బంగారం ఢమాల్! ధరలు ఎందుకు తగ్గుతున్నాయి?

యుద్ధ మేఘాలు కమ్ముకున్నప్పుడు, తుపాకుల మోత వినిపించినప్పుడు.. ప్రపంచమంతా భయంతో చూసేది 'బంగారం’ వైపు. కానీ ఇప్పుడు సీన్ రివర్స్ అయ్యింది! ఇరాన్‌పై అమెరికా, ఇజ్రాయెల్‌లు విరుచుకుపడుతున్నా.. గల్ఫ్ దేశాల్లో యుద్ధ జ్వాలలు ఎగిసిపడుతున్నా.. అందరి అంచనాలను ముంచేస్తూ బంగారం, వెండి ధరలు అగాధంలోకి పడిపోతున్నాయి. అసలు యుద్ధం జరుగుతుంటే బంగారం ఎందుకు చౌకగా మారుతోంది? ఆర్థిక సూత్రాలకే సవాల్ విసురుతున్న ఈ వింత పరిణామం వెనుక ఉన్న 'ఐదు’ అసలు కారణాలు ఏంటి?

షాకింగ్ గణాంకాలు: పది రోజుల్లోనే పతనం!

ఫిబ్రవరి 28న యుద్ధం మొదలైనప్పుడు ఆకాశాన్నంటుతుందనుకున్న బంగారం, కేవలం పది రోజుల్లోనే 5.7 శాతం మేర పడిపోయి ఇన్వెస్టర్లను విస్మయానికి గురిచేసింది.

• బంగారం: అంతర్జాతీయంగా $5,416 నుండి $5,103కి.. ఇండియాలో ₹1.67 లక్షల నుండి ₹1.60 లక్షల దిగువకు చేరింది.
• వెండి: కిలో వెండి ఏకంగా 9 శాతం క్షీణించి ₹2.63 లక్షల వద్ద ట్రేడ్ అవుతోంది.

Gold ధరలు తగ్గడానికి 5 ప్రధాన కారణాలు:

1. బలపడుతున్న అమెరికా డాలర్:

యుద్ధ మేఘాల వల్ల ముడి చమురు ధరలు పెరిగాయి. చమురు వ్యాపారం అంతా డాలర్లలోనే జరుగుతుంది కాబట్టి, ప్రపంచవ్యాప్తంగా డాలర్‌కు డిమాండ్ పెరిగింది. డాలర్ బలోపేతం కావడంతో పెట్టుబడిదారులు బంగారం కంటే డాలర్ ఆస్తులపైనే ఎక్కువ ఆసక్తి చూపిస్తున్నారు.

2. లాభాల స్వీకరణ (Profit Booking):

గత కొన్ని నెలలుగా బంగారం ధరలు విపరీతంగా పెరిగాయి. యుద్ధం వార్త రాగానే ధరలు పీక్‌కు చేరుతాయని భావించిన ఇన్వెస్టర్లు, తమ వద్ద ఉన్న బంగారాన్ని విక్రయించి లాభాలను వెనక్కి తీసుకుంటున్నారు (Profit Booking). దీనివల్ల మార్కెట్‌లో అమ్మకాల ఒత్తిడి పెరిగి ధరలు తగ్గాయి.

3. బాండ్ దిగుబడులు పెరగడం:

అమెరికాలో వడ్డీ రేట్ల తగ్గింపు ఆలస్యమవుతుందనే అంచనాలు, బాండ్ దిగుబడులు పెరగడం వల్ల బంగారానికి ఆకర్షణ తగ్గింది. వడ్డీ ఇచ్చే బాండ్ల కంటే, వడ్డీ లేని బంగారంపై పెట్టుబడి పెట్టడం భారంగా మారిందని నిపుణులు వివరిస్తున్నారు.

4. చమురు రంగం వైపు నిధుల మళ్లింపు:

యుద్ధం వల్ల చమురు కొరత ఏర్పడవచ్చనే భయంతో, చాలా మంది పెట్టుబడిదారులు తమ నిధులను బంగారం నుండి ముడి చమురు (Crude Oil), రక్షణ రంగ స్టాక్స్‌ (Defense Stocks) వైపు మళ్లించారు.

5. స్టాక్ మార్కెట్ల పతనం:

ఇటీవల సెన్సెక్స్, నిఫ్టీలు భారీగా నష్టపోయాయి. ఈక్విటీ మార్కెట్లలో భారీ నష్టాలు వచ్చినప్పుడు, ఆ నష్టాలను పూడ్చుకోవడానికి లేదా నగదు లభ్యత (Liquidity) కోసం ఇన్వెస్టర్లు తమ వద్ద ఉన్న బంగారాన్ని అమ్ముతుంటారు. ఇది కూడా ధరలు తగ్గడానికి ఒక కారణమైంది.

ప్రస్తుతానికి ఈ యుద్ధం కేవలం పశ్చిమ ఆసియాకే పరిమితం అవుతుందని, ప్రపంచ యుద్ధంలా మారదని మార్కెట్ వర్గాలు నమ్ముతున్నాయి. అందుకే 'పానిక్ బయింగ్' (భయంతో కొనుగోలు చేయడం) కనిపించడం లేదు. అయితే, యుద్ధ పరిస్థితులను బట్టి స్వల్పకాలంలో ఈ ఒత్తిడి కొనసాగే అవకాశం ఉందని విశ్లేషకులు భావిస్తున్నారు.

English summary

Discover why gold and silver prices are falling despite the US-Iran conflict. Analyze 5 key factors including the strong US Dollar, profit booking, and shifting investments to crude oil.