అల్పపీడనం దెబ్బకు ఏపీ అతలాకుతలం: తిరుపతిలో భారీ వర్షం: మరో 4 రోజులు

Heavy rains: బంగాళాఖాతంలో తీవ్ర అల్పపీడన పరిస్థితులు కొనసాగుతున్నాయి. రాష్ట్రవ్యాప్తంగా ఓ మోస్తరు నుంచి భారీ వర్షాలు దంచికొడుతున్నాయి. ఉత్తరాంధ్ర నుంచి రాయలసీమ వరకూ పలుచోట్ల వర్షాలు కురిశాయి. ప్రత్యేకించి- గుంటూరు, ఎన్టీఆర్, ప్రకాశం జిల్లాల్లో కుండపోతగా వర్షం కురిసింది. అటు విజయనగరం, శ్రీకాకుళం, అల్లూరి సీతారామరాజు, పార్వతీపురం మన్యం జిల్లాల్లో ఓ మోస్తరు వర్షాలు పడ్డాయి.

బంగాళాఖాతం వాయవ్య ప్రాంతంలో ఏర్పడిన ఉపరితల ఆవర్తన ప్రభావంతో మరో నాలుగు రోజుల పాటు ఈ భారీ వర్షాలు కొనసాగే అవకాశం ఉంది. దక్షిణ కోస్తా, రాయలసీమలో విస్తృతంగా పిడుగులతో కూడిన తేలికపాటి నుంచి మోస్తరు వర్షాలు పడొచ్చు. నేడు ప్రకాశం, నెల్లూరు, కర్నూలు, అనంతపురం జిల్లాల్లో అక్కడక్కడ పిడుగులతో కూడిన మోస్తరు-భారీ వర్షాలు కురుస్తాయి.

అలాగే- అంబేద్కర్ కోనసీమ, తూర్పు గోదావరి, పశ్చిమ గోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, నంద్యాల, శ్రీసత్యసాయి, కడప, అన్నమయ్య, చిత్తూరు, తిరుపతి జిల్లాల్లో అక్కడక్కడ తేలికపాటి నుంచి ఓ మోస్తారు వర్షాలకు అవకాశం ఉందని విపత్తుల నిర్వహణ సంస్థ మేనేజింగ్ డైరెక్టర్ ప్రఖర్ జైన్ తెలిపారు. పిడుగులతో కూడిన వర్షాలు పడే అవకాశం ఉన్నందున ప్రజలు అప్రమత్తంగా ఉండాల, ఆ సమయంలో బహిరంగ ప్రదేశాలు, చెట్ల కింద నిలబడరాదని సూచించారు.

గురువారం సాయంత్రం 5 గంటల సమయానికి తిరుపతి జిల్లా మల్లంలో అత్యధిక వర్షపాతం నమోదైంది. ఇక్కడ 70 మిల్లీ మీటర్ల వర్షం కురిసింది. కాకినాడ జిల్లా ఇంజరం- 58, తిరుపతి జిల్లా కోట- 52.7, ప్రకాశం జిల్లా గొల్లవిడిపి- 52.2, యర్రగొండపాలెం- 49.7, చిత్తూరు జిల్లా దామోదర మహారాజపురం- 49, అంబేద్కర్ కోనసీమ జిల్లా ఈతకోటలో 47 మిల్లీ మీటర్ల వర్షపాతం నమోదైంది.

English summary

Heavy downpour lashes out several parts of the Andhra Pradesh including Tirupati and Chittoor. APSDMA predicts that the State likely to get Moderate to heavy downpour in the several parts of the State on September 19.