ఢిల్లీలో మళ్లీ ఉద్రిక్తత: ఏసీపీపై రాళ్ల దాడి.. జంతర్ మంతర్ వద్ద హై అలర్ట్!
దేశ రాజధాని ఢిల్లీలో నిరసనల నేపథ్యంలో మరోసారి ఉద్రిక్తతలు చోటుచేసుకున్నాయి. బుధవారం రాత్రి కన్నాట్ ప్లేస్లోని టాల్స్టాయ్ మార్గ్ సమీపంలో కొందరు దుండగులు రాళ్లు, సీసాలతో పోలీసులపై దాడి చేయగా.. ఈ ఘటనలో కన్నాట్ ప్లేస్ ఏసీపీ వివేక్ భగత్ గాయపడ్డారు. ఈ ఘటనతో ఆ ప్రాంతంలో కొద్దిసేపు గందరగోళం నెలకొంది. అయితే ఢిల్లీ పోలీసులు వెంటనే పరిస్థితిని అదుపులోకి తెచ్చారు. ఈ ఘటన అనంతరం జంతర్ మంతర్తో సహా పలు కీలక ప్రాంతాల్లో భద్రతను మరింత కట్టుదిట్టం చేశారు.
రాళ్ల దాడి తర్వాత భద్రత కట్టుదిట్టం
ఢిల్లీ పోలీసుల ప్రకారం.. గాయపడిన ఏసీపీ వివేక్ భగత్ను వెంటనే రామ్ మనోహర్ లోహియా ఆస్పత్రికి తరలించారు. కొన్ని నిమిషాల పాటు పరిస్థితి ఉద్రిక్తంగా ఉందని.. అయితే ప్రస్తుతం ప్రశాంతంగా ఉందని పోలీసులు వెల్లడించారు. ఎలాంటి అవాంఛనీయ సంఘటనలు జరగకుండా నివారించేందుకు ముందుజాగ్రత్త చర్యగా జంతర్ మంతర్ వద్ద అదనపు పోలీసు బలగాలను మోహరించారు. ఆ ప్రాంతమంతటా నిఘాను పెంచారు.
శాంతి కోసం సీజేపీ విజ్ఞప్తి
ఇదిలా ఉండగా కాక్రోచ్ జనతా పార్టీ (సీజేపీ) ప్రధాన అధికార ప్రతినిధి సౌరవ్ దాస్, తాను సోనమ్ వాంగ్చుక్తో పలుమార్లు మాట్లాడినట్లు వెల్లడించారు. ఉద్యమాన్ని పూర్తిగా శాంతియుతంగా కొనసాగించాలని, ఎలాంటి రెచ్చగొట్టే చర్యలకు లొంగవద్దని వాంగ్చుక్ నిరసనకారులందరికీ విజ్ఞప్తి చేశారని ఆయన అన్నారు. గతంలో సంఘ విద్రోహ శక్తులు పలు నిరసనల్లోకి చొరబడి వాతావరణాన్ని అస్థిరపరిచేందుకు ప్రయత్నించాయని, అందువల్ల ఈసారి ప్రతిఒక్కరూ అప్రమత్తంగా ఉండాలని సౌరవ్ దాస్ ఆరోపించారు.
కొనసాగుతున్న రాజీనామా డిమాండ్
కేంద్ర మంత్రి జేపీ నడ్డా మీడియా సమావేశంపై సౌరవ్ దాస్ కూడా తీవ్రంగా స్పందించారు. ప్రజలు తమ డిమాండ్ల కోసం 30 రోజులకు పైగా నిరసనలు చేస్తున్నారని, వారి గొంతును విస్మరించలేమని ఆయన అన్నారు. ధర్మేంద్ర ప్రధాన్ రాజీనామా డిమాండ్పై ఎటువంటి రాజీ ఉండదని, ఈ డిమాండ్ నెరవేరే వరకు నిరసనలు కొనసాగుతాయని ఆయన పేర్కొన్నారు.
శాంతియుతంగా ఉద్యమం
ఉద్రిక్త పరిణామాలు నెలకొన్నప్పటికీ.. తమ నిరసన శాంతియుతంగానే కొనసాగుతుందని కాక్రోచ్ జనతా పార్టీ స్పష్టం చేసింది. నిరసనకారులు సంయమనం పాటించాలని, చట్టాన్ని గౌరవించాలని, ఎలాంటి రెచ్చగొట్టే చర్యలకు లేదా పుకార్లకు దూరంగా ఉండాలని ఆ సంస్థ విజ్ఞప్తి చేసింది. మరోవైపు శాంతిభద్రతలను కాపాడటానికి అవసరమైన అన్ని ఏర్పాట్లు చేశామని పేర్కొంటూ.. ప్రజలు శాంతిని పాటించాలని, పుకార్లను పట్టించుకోవద్దని ఢిల్లీ పోలీసులు కూడా విజ్ఞప్తి చేశారు.
Click it and Unblock the Notifications
Sign in with Google