తిరుమల శ్రీవారి భక్తులకు శుభవార్త.. దర్శనం,వసతి, శ్రీవారిసేవ అక్టోబర్ కోటా.. సిద్ధమవ్వండి!!

కలియుగ ప్రత్యక్ష దైవం ఏడుకొండల పైన కొలువుతీరిన వెంకటేశ్వర స్వామి భక్తులకు టీటీడీ శుభవార్త చెప్పింది. తిరుమల శ్రీవారి ఆర్జిత సేవ టికెట్లకు సంబంధించిన అక్టోబర్ నెల కోటాను విడుదల చేయనున్నట్టు వెల్లడించింది. తిరుమ‌ల శ్రీ‌వారి ఆర్జిత సేవా టికెట్లకు సంబంధించిన అక్టోబ‌ర్‌ నెల కోటాను జూలై 19న ఉదయం 10 గంట‌ల‌కు ఆన్‌లైన్‌లో విడుదల చేయ‌నున్నట్లు టిటిడి ఈరోజు ఒక ప్రకటనలో తెలిపింది.

శ్రీ‌వారి ఆర్జిత సేవా టికెట్లకు సంబంధించి కీలక ప్రకటన
శ్రీ‌వారి ఆర్జిత సేవా టికెట్లకు సంబంధించి ఈ సేవా టికెట్ల ఎలక్ట్రానిక్ డిప్ కోసం జూలై 21వ తేదీ ఉదయం 10 గంటల వరకు ఆన్‌లైన్‌లో నమోదు చేసుకోవచ్చునని పేర్కొంది. ఈ టికెట్లు పొందిన వారు జూలై 21 నుండి 23వ తేదీ మధ్యాహ్నం 12 గంటల లోపు సొమ్ము చెల్లించిన వారికి లక్కీడిప్‌లో టికెట్లు మంజూరవుతాయని టీటీడీ వెల్లడించింది.

కల్యాణోత్సవం, శ్రీవాణి ట్రస్టు టికెట్లు అప్పుడే
కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవ, వార్షిక పుష్ప‌యాగం టికెట్లను జూలై 22న ఉదయం 10 గంటలకు, అదేరోజు మధ్యాహ్నం 3గంటలకు వర్చువల్ సేవలు, వాటి దర్శన స్లాట్లకు సంబంధించిన కోటా విడుదల చేయనుంది. 23వతేదీ ఉదయం 10గంటలకు అంగప్రదక్షిణం టోకెన్ల కోటా, 11గంటలకు శ్రీవాణి ట్రస్టు టికెట్లు, 23వతేదీ మధ్యాహ్నం 3గంటలకు ఇవ్వనుందని టీటీడీ తెలిపింది.

గదుల కోటా అప్పుడే
వ‌యోవృద్ధులు, దివ్యాంగులు, దీర్ఘ‌కాలిక వ్యాధులున్న‌వారికి ఉచిత‌ ప్ర‌త్యేక ద‌ర్శ‌న టోకెన్లు ఇవ్వనున్నట్టు టీటీడీ పేర్కొంది. 24వతేదీ ఉదయం 10గంటలకు ప్రత్యేక ప్రవేశ దర్శన టికెట్ల కోటా, అదేరోజు మధ్యాహ్నం 3గంటలకు తిరుమల, తిరుపతిల‌లో గదుల కోటాను ఆన్‌లైన్‌లో విడుదల చేయనున్నట్లు టిటిడి ఆ ప్రకటనలో తెలిపింది. ఈ విషయాన్ని గమనించి భక్తులు ttdevasthanams.ap.gov.in వెబ్‌సైట్ ద్వారా శ్రీ‌వారి ఆర్జిత‌సేవ‌లు, ద‌ర్శ‌న టికెట్లు బుక్ చేసుకోవాల‌ని టిటిడి ఆ ప్రకటనలో కోరింది.

భక్తులకు శ్రీవారి దర్శనం సులభంగా అయ్యేలా టీటీడీ చర్యలు
ఇదిలా ఉంటే టీటీడీ తిరుమల శ్రీవారి దర్శనానికి వచ్చే భక్తులకు సౌకర్యాలను మెరుగుపరచటానికి కీలక చర్యలు తీసుకుంటుంది. ఎక్కడా భక్తులకు ఇబ్బంది కలుగకుండా, దర్శనం సునాయాసంగా చేసుకునేలా పక్కా ప్రణాళికతో ఏర్పాట్లు చేస్తుంది. దర్శనం టిక్కెట్ల బుకింగ్, వసతి, మరియు భక్తులకు అవసరమైన ఇతర సౌకర్యాల పైన కూడా ఎప్పటికప్పుడు భక్తులకు అప్డేట్ ఇస్తుంది.

English summary

TTD announce darshan and Arjitha seva tickets release dates for the month of october. here is the details.