మృగశిర కార్తె రోజు చేపలు తినటం వెనుక కారణమిదే!!

నేటి నుంచి మృగశిర కార్తె ప్రారంభమైంది. వర్షాకాలానికి నాంది పలికే మృగశిర కార్తె నాడు చాలా మంది కచ్చితంగా చేపలు తింటారు. ఈరోజు చేపలు తినడం వల్ల ఆరోగ్యంగా ఉంటామని నమ్ముతారు. జూన్ మొదటి వారంలో మృగశిర కార్తె వస్తుంది. మృగశిర కార్తె రోజు వ్యవసాయ పనులకు శ్రీకారం చుడతారు.

మృగశిర కార్తెలో తొలకరి జల్లులు కురవడంతో కాస్త ఎండ తాపం నుంచి ఉపశమనం పొందుతారు. సూర్యుడు మృగశిర నక్షత్రంలో ప్రవేశించిన నాటి నుంచి నైరుతి రుతుపవనాలు వచ్చి వాతావరణం చల్లబడి ప్రకృతి లో అనేక మార్పులు చోటు చేసుకుంటాయి. ఇక వాతావరణంలో మార్పులకు, మృగశిర కార్తె నాడు చేపలు తినడానికి సంబంధం ఉందని చెబుతారు.

మృగశిర కార్తె నాడు చేపలు తినడం మన పూర్వీకుల నుంచి అనాదిగా వస్తున్న ఆచారం. అయితే ఈ విధంగా మృగశిర కార్తె నాడు చేపలు తినడం వల్ల ఆస్తమా, గుండె జబ్బుల రోగులకు ఉపశమనం దొరుకుతుందని నమ్ముతారు. వర్షాకాలం ప్రారంభంలో చేపలు తినడం మన శరీరంలో ఇమ్యునిటీని మరింత పెంచి వర్షాకాలంలో వచ్చే వాతావరణ మార్పుల వల్ల కలిగే వ్యాధుల బారిన పడకుండా కాపాడుతుందని చెబుతారు.

వర్షాకాలం సీజన్ ప్రారంభంలో వచ్చే సీజనల్ వ్యాధులు రాకుండా ఉండాలంటే చేపలు తినడం ఒక్కటే మార్గమని భావించిన పూర్వీకులు మృగశిర కార్తె నాడు ఖచ్చితంగా చేపలు తినాలి అన్న దాన్ని ఆనవాయితీగా పెట్టారు. దానిని కొనసాగిస్తూ నేటికి మృగశిర కార్తె రోజు ప్రతి ఇంట్లోనూ ఘుమఘుమలాడే చేపల వంటకాలే దర్శనమిస్తున్నాయి.

కాగా మృగశిర కార్తె ప్రారంభంలోనే ఆస్తమా రోగులకు కావలసిన చేప మందు కూడా బత్తిని సోదరులు పంపిణీ చేస్తారు. ఈ చేప మందు ను తీసుకోవడానికి రాష్ట్రం నుంచే కాకుండా ఇతర రాష్ట్రాల నుంచి కూడా లక్షలాది ప్రజలు తరలి వస్తారు. ఈ సంవత్సరం కూడా చేపమందు పంపిణీకి బత్తిని సోదరులు సిద్ధం కాగా ప్రభుత్వం అన్ని ఏర్పాట్లు చేస్తుంది.

English summary

Eating fish on Mrigasira Karthi is an age-old custom from our ancestors. But eating fish on Mrigasira Karthi in this way is believed to relieve asthma and heart disease patients and boost immunity.