RRB Exam 2026: విజయవాడ-పలాస మధ్య ప్రత్యేక రైళ్లు- తేదీలు, హాల్ట్ లు ఇవే..!

ఈ ఏడాది ఆగస్టు నెలలో రైల్వే రిక్రూట్ మెంట్ బోర్టు నిర్వహించే పరీక్షల (RRB Exam 2026) కోసం దక్షిణ కోస్తా రైల్వే జన్ సాధారణ్ ప్రత్యేక రైళ్లను (Janasadharan Special trains) ప్రకటించింది. విజయవాడ నుంచి పలాస మధ్య ఈ ప్రత్యేక రైళ్లు రాకపోకలు సాగిస్తాయి. వీటికి సంబంధించిన షెడ్యూల్, స్టాప్ ల, ఇతర వివరాలను దక్షిణ కోస్తా రైల్వే ఇవాళ విడుదల చేసింది. కాబట్టి ఈసారి రైల్వే పరీక్షలు రాస్తున్న అభ్యర్ధులు వీటిని గమనించి సద్వినియోగం చేసుకోవాలని అధికారులు కోరుతున్నారు.

ఈ నెల 2 వ తేదీ నుంచి 6వ తేదీ వరకూ విజయవాడ- పలాస మధ్య ప్రత్యేక రైళ్లు రాకపోకలు సాగిస్తాయి. ఇవన్నీ అన్ రిజర్వుడు రైళ్లే. వీటిలో ఎలాంటి రిజర్వేషన్ ఉండదు. నేరుగా టికెట్ తీసుకుని ప్రయాణించవచ్చు. ముందుగా పలాస నుంచి విజయవాడకు ఈ నెల 2వ తేదీ నుంచి 5వ తేదీ వరకూ రోజుకు నాలుగు ట్రిప్పుల చొప్పున ప్రత్యేక రైళ్లు (నంబర్ 07067)అందుబాటులో ఉంటాయి. అలాగే విజయవాడ నుంచి పలాసకు ఈ నెల 3వ తేదీ నుంచి 6వ తేదీ వరకూ మరో నాలుగు రైళ్లు (నంబర్ 07068) ఇలాగే రోజుకు నాలుగు ట్రిప్పుల చొప్పున అందుబాటులో ఉంటాయి.

ఈ రైళ్లు ఆయా తేదీల్లో పలాస నుంచి మధ్యాహ్నం 2 గంటలకు బయలుదేరి శ్రీకాకుళం రోడ్డు, విజయనగరం, సింహాచలం, విశాఖపట్నం, దువ్వాడ, తుని, సామర్లకోట, రాజమండ్రి, ఏలూరు మీదుగా విజయవాడకు అర్ధరాత్రి 1 గంటకు చేరుకుంటాయి. అలాగే విజయవాడ నుంచి సాయంత్రం 4.30కు బయలుదేరే ఈ ప్రత్యేక రైళ్లు ఇవే స్టేషన్ల మీదుగా మరుసటి రోజు తెల్లవారుజామున 4.30కు పలాస చేరుకుంటాయి. ఇందులో ప్రతీ రైలు లోనూ 10 జనరల్, రెండు స్లీపర్ క్లాస్ తో కూడిన మొత్తం 12 బోగీలు అందుబాటులో ఉంటాయని అధికారులు తెలిపారు.