శివలింగం చుట్టూ మూడు నాగుపాములు ప్రదక్షిణ.. నెల్లూరు జిల్లాలో అద్భుతం!
నెల్లూరు జిల్లాలో భక్తులను ఆశ్చర్యపరిచే అద్భుత దృశ్యం కనిపించింది. శ్రీపొట్టి శ్రీరాములు నెల్లూరు జిల్లా మనుబోలు మండలం చెర్లోపల్లి రైల్వే గేట్ సమీపంలోని విశ్వనాథ స్వామి ఆలయంలో శివలింగం చుట్టూ మూడు నాగుపాములు ప్రదక్షిణ చేశాయి. ఈ ఘటన స్థానికులను భక్తి పారవశ్యంలో ముంచేసింది. చుట్టుపక్కల ప్రాంతాల నుంచి భక్తులు ఆలయానికి పోటెత్తేలా చేసింది.
ఈ మూడు నాగుపాములు శివలింగం చుట్టూ కొంతసేపు తిరిగి, తర్వాత సమీపంలోని పుట్టలోకి వెళ్లిపోయాయి. ఆలయ నిర్వాహకులు ఇటీవల CCTV కెమెరాలు ఏర్పాటు చేశారు. ఆ ఫుటేజ్‌లోనూ ఈ దృశ్యం స్పష్టంగా కనిపించింది. గతంలో కూడా ఇదే ఆలయంలో రెండు నాగుపాములు శివలింగం చుట్టూ ప్రదక్షిణ చేసిన సంఘటన జరిగిందని స్థానికులు గుర్తు చేసుకుంటున్నారు. నాగుల చవితి సందర్భంగా కూడా ఇలాంటి దృశ్యాలు ఇక్కడ కనిపించిన చరిత్ర ఉంది.
హిందూ సంప్రదాయంలో నాగుపాములు శివునికి అత్యంత ప్రీతిపాత్రమైనవిగా భావిస్తారు. శివుడు నాగాభరణుడు, నాగేంద్రుడు అని పిలుస్తారు. నాగుపాములు శివలింగం వద్ద కనిపించడం లేదా ప్రదక్షిణ చేయడం దైవిక సంకేతంగా భక్తులు తీసుకుంటున్నారు. ఈ సంఘటన తర్వాత ఆలయంలో ప్రత్యేక పూజలు, అభిషేకాలు జరుగుతున్నాయి. భక్తులు పాలు, పూలు, నువ్వులు సమర్పిస్తూ మొక్కులు చెల్లించుకుంటున్నారు.
మనుబోలు ప్రాంతంలో ఈ ఆలయం చాలా కాలంగా ప్రసిద్ధి చెందింది. రైల్వే గేట్ సమీపంలో ఉండటం వల్ల ప్రయాణికులు కూడా తరచు దర్శనం చేసుకుంటారు. ఈ అద్భుతం తెలిసిన తర్వాత సోషల్ మీడియాలో వీడియోలు వేగంగా వ్యాప్తి చెందాయి. చాలా మంది భక్తులు ఇది శివుని లీల అని, నాగదేవత అనుగ్రహం, ఆ శివయ్యకు నాగబంధం అని వ్యాఖ్యానిస్తున్నారు. ఆలయ అర్చకులు, స్థానికులు ఈ ఘటనను సాధారణం కాదని చెబుతున్నారు.
పాములు ఎవరినీ బాధించకుండా, ప్రశాంతంగా శివలింగం వద్ద ఉండి తిరిగి వెళ్లిపోవడం ప్రతీ ఒక్కరిలో భక్తి భావం నింపుతుంది.. భక్తులు ఆలయ ప్రాంగణంలో గుంపులు గుంపులుగా చేరి దర్శనం చేసుకుంటున్నారు. ఇలాంటి సంఘటనలు భక్తుల్లో ఆధ్యాత్మిక భావనను మరింత పెంచుతాయని స్థానికులు అభిప్రాయపడుతున్నారు. అయితే ఒకేసారి మూడు నాగుపాములు ప్రదక్షిణ చేయడం అరుదైన దృశ్యంగా భక్తులు చూస్తున్నారు. ఈ అద్భుతం భక్తులకు శివుని మహిమను మరోసారి గుర్తు చేస్తోంది.
Click it and Unblock the Notifications
Sign in with Google
