ఉండవల్లి శ్రీదేవికి కార్యకర్తల షాక్: చీరల నుండి చెప్పులవరకు గిఫ్టులన్నీ మావే.. తీసుకెళతాం!!

ఆంధ్రప్రదేశ్ రాజకీయాలలో ఎమ్మెల్యే ఉండవల్లి శ్రీదేవి పై జరుగుతున్నంత రగడ మరే ఇతర ఎమ్మెల్యేల పైన జరగడం లేదంటే అతిశయోక్తి కాదు. క్రాస్ ఓటింగ్ చేసి టీడీపీకి అమ్ముడుపోయారని ఉండవల్లి శ్రీదేవిని టార్గెట్ చేస్తున్న వైసీపీ కార్యకర్తలు సోషల్ మీడియా వేదికగా రచ్చ చేస్తున్నారు. ఉండవల్లి శ్రీదేవి ప్రచార రథాన్ని తామే కొనుగోలు చేసి ఇచ్చామని ఇటీవల ఆమె ప్రచార రథాన్ని కొందరు కార్యకర్తలు తీసుకువెళ్లారు. ఇక తాజాగా ఉండవల్లి శ్రీదేవి ఏ కార్యక్రమానికి వచ్చిన గిఫ్ట్ ఇస్తేనే వచ్చే వారని, శ్రీదేవి ఇంట్లో ఉన్న చాలా గిఫ్టులు కార్యకర్తలు ఇచ్చినవేనని సంచలన ఆరోపణలు చేస్తున్నారు. కచ్చితంగా వాటిని తిరిగి తీసుకువెళ్తామని శ్రీదేవికి షాక్ ఇస్తున్నారు.

ఉండవల్లి శ్రీదేవి ప్రధాన అనుచరుడు అయిన వైసిపి నేత సందీప్ తాజాగా ఉండవల్లి శ్రీదేవి పై మరో సంచలన ఆరోపణలు చేశారు. ఆమె ఎన్నికల ప్రచారం కోసం ప్రచార రథం లేదంటే తానే ప్రచార రథం కొనిచ్చానని పేర్కొన్నారు. ఎమ్మెల్యే శ్రీదేవి పార్టీ ఆఫీస్ లో ఉన్న ఫర్నిచర్ దగ్గర నుండి, ఆమె ఇంట్లో ఉన్న ఫ్రిజ్ వరకు ప్రతి వస్తువు కార్యకర్తలే కొనుగోలు చేశారన్నారు.

ఆమె ఎవరైనా కార్యకర్త ఇంటికి పుట్టినరోజులకు కేక్ కటింగ్ చేయడానికి వస్తే విలువైన బహుమానాలు ఇవ్వాలని కోరేదని, తన ఇంటికి కూడా కేక్ కటింగ్ కి రావాలని కోరితే, మూడు లక్షల విలువ చేసే రింగ్ ఇస్తే కానీ రానన్నారని సందీప్ ఆరోపణలు చేస్తున్నాడు. అందరూ ఎమ్మెల్యేలు కార్యకర్తలకు బహుమానాలు ఇస్తే, తాడికొండ ఎమ్మెల్యేకు మాత్రం మేమే బహుమతులు ఇవ్వాలంటూ ఎద్దేవా చేశారు.

ఆమె కట్టుకున్న చీరల దగ్గర నుండి, చెప్పులు, చెవి కమ్మలు అన్నీ కార్యకర్తల కష్టమేనని, ఆమె ఆఫీసులో, ఆమె ఇంట్లో తమ కొనిచ్చిన ప్రతి వస్తువును తిరిగి తెచ్చుకుంటామని హెచ్చరించారు. వైయస్ జగన్మోహన్ రెడ్డి మీద అవాకులు చెవాకులు పేలితే చూస్తూ ఊరుకోబోమని వార్నింగ్ ఇచ్చారు. భర్తని, కూతురుని ఇప్పుడు మీడియా ముందుకు తీసుకువచ్చి డ్రామాలు చేస్తుందని, ఇప్పుడు కూతురిపై ఎవరైనా కామెంట్ చేస్తే బాధపడుతుందని, రాజకీయాల్లోకి వాళ్లను కూడా లాగాల్సిన అవసరం ఏమిటో చెప్పాలని సందీప్ ప్రశ్నిస్తున్నారు.

English summary

YSRCP Activists are giving shock to Undavalli Sridevi. From sarees to sandals, everything is gifted by activists. They will bring back their gifts from her.