లివ్‌ఇన్ రిలేషన్ దారుణం: యూపీఎస్సీ విద్యార్థి హత్య కేసులో సంచలన నిజాలు!

ఢిల్లీలో ఓ లివ్-ఇన్-పార్ట్‌నర్ తన ప్రేమికుడిని హత్య చేసేందుకు అత్యంత దారుణమైన కుట్ర పన్నింది. ఆమె తన పూర్వ ప్రియుడితో కలిసి యూపీఎస్సీ పరీక్షలకు సిద్ధమవుతున్న పార్ట్‌నర్‌ను చంపింది. ఆ తర్వాత గ్యాస్ సిలిండర్ ఆన్ చేసి, ఆ హత్యను ఒక ప్రమాదంగా చిత్రీకరించడానికి ప్రయత్నించింది. ఈ సంచలనాత్మక కుట్ర ఎలా బయటపడిందో వివరాలు తెలుసుకుందాం.

హత్య కేసు కుట్ర బహిర్గతం
ఢిల్లీలోని తిమార్‌పూర్ ప్రాంతంలో అక్టోబర్ 6న యూపీఎస్సీ అభ్యర్థి దారుణ హత్య జరిగింది. ఈ హత్య కేసు కుట్రను ఢిల్లీ పోలీసులు ఛేదించారు. ఈ కేసులో ఓ మహిళతో సహా ముగ్గురు నిందితులను పోలీసులు అరెస్ట్ చేశారు. బాధితుడిని గొంతు నులిమి చంపడం, ఆ తర్వాత మృతదేహానికి నిప్పంటించడం, సాక్ష్యాలను మాయం చేయడం వంటి ఆరోపణలపై 21 ఏళ్ల ఫోరెన్సిక్ సైన్స్ విద్యార్థిని సహా ముగ్గురిని అరెస్ట్ చేసినట్లు పోలీస్ అధికారి వెల్లడించారు. కాలిపోయిన ఆ మృతదేహం గాంధీ విహార్‌లోని ఓ ఫ్లాట్‌లో లభించింది.

నెయ్యి, మద్యం, సిలిండర్ బ్లాస్ట్!
పోలీసులు అరెస్టు చేసిన నిందితులను 21 ఏళ్ల అమృతా చౌహాన్, 27 ఏళ్ల సుమిత్ కశ్యప్, 29 ఏళ్ల సందీప్ కుమార్‌గా గుర్తించారు. నిందితులందరూ ఉత్తరప్రదేశ్‌లోని మొరాదాబాద్ జిల్లాకు చెందినవారు. దర్యాప్తు అధికారులు తెలిపిన వివరాల ప్రకారం.. నిందితులు మొదటగా బాధితుడు రామ్ కేశ్ మీనాను హత్య చేశారు. ఆ తర్వాత దర్యాప్తు అధికారులను తప్పుదారి పట్టించడానికి, హత్యను ప్రమాదంగా చూపించడానికి మృతదేహంపై నూనె, నెయ్యి, ఆల్కహాల్ (మద్యం) పోసి నిప్పంటించారు. అంతేకాకుండా సాక్ష్యాలను నాశనం చేయడానికి ఎల్‌పీజీ సిలిండర్ రెగ్యులేటర్‌ను కూడా తెరిచి ఉంచారు.

అనుమానాస్పద హార్డ్ డిస్క్ కోసమే హత్య
ఈ హత్య వెనుక పూర్తి కుట్రను పోలీసులు వెల్లడించారు. తన లివ్-ఇన్ పార్ట్‌నర్‌ను చంపడానికి ఆ యువతి, ఆమె పూర్వ ప్రియుడు, అతని స్నేహితుడు కలిసి పథకం వేశారు. మృతుడి వద్ద తన అభ్యంతరకరమైన ఫోటోలు, వీడియోలు ఉన్న హార్డ్ డిస్క్ ఉందని ఆ యువతి (అమృత) అనుమానించింది. వాటిని తిరిగి పొందడానికి లేదా నాశనం చేయడానికి ఈ కుట్రకు పాల్పడింది.

సీసీటీవీ పుటేజీతో కుట్ర బహిర్గతం
ఆగస్టు 6న గాంధీ విహార్‌లోని నాలుగో అంతస్తు ఫ్లాట్‌లో మంటలు చెలరేగాయని పోలీసులకు సమాచారం అందింది. ఫైర్ బ్రిగేడ్ మంటలను ఆర్పివేయగా, కాలిపోయిన మృతదేహం లభించింది. అది 32 ఏళ్ల రామ్‌కేశ్ మీనాగా గుర్తించారు. అప్పట్లో పోలీసులు దీన్ని ప్రమాదవశాత్తు మరణంగా కేసు నమోదు చేశారు. అయితే సీసీటీవీ ఫుటేజ్ మొత్తం కుట్రను బహిర్గతం చేసింది. ఘటన జరిగిన రోజున ఇద్దరు ముసుగు వ్యక్తులు భవనంలోకి ప్రవేశించడం సీసీటీవీ ఫుటేజీలో కనిపించింది.దాదాపు 39 నిమిషాల తర్వాత వారిలో ఒకరు బయటకు వెళ్లారు. రాత్రి 2.57 గంటలకు ఒక మహిళ మరో వ్యక్తితో కలిసి భవనం నుంచి బయటకు వెళ్లడం కనిపించింది. వారు బయటకు వెళ్లిన వెంటనే ఫ్లాట్‌లో మంటలు చెలరేగాయి. ఈ దృశ్యాలు పోలీసులకు అనుమానం కలిగించాయి.

ఫొరెన్సిక్ స్టూడెంట్ ప్లాన్
పోలీసులు ఆ మహిళ మొబైల్ లొకేషన్‌ను గుర్తించారు. ఆమె ఫోన్ స్విచ్ఛాఫ్ చేసి ఉండటంతో, మొరాదాబాద్‌లో అనేక చోట్ల దాడులు చేసి అక్టోబర్ 18న అమృతను అరెస్ట్ చేశారు. ఫొరెన్సిక్ సైన్స్ విద్యార్థిని అయిన అమృత విచారణలో తన నేరాన్ని అంగీకరించింది. సుమిత్ కశ్యప్, సందీప్ కుమార్ సహాయంతో హత్య చేసినట్లు వెల్లడించింది. అమృత ఇచ్చిన సమాచారం మేరకు.. సుమిత్ కశ్యప్‌ను అక్టోబర్ 22న, సందీప్ కుమార్‌ను అక్టోబర్ 23న అరెస్టు చేశారు. పోలీసులు సంఘటనా స్థలం నుంచి హార్డ్ డిస్క్, ఒక ట్రాలీ బ్యాగ్, బాధితుడి షర్ట్‌ను స్వాధీనం చేసుకున్నారు. ముగ్గురు నిందితులపై ఇండియన్ జస్టిస్ కోడ్ (BNS)లోని హత్య, క్రిమినల్ కుట్ర, పేలుడు పదార్థాలతో నష్టం కలిగించడం వంటి సెక్షన్ల కింద కేసు నమోదు చేశారు.

English summary

A shocking murder in Delhi. A UPSC aspirant was killed by his live-in partner with her ex-boyfriend and an accomplice.