RBI: ఒక్క దెబ్బతో లక్ష కోట్లు! బ్యాంకింగ్ రంగంలో కరెన్సీ సునామీ..
బ్యాంకింగ్ వ్యవస్థలో ఉన్న అదనపు నగదును బయటకు లాగేందుకు రిజర్వ్ బ్యాంక్ ఆఫ్ ఇండియా (RBI) సరికొత్త వ్యూహానికి తెరతీసింది. దశాబ్ద కాలంలో ఎనడూ లేనివిధంగా ఈ ఆర్థిక సంవత్సరంలో ఏకంగా రూ. లక్ష కోట్ల విలువైన ప్రభుత్వ బాండ్లను నికరంగా విక్రయించింది. గతంలో ఎన్నడూ లేనివిధంగా ఆర్బీఐ ఈ స్థాయిలో మార్కెట్లోకి బాండ్లను వదలడం ఆర్థిక వర్గాల్లో చర్చనీయాంశంగా మారింది.
గత కొంతకాలంగా బ్యాంకింగ్ వ్యవస్థలో విపరీతంగా నగదు నిల్వలు పెరిగిపోయాయి. డాలర్ల సమీకరణ కోసం ప్రత్యేక మార్గాలను అనుమతించడంతో ఈ పరిస్థితి తలెత్తింది. పెట్రోల్, డీజిల్ ధరలు పెరుగుతున్న సమయంలో విదేశీ మారకద్రవ్య నిల్వలను కాపాడుకోవడానికి ఈ నిర్ణయం దోహదపడింది. అయితే దీనివల్ల ఓవర్నైట్ వడ్డీ రేట్లు ఆర్బీఐ నిర్దేశిత పాలసీ రేట్ల కంటే పడిపోయాయి. ఈ అనూహ్య పరిణామాన్ని సరిదిద్దేందుకే సెంట్రల్ బ్యాంక్ ఈ భారీ విక్రయాలకు పూనుకుంది.
డీమానిటైజేషన్ నాటి రికార్డు బ్రేక్
ఆర్బీఐ వద్ద ఉన్న 2015 ఆర్థిక సంవత్సరం నాటి డేటా ప్రకారం.. ఇప్పటివరకు ఉన్న రికార్డు 2018 నాటిదే. పెద్ద నోట్ల రద్దు సమయంలో తలెత్తిన పరిణామాలను ఎదుర్కొనేందుకు ఆ సమయంలో రూ. 90,000 కోట్ల విలువైన బాండ్లను సెంట్రల్ బ్యాంక్ విక్రయించింది. సరిగ్గా అదే స్థాయిలో ఇప్పుడు ఏకంగా లక్ష కోట్ల మార్క్ను తాకడం విశేషం. అంతేకాదు, డిసెంబర్ నాటికి ఈ మొత్తం రెట్టింపు అయ్యే అవకాశం ఉందని మార్కెట్ నిపుణులు అంచనా వేస్తున్నారు.
రానున్న రోజుల్లో మరింత కఠినతరమైన చర్యలు?
మార్కెట్ పరిస్థితులు చూస్తుంటే రానున్న కాలంలోనూ ఆర్బీఐ తన జోరు తగ్గించేలా కనిపించడం లేదు. అక్టోబర్, నవంబర్ మాసాల్లోనే మరో రూ. లక్ష నుంచి లక్షన్నర కోట్ల వరకు బాండ్లను విక్రయించే అవకాశం ఉందని ఆనంద్ రాఠీ గ్లోబల్ ఫైనాన్స్ ట్రెజరీ హెడ్ హర్సిమ్రాನ್ సాహ్ని తెలిపారు. మరోవైపు, దీర్ఘకాలిక బాండ్లపై పెట్టుబడులను తగ్గించుకోవడం మంచిదని ఐసీబీసీ ట్రెజరీ హెడ్ అలోక్ శర్మ అభిప్రాయపడ్డారు. రాబోయే రోజుల్లో ద్రవ్యోల్బణాన్ని కట్టడి చేయడానికి వడ్డీ రేట్లను మరింత పెంచే ఛాన్స్ ఉందని మెజారిటీ నిపుణులు భావిస్తున్నారు.
బాండ్ మార్కెట్పై పడుతున్న ప్రభావం
ప్రభుత్వం ఇటీవల ప్రకటించిన రెండో అర్ధభాష రుణ ప్రణాళికలో 15, 30, 40 ఏళ్ల సెక్యూరిటీల ద్వారా నిధులు సమీకరించాలని నిర్ణయించింది. దీంతో బాండ్ మార్కెట్లో ధరలు పడిపోతాయన్న ఆశలు ఆవిరయ్యాయి. ప్రభుత్వ ఈ నిర్ణయం వల్ల స్వల్పకాలికంగా ఈల్డ్ కర్వ్ లో మార్పులు వస్తాయని ఇన్వెస్కో మ్యూచువల్ ఫండ్ ఫిక్సెడ్ ఇన్కం హెడ్ వికాస్ గార్గ్ పేర్కొన్నారు. మరోవైపు, దేశ ఆర్థిక భద్రతను దృష్టిలో ఉంచుకునే రుణ సమీకరణ చేపడుతున్నామని, దీనివల్ల భవిష్యత్తులో ఎదురయ్యే ఆర్థిక రిస్క్లు తగ్గుతాయని కేంద్ర ఆర్థిక మంత్రిత్వ శాఖ స్పష్టం చేసింది.
Click it and Unblock the Notifications
Sign in with Google
