తెలుగురాష్ట్రాల్లో విస్తరిస్తున్న రుతుపవనాలు-క్రమంగా వర్షాలు మొదలు..

ఏపీ, తెలంగాణలకు హైదరాబాద్ వాతావరణ కేంద్రం గుడ్ న్యూస్ చెప్పింది. భారత వాతావరణ శాఖ అంచనాల మేరకు తెలుగు రాష్ట్రాల్లో వర్షాలు మొదలుకాబోతున్నట్లు హైదరాబాద్ వాతావరణ విభాగం వెల్లడించింది. ఈ మేరకు తెలుగు రాష్ట్రాల్లోని పలు ప్రాంతాలపై రుతుపవనాలు విస్తరిస్తున్నట్లు ఇవాళ వెల్లడించింది. వీటి ప్రభావంతో ఇరు రాష్ట్రాల్లోనూ రేపటి నుంచి వర్షాలు కురిసే అవకాశం ఉన్నట్లు అంచనా వేస్తోంది.

రాబోయే రెండు, మూడు రోజుల్లో దక్షిణ భారతంలోని పలు ప్రాంతాలపై రుతుపవనాలు విస్తరించే అవకాశాలు మెండుగా ఉన్నట్లు హైదరాబాద్ వాతావరణ కేంద్రం అంచనా వేస్తోంది. ఏపీలో ఇప్పటికే ప్రవేశించిన రుతుపవనాలు ఇవాళ మరిన్ని ప్రాంతాలకు విస్తరిస్తున్నట్లు తెలిపింది. తమిళనాడు మీదుగా రాయలసీమలోని పలు ప్రాంతాలపై విస్తరిస్తున్న రుతుపవనాలు.. దక్షిణ కోస్తాకు విస్తరిస్తున్నాయి. ఇవి రాగల రెండు, ముూడు రోజుల్లో ఉత్తర కోస్తా వరకూ చేరుకునే అవకాశముంది.

వీటి ప్రభావంతో ఇప్పటికే రాయలసీమ, దక్షిణ కోస్తా జిల్లాల్లో అక్కడక్కడా వర్షాలు మొదలయ్యాయి. అయితే భారీ వర్షాలు కాకపోయినా ఓ మోస్తరు వర్షాలు, చిరుజల్లులు కురుస్తున్నాయి. ఇవి రాబోయే రెండు, మూడు రోజుల్లో మరింతగా విస్తరించి భారీ వర్షాల వరకూ వెళ్లే అవకాశాలున్నట్లు ఐఎండీ అంచనా వేస్తోంది. అలాగే తెలంగాణలోని పలు జిల్లాలపై రుతుపవనాలు విస్తరిస్తున్నట్లు అంచనా వేస్తున్నారు.

తెలంగాణలోని ఆదిలాబాద్, కుమ్రం భీం, మంచిర్యాల, కరీంనగర్, పెద్దపల్లి, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్ ప్రాంతాల్లో రుతుపవనాలు విస్తరిస్తున్నట్లు హైదరాబాద్ వాతావరణ కేంద్రం నిర్ధారించింది. వీటి ప్రభావంతో ఆయా జిల్లాల్లో వచ్చే మూడు రోజుల్లో వర్షాలు కురిసే అవకాశమున్నట్లు ఇవాళ వెల్లడించింది. దీంతో ఎండ వేడమితో అల్లాడుతున్న ఆయ జిల్లాలకు ఊరట లభించే అవకాశముంది.

English summary

imd predicts rains in telugu states in next few days as monsoon winds expanded gradually.