Tdp Janasena Manifesto: టీడీపీ-జనసేన మ్యానిఫెస్టో రెడీ-విడుదలకు ముహుర్తం ఇదే..!

ఏపీలో వైసీపీకి వ్యతిరేక ఓట్లు చీలకుండా చూసేందుకు జట్టు కట్టిన విపక్ష టీడీపీ, జనసేన పార్టీలు ఇప్పటికే ఉమ్మడి సభలతో జనంలోకి వెళ్తున్నాయి. ఈ మధ్యే మంగళగిరిలో ఉమ్మడిగా బీసీ డిక్లరేషన్ కూడా విడుదల చేశాయి. ఇప్పుడు ఉమ్మడి మ్యానిఫెస్టో విడుదలకు ఇరు పార్టీలు సిద్ధమవుతున్నాయి. ఇందులో భాగంగా ఈ నెల 17న చిలకలూరిపేటలో జరిగే టీడీపీ, జనసేన సభలో ఉమ్మడి మ్యానిఫెస్టో విడుదల చేయబోతున్నాయి.

చిలకలూరి పేట సభలో ఈ నెల 17న ఉమ్మడి మ్యానిఫెస్టో విడుదల చేయనున్నట్లు టీడీపీ, జనసేన నేతలు అచ్చెన్నాయుడు, నాదెండ్ల మనోహర్ ప్రకటించారు. ఐదేళ్లలో రాష్ట్ర ప్రజలు అనేక ఇబ్బందులు పడ్డారని అచ్చెన్నాయుడు తెలిపారు. రాష్ట్ర భవిష్యత్తు కోసమే టీడీపీ-జనసేన పొత్తు అన్నారు. అభ్యర్థుల ప్రకటన తర్వాత రెండు పార్టీల మధ్య తగాదాలు పెట్టాలని వైసీపీ ప్రయత్నించిందని ఆయన ఆరోపించారు.

చిలకలూరిపేటలో జరిగే సభలో ఉమ్మడి మేనిఫెస్టో తో పాటు భవిష్యత్ ప్రణాళికను విడుదల చేస్తామని అచ్చెన్నాయుడు తెలిపారు. చరిత్ర సృష్టించేలా 10 లక్షల మందితో సభ నిర్వహిస్తామన్నారు. ఈ సభకు ఆర్టీసీ ఎండీ బస్సులు ఇవ్వకుంటే భవిష్యత్తులో తగిన మూల్యం చెల్లించాల్సి ఉంటుందని హెచ్చరించారు. అలాగే నిన్న రాత్రి మంగళగిరిలో జనసైనికుల ఇళ్లపై పోలీసుల దాడి దారుణమని అచ్చెన్న తెలిపారు. పోలీసుల తీరుపై అవసరం అయితే న్యాయపరంగా ముందుకెళ్తామన్నారు. టీడీపీ-జనసేన సోషల్ మీడియా కార్యకర్తలను పోలీసులు బెదిరిస్తే 7306299999 కాల్ సెంటర్ కు ఫోన్ చేయవచ్చన్నారు.

జనసేన నేత నాదెండ్ల మనోహర్ మాట్లాడుతూ.. చిలకలూరిపేట సభ లో అందరూ భాగస్వామ్యం కావాలని కోరారు. వివిధ స్థాయిల్లో కమిటీలు ఏర్పాటు చేసి సభను విజయవంతం చేస్తామన్నారు. సూపర్ 6 నినాదం తో అభివృద్ధి లక్ష్యం తో ముందుకెళ్తున్నామని మనోహర్ వెల్లడించారు. పవన్ కళ్యాణ్ భద్రతా సిబ్బంది,జనసెన టీం లను పోలీసులు భయబ్రాంతులకు గురిచేస్తున్నారన్నారు. ప్రతిపక్షాలను భయపెట్టాలని ప్రయత్నం చేస్తే విఫలం అవుతుందన్నారు.

English summary

tdp, janasena parties are to release their joint poll manifesto on march 17 in chilakaluripeta.