టీఆర్ఎస్ లో KTR నెంబర్ 2.. అధికారికంగా ప్రకటించిన KCR
Recommended Video
హైదరాబాద్ : రెండోసారి ముఖ్యమంత్రిగా ప్రమాణ స్వీకారం చేసిన కేసీఆర్ కీలక నిర్ణయాలు తీసుకుంటున్నారు. ఇప్పటికే మహమూద్ అలీకి హోంశాఖ కేటాయించిన గులాబీ బాస్ తాజాగా మరో కీలక నిర్ణయం ప్రకటించారు. ఆయన తనయుడు కేటీఆర్ ను పార్టీ వర్కింగ్ ప్రెసిడెంట్ గా నియమించారు. టీఆర్ఎస్ పార్టీ చరిత్రలో వర్కింగ్ ప్రెసిడెంట్ పదవి తొలిసారి కావడం విశేషం.
జాతీయస్థాయి రాజకీయాలపై దృష్టి పెడతానని చెబుతూ వచ్చిన కేసీఆర్.. ఆ దిశగా అడుగులేస్తున్నారు. ఈక్రమంలో పార్టీని కాపాడుకోవడం, మరింత బలోపేతం చేయడానికి తనయుడు కేటీఆర్ భుజస్కందాలపై బాధ్యతలు పెట్టారు.
సంస్థాగతంగా పార్టీకి మరింత బలం చేకూర్చడానికి ఈ నిర్ణయం తీసుకున్నట్లు తెలుస్తోంది. అంతేగాకుండా పార్టీ సభ్యత్వాలతో పాటు జిల్లాల్లో కార్యాలయాలు ఏర్పాటు చేయడం తదితర బాధ్యతలు కేటీఆర్ కు అప్పగించినట్లు తెలుస్తోంది. అయితే పార్టీ కార్యవర్గ సమావేశానికంటే ముందే గులాబీ అధినేత కేసీఆర్ ఈ నిర్ణయం తీసుకోవడం హాట్ టాపిక్ అయింది. అంతేకాదు సీఎంగా మరోసారి బాధ్యతలు చేపట్టిన మరుసటి రోజే కేటీఆర్ ను వర్కింగ్ ప్రెసిడెంట్ గా నియమించడం ప్రాధాన్యత సంతరించుకుంది.