18:09 [IST]

హైదరాబాద్: తెలంగాణ రాష్ట్ర సమితి (తెరాస)తో పొత్తు విషయంపై తెలంగాణ కాంగ్రెస్ నేతలతో రాష్ట్ర వ్యవహారాల ఇంచార్జి దిగ్వియ్‌ సింగ్ చర్చలు జరిపారు. తెరాస అధ్యక్షుడు కె. చంద్రశేఖర రావుతో మీరెవరైనా మాట్లాడారా ఆయన తెలంగాణ నేతలను ప్రశ్నించారు. మీ ఆదేశాలు లేనిది ఎలా మాట్లాడగలమని తెలంగాణ నేతలు సమాధానం చెప్పినట్లు తెలుస్తోంది. దీంతో పొత్తులపై కొంత సమయం వేచి చూద్దామని తెలంగాణ కాంగ్రెస్ నేతలతో దిగ్విజయ్ అన్నట్లు సమాచారం.

కాగా, తెలంగాణ కాంగ్రెస్ ఎన్నికల కమిటీ సమావేశం గాంధీభవన్ గురువారం సాయంత్రం ప్రారంభమైంది. రాష్ట్ర వ్యవహరాల ఇన్‌చార్జి దిగ్విజయ్ సింగ్, తెలంగాణ పిసిసి చీఫ్ పొన్నాల, వర్కింగ్ కమిటీ అధ్యక్షుడు ఉత్తమ్ కుమార్ రెడ్డి, పలువురు నేతలు ఈ సమావేశంలో పాల్గొన్నారు. శాసనసభ, లోక్‌సభ అభ్యర్థులపై కసరత్తు చేసినట్లు తెలుస్తోంది.

హైదరాబాద్ నగరానికి వచ్చిన రాష్ట్ర వ్యవహరాల ఇంచార్జి దిగ్విజయ్ సింగ్‌తో కాంగ్రెస్ నేతలు గురువారం ఉదయం పార్క్ హయత్ హోటల్‌లో సమావేశమయ్యారు. తెలంగాణ పిసిసి చీఫ్ పొన్నాల, ఆంధ్రప్రదేశ్ పిసిసి చీఫ్ రఘువీరా, తెలంగాణ వర్కింగ్ కమిటీ ప్రెసిడెంట్ ఉత్తమ్‌కుమార్ రెడ్డి, ప్రచార కమిటీ చైర్మన్ దామోదర రాజనర్సింహ, షబ్బీర్ అలీ సమావేశమైన వారిలో ఉన్నారు.

అంతకు ముందు దిగ్విజయ్ మీడియాతో మాట్లాడారు. ఇవాళ, రేపు ఎన్నికల కమిటీతో సమావేశం కానున్నామని, మూడు రోజుల పాటు అభ్యర్థుల ఎంపికపై కసరత్తు జరుపనున్నట్లు తెలిపారు. తుది జాబితాను సిద్ధం చేసి స్టీరింగ్ కమిటీ ముందు ఉంచనున్నట్లు చెప్పారు. ఈనెల 24, 25 తేదీల్లో అభ్యర్థుల జాబితాను ప్రకటిస్తామని దిగ్విజయ్ వెల్లడించారు.

నగరానికి చేరుకున్న దిగ్విజయ్ సింగ్‌కు శంషాబాద్ విమానాశ్రయంలో దిగ్విజయ్‌కు ఇరు ప్రాంతాల పిసిసి అధ్యక్షులు పొన్నాల, రఘువీరా, తెలంగాణ వర్కింగ్ కమిటీ ప్రెసిడెంట్ ఉత్తమ్‌కుమార్, మాజీ మంత్రి దానం నాగేందర్ స్వాగతం పలికారు.