హౌరా-చెన్నై రైల్వే విస్తరణలో నక్కతోక తొక్కిన ఏపీ!

భారతీయ రైల్వే రైల్వే విస్తరణపై దృష్టి సారించింది. పెరుగుతున్న ప్రయాణికుల సంఖ్య, సరకు రవాణా అవసరాలు దృష్ట్యా రైల్వే శాఖ ప్రధాన మార్గాలను విస్తరించే ప్రాజెక్టులు చేపట్టింది. అందులో భాగంగా హౌరా-చెన్నై మార్గాన్ని కూడా విస్తరిస్తోంది. దీంతో ఆంధ్ర ప్రదేశ్ రాష్ట్రం కూడా నక్కతోక తొక్కినట్టు అయ్యింది.

హౌరా-చెన్నై మార్గాన్ని విస్తరించే క్రమంలో ఈ మార్గం ఆంధ్రప్రదేశ్‌లో ఇచ్ఛాపురం నుంచి తడ వరకు 962.50 కి.మీ. ఉంది. దీనివల్ల ప్రయాణికుల రైళ్లు మరిన్ని నడపవచ్చు. సరకు రవాణా రైళ్లు మధ్యలో అనేక చోట్ల నిలపకుండా నిరంతరాయంగా జరగవచ్చని భావిస్తున్నారు. ఈ రైల్వే విస్తరణ మార్గం 962.50 కి.మీ.లో దక్షిణ కోస్తా రైల్వే జోన్ విశాఖపట్నం పరిధిలో 897.68 కి.మీ., సదరన్ రైల్వే జోన్ చెన్నై పరిధిలో 64.83 కి.మీ. ఉంది.

గతంలో కేవలం రెండు లైన్లతో నడుస్తున్న ఈ మార్గంలో ఇప్పటికే 16.76 కి.మీ. నాలుగు లైన్లుగా విస్తరించారు. 337.36 కి.మీ.లో మూడో లైన్ నిర్మాణం పూర్తయింది. మిగిలిన 608.38 కి.మీ.లో మూడు, నాలుగు లైన్లు నిర్మించనున్నారు. ఇక ప్రస్తుతం ఇచ్ఛాపురం-విజయనగరం మధ్య 191.98 కి.మీ.లో మూడో లైన్ పనులు సాగుతున్నాయి. నాలుగో లైన్‌కు డీపీఆర్ తయారు చేయనున్నారు.

విజయనగరం-కొత్తవలస మధ్య 34.60 కి.మీ. మొత్తం మూడు లైన్లుగా విస్తరించారు. నాలుగో లైన్ పనులు కొనసాగుతున్నాయి. కొత్తవలస నుంచి విశాఖలోని సింహాచలం వరకు 16.76 కి.మీ.లో ఇప్పటికే నాలుగు లైన్లు పూర్తయ్యాయి. సింహాచలం-విశాఖపట్నం-దువ్వాడ మధ్య 26.43 కి.మీ.లో ప్రస్తుతం రెండు లైన్లు ఉండగా మూడు, నాలుగు లైన్ల పనులు జరుగుతున్నాయి. దువ్వాడ-నిడదవోలు మధ్య 205.68 కి.మీ.లో మూడు, నాలుగు లైన్ల పనులు మంజూరయ్యాయి.

నిడదవోలు-విజయవాడ మధ్య 127.02 కి.మీ.కు డీపీఆర్ సిద్ధం చేస్తున్నారు. విజయవాడ-నెల్లూరు-గూడూరు మధ్య 292.72 కి.మీ.లో మూడో లైన్ పూర్తయింది. నాలుగో లైన్‌కు డీపీఆర్ తయారు చేయాలి. గూడూరు-తడ మధ్య 67.31 కి.మీ.లో మూడు, నాలుగు లైన్ల ప్రాజెక్టు మంజూరైంది. దువ్వాడ-నిడదవోలు విభాగంలో రూ.9,889 కోట్లతో ప్రాజెక్టు మంజూరైంది. ఇందులో బైపాస్‌లు, గోదావరిపై 4.3 కి.మీ. కొత్త వంతెన నిర్మాణం ఉన్నాయి.

ధవళేశ్వరం బ్యారేజీకి, రోడ్-రైల్ వంతెనకు మధ్యలో ఈ కొత్త వంతెన వస్తుంది. తాడి వద్ద నుంచి అనకాపల్లి-ఎలమంచిలి మధ్య, తుని-అన్నవరం స్టేషన్లు టచ్ కాకుండా, కడియం నుంచి చాగల్లు వరకు బైపాస్‌లు నిర్మిస్తారు.ఈ విస్తరణ పూర్తయితే హౌరా-చెన్నై మార్గంలో రైళ్లు వేగంగా, సులభంగా నడుస్తాయి. ప్రయాణికులకు, సరకు రవాణాదారులకు భారీ ఉపశమనం లభిస్తుంది.

English summary

railway news: Indian Railways is expanding the Howrah-Chennai main line into four tracks from Ichchapuram to Tada covering 962 km in Andhra Pradesh. Third and fourth lines are under construction or planned to ease congestion and speed up trains.