జనసేన నేత చెంపలు వాయించేసిన మహిళా ఎస్సై- షాకింగ్ వీడియో..!

Published: Wednesday, July 12, 2023, 16:34 [IST]

ఏపీలోని తిరుపతి జిల్లా శ్రీకాళహస్తిలో ఇవాళ అనూహ్య ఘటన చోటుచేసుకుంది. వాలంటీర్లపై పవన్ కళ్యాణ్ వ్యాఖ్యల్ని నిరసిస్తూ వైసీపీ నేతలు ఎక్కడికక్కడ ఆందోళనలు నిర్వహిస్తున్నారు. పలు చోట్ల వాలంటీర్లతో కలిసి వైసీపీ నేతలు ఆందోళనలు చేస్తున్నారు. దీంతో వైసీపీ నేతలకు వ్యతిరేకంగా జనసేన నేతలు కూడా పోటీ నిరసనలకు దిగుతున్నారు. ఈ క్రమంలో శ్రీకాళహస్తిలో శాంతియుతంగా నిరసన చేస్తున్న జనసేన నేతపై స్ధానిక మహిళా సీఐ చేయిచేసుకున్నారు.

శ్రీకాళహస్తి స్వామి మండపం సమీపంలో జనసేన నేతలు ముఖ్యమంత్రి దిష్టి బొమ్మ తగులబెట్టేందుకు ప్రయత్నం చేశారు.వారిని అడ్డుకున్న పోలీసులు పోలీస్ స్టేషన్ కు తరలించారు. అనంతరం జనసేన నేతలపై మహిళా సీఐ అంజూ యాదవ్ విరుచుకుపడ్డారు. ఈ క్రమంలో జనసేన స్ధానిక నేత ఒకరిపై మహిళా సీఐ చేయిచేసుకున్నారు. స్టేషన్ బయట నిరసన చేస్తున్న జనసేన నేతపై వచ్చీ రాగానే చేయి చేసుకుని చెంపలు వాయించేశారు. మహిళా సీఐ రెండు చేతులతో చెంపలు వాయించేస్తుంటే ఆశ్చర్యపోవడం నేతల వంతయింది. మహిళా సీఐ అంజూ యాదవ్ తీరుపై జనసేన నేతలు మండిపడ్డారు.

శాంతియుతంగా నిరసన చేపట్టిన తమ పార్టీ నాయకుడిపై మహిళా సీఐ బహిరంగంగా దాడికి దిగడంపై జనసేన నేతలు మండిపడుతున్నారు. మహిళా సీఐ తీరుపై ఆగ్రహం వ్యక్తం చేస్తూ జనసేన నేత నాదెండ్ల మనోహర్ డీజీపీ రాజేంద్రనాథ్ రెడ్డికి ట్వీట్ చేశారు. శ్రీకాళహస్తిలో ఈ రోజు ప్రశాంతంగా నిరసన తెలియచేస్తున్న జనసేన నాయకుడిపై అమానుషంగా వ్యవహరించిన పోలీసు అధికారిణి వ్యవహార శైలిని అందరూ ఖండించాలని నాదెండ్ల ఇందులో కోరారు. వైసీపీ ప్రాయోజిత నిరసనలకు బందోబస్తు చేస్తూ మానవ హక్కుల గురించి మరచిపోయారా? సదరు అధికారిణిపై చర్యలు తీసుకోవాలని డిమాండ్ చేశారు.

శ్రీకాళహస్తిలో ఈ రోజు ప్రశాంతంగా నిరసన తెలియచేస్తున్న జనసేన నాయకుడిపై అమానుషంగా వ్యవహరించిన పోలీసు అధికారిణి వ్యవహార శైలిని అందరూ ఖండించాలి. వైసీపీ ప్రాయోజిత నిరసనలకు బందోబస్తు చేస్తూ మానవ హక్కుల గురించి మరచిపోయారా? సదరు అధికారిణిపై చర్యలు తీసుకోవాలి@dgpapofficial @APPOLICE100 pic.twitter.com/7UmybfXSTB
— Manohar Nadendla (@mnadendla) July 12, 2023

ఇవాళ జనసేన నేతపై దాడికి దిగిన మహిళా సిఐ అంజూయాదవ్ తీరుపై గతంలోనూ పలు విమర్శలు వచ్చాయి. గతంలో టీడీపీ నేత ఒకరిని ఇలాగే చెంపపై కొట్టిన అంజూ.. ఇవాళ జనసేన నేతపై రెచ్చిపోయారు. దీంతో సదరు మహిళా సీఐ అంజూ యాదవ్ తీరుపై విమర్శలు వెల్లువెత్తుతున్నాయి. గతంలోనూ ఆమె వ్యవహారశైలి ఇలాగే ఉండేదని, ఇవాళ అకారణంగా చేయి చేసుకున్న సీఐపై అధికారులు చర్యలు తీసుకోవాలని జనసేన నేతలు డిమాండ్ చేస్తున్నారు.

Published On July 12, 2023