త్వరలో వివేకా హత్యపై ఛార్జిషీట్-సీబీఐ కోర్టుకు వెల్లడించిన సీబీఐ ! సుప్రీం ఆదేశాల ఎఫెక్ట్ ?

ఏపీలో తీవ్ర సంచలనం రేపిన మాజీ మంత్రి వైఎస్ వివేకానందరెడ్డి హత్య కేసులో సీబీఐ ఛార్జిషీట్ దాఖలుకు సిద్దమవుతోంది. తాజాగా సుప్రీంకోర్టు ఆదేశాలతో ఈ కేసు దర్యాప్తు చేస్తున్న సిట్ మారింది. దీంతో కొత్త సిట్ త్వరలో ఈ కేసును కొలిక్కి తీసుకొచ్చి అభియోగపత్రం దాఖలు చేసేందుకు సిద్ధమవుతోంది. ఈ మేరకు హైదరాబాద్ సీబీఐ కోర్టుకు సమాచారం ఇచ్చినట్లు తెలుస్తోంది.

వైఎస్ వివేకానందరెడ్డి హత్య కేసులో సీబీఐ కోర్టులో ఇవాళ మరోసారి విచారణ జరిగింది. ఈ విచారణకు సీబీఐ నలుగురు నిందితుల్ని హాజరుపర్చింది. ఇందులో దేవిరెడ్డి శివశంకర్ రెడ్డి, ఎర్ర గంగిరెడ్డి, సునీల్ యాదవ్, ఉమాశంకర్ యాదవ్ ను ఉన్నారు. అదే సమయంలో తాజా పరిస్ధితిపై సీబీఐ మెమో కూడా దాఖలు చేసింది. ఇందులో సుప్రీంకోర్టు ఆదేశాల మేరకు మారిన సిట్ ఈ కేసును దర్యాప్తు చేయబోతున్నట్లు వెల్లడించింది.

ఇవాళ సీబీఐ కోర్టులో విచారణ సందర్భంగా సీబీఐ స్పెషల్ పీపీ ఈ మెమోను దాఖలు చేశారు. అనంతరం స్పెషల్ పీపీకి ఈ కేసు విచారణలో సహకరించేందుకు సిద్ధంగా ఉన్నట్లు వివేకా కుమార్తె సునీతారెడ్డి తరఫు న్యాయవాది వెల్లడించారు. దీంతో తదుపరి విచారణను సీబీఐ కోర్టు.. వచ్చే నెల 28కి వాయిదా వేసింది. సుప్రీంకోర్టు ఆదేశాల మేరకు ఈ కేసు దర్యాప్తును వచ్చే నెల 30లోపు సీబీఐ పూర్తి చేయాల్సి ఉంది. దీంతో రాబోయే నెల రోజుల్లో కీలక పరిణామాలు చోటు చేసుకునే అవకాశం ఉన్నట్లు అంచనా వేస్తున్నారు. మరోవైపు తాజాగా హైకోర్టులో ముందస్తు బెయిల్ పిటిషన్ వేసిన కడప ఎంపీ అవినాష్ రెడ్డి దాన్ని ఆ తర్వాత వెనక్కి తీసుకోవడం చర్చనీయాంశమవుతోంది.

English summary

cbi on today informed the hyderabad cbi court that they will file chargesheet on ys vivekananda reddy murder case soon.