No Stock: ధర చూస్తే గుండె గుభేల్! డ్రైవర్ల కన్నీటి గాథ!
దేశంలో ఇంధన సెగలు సామాన్యుడిని ఉక్కిరిబిక్కిరి చేస్తున్నాయి. ముఖ్యంగా ఆటో ఎల్పీజీ (Auto LPG) కొరత ఇప్పుడు పెను సంక్షోభానికి దారితీసింది. గ్యాస్ బంకుల వద్ద కిలోమీటర్ల కొద్దీ బారులు తీరిన వాహనాలు, ఖాళీ బోర్డులు చూస్తుంటే పరిస్థితి ఎంత తీవ్రంగా ఉందో అర్థమవుతోంది. అటు ధరల భారం, ఇటు నిండుకున్న నిల్వలతో ఆటో డ్రైవర్ల బతుకు చిత్రం ఛిన్నాభిన్నమవుతోంది.
ప్రస్తుతం ఆటో ఎల్పీజీ అవుట్లెట్లన్నీ వెలవెలబోతున్నాయి. టోటల్ గ్యాస్ వంటి ప్రముఖ ప్రైవేటు అవుట్లెట్లు పూర్తిగా మూతపడగా, సూర్య గ్యాస్, సూపర్ గ్యాస్ బంకుల్లో మధ్యాహ్నానికే 'నో స్టాక్' బోర్డులు దర్శనమిస్తున్నాయి. ప్రభుత్వ రంగ సంస్థలైన హెచ్పీ, భారత్ పెట్రోలియం బంకుల వద్ద మూడు కిలోమీటర్ల మేర క్యూలు ఉన్నప్పటికీ, గంటల తరబడి వేచి చూసిన డ్రైవర్లను చివరకు సిబ్బంది వెనక్కి పంపుతున్నారు. సరఫరా గొలుసు పూర్తిగా తెగిపోవడమే ఈ దుస్థితికి కారణమని తెలుస్తోంది.
ఆకాశాన్నంటిన ధరలు.. రెట్టింపైన భారం
ఒకప్పుడు లీటరుకు కేవలం రూ.58 ఉన్న ఎల్పీజీ ధర, ఇప్పుడు చుక్కలను తాకుతోంది. ప్రభుత్వ ఏజెన్సీలు రూ.85కు విక్రయిస్తుంటే, ఇదే అదునుగా భావించిన ప్రైవేటు సంస్థలు ఏకంగా రూ.120 నుంచి రూ.125 వరకు వసూలు చేస్తున్నాయి. "లీటరుకు రూ.125 చెల్లించాల్సి వస్తోంది. పరిస్థితి ఇలాగే ఉంటే కడుపు నింపుకోవడానికి ఆటోలను అమ్ముకోవాల్సిందే" అని డ్రైవర్ శంక్రే గౌడ ఆవేదన వ్యక్తం చేశారు. గతంలో ఉన్న ధరతో పోలిస్తే ఇప్పుడు రెట్టింపు కంటే ఎక్కువ భారం పడటం ఆటో కార్మికులను అప్పుల ఊబిలోకి నెడుతోంది.
నిలిచిపోయిన సరఫరా.. దిక్కుతోచని స్థితిలో మేనేజర్లు
స్టాక్ ఎప్పుడు వస్తుందో తెలియక గ్యాస్ స్టేషన్ నిర్వాహకులు కూడా చేతులెత్తేస్తున్నారు. "గత మూడు రోజులుగా మా వద్ద అసలు స్టాక్ లేదు. వారానికి నాలుగు టన్నులు వచ్చే సరఫరా కాస్తా రెండు టన్నులకు పడిపోయి, ఇప్పుడు పూర్తిగా నిలిచిపోయింది" అని ప్రైవేటు గ్యాస్ స్టేషన్ మేనేజర్ చేతన్ గౌడ తెలిపారు. ఉదయం 5 గంటల నుండే డ్రైవర్లు బంకుల వద్ద నిరీక్షిస్తున్నా, ఫలితం ఉండటం లేదు. కనీసం ఐదు లీటర్లు దొరికితే చాలు అన్నట్లుగా డ్రైవర్లు ప్రాధేయపడుతున్న దృశ్యాలు దయనీయంగా మారుతున్నాయి.
ప్రయాణికులకు తిప్పలు.. డ్రైవర్ల జీవనోపాధిపై దెబ్బ
గ్యాస్ ఎప్పుడు అయిపోతుందో అనే భయంతో చాలా మంది ఆటో డ్రైవర్లు ప్రయాణికులను ఎక్కించుకోవడానికి సాహసించడం లేదు. దీనివల్ల ప్రయాణికులు ఎక్కువ సేపు వేచి ఉండాల్సి వస్తోంది. అయితే, ఎలక్ట్రిక్, సీఎన్జీ ఆటోలు అందుబాటులో ఉండటంతో ఈ ప్రభావం ఇంకా పూర్తిగా ప్రజలపై పడలేదు. కానీ, ఎల్పీజీపైనే ఆధారపడిన వేలాది మంది డ్రైవర్లు మాత్రం తమ రోజువారీ ఆదాయాన్ని కోల్పోయి, జీవనోపాధి కోసం అల్లాడిపోతున్నారు.
ఇండియన్ ఆయిల్ క్లారిటీ.. పెట్రోల్కు మారండి!
ఈ సంక్షోభంపై ఇండియన్ ఆయిల్ స్పందిస్తూ వింతైన సూచన చేసింది. తమ రిటైల్ అవుట్లెట్లలో నిల్వలు సరిపడా ఉన్నాయని, నెట్వర్క్ అంతా పనిచేస్తోందని స్పష్టం చేసింది. ఒకవేళ గ్యాస్ బంకుల వద్ద నిరీక్షణ సమయం ఎక్కువగా ఉంటే, ఆటోలు బై-ఫ్యూయల్ (పెట్రోల్/గ్యాస్ రెండింటిపై నడిచేవి) కాబట్టి, పెట్రోల్కు మారి ప్రయాణాన్ని కొనసాగించాలని సూచించింది. అయితే, పెట్రోల్ ధర గ్యాస్ కంటే ఎక్కువగా ఉండటంతో ఆ భారాన్ని ఎలా మోయాలని డ్రైవర్లు ప్రశ్నిస్తున్నారు.
Click it and Unblock the Notifications
Sign in with Google