కేరళం: సీ ఓటర్ సర్వేలో సంచలన నిజాలు! విజయం వీరిదే?

కేరళం అసెంబ్లీ ఎన్నికల నగారా మోగకముందే రాజకీయ వాతావరణం వేడెక్కింది. తాజాగా వెలువడిన 'మనోరమ న్యూస్ - సీ ఓటర్' మెగా సర్వే ఫలితాలు రాష్ట్రంలో మిశ్రమ ధోరణులను ప్రతిబింబిస్తున్నాయి. ముఖ్యంగా ఉత్తర కేరళంలోని లెఫ్ట్ డెమోక్రటిక్ ఫ్రంట్ (LDF) కంచుకోటలు బీటలు వారుతుండగా, యునైటెడ్ డెమోక్రటిక్ ఫ్రంట్ (UDF) తన పట్టును మరింత బిగిస్తోంది. కోజికోడ్ వంటి జిల్లాల్లో అధికార పక్షానికి ఎదురుగాలి వీస్తుండటం ఈ సర్వేలో అత్యంత ఆసక్తికరమైన అంశం.

కోజికోడ్: ఎల్‌డీఎఫ్ కోటలో బీటలు!

గత ఎన్నికల్లో ఏకపక్షంగా 11 సీట్లు గెలుచుకున్న ఎల్‌డీఎఫ్‌కు ఈసారి కోజికోడ్ జిల్లాలో గట్టి సెగ తగలనుంది. ఈసారి లెఫ్ట్ ఫ్రంట్ కేవలం 6 నుంచి 8 సీట్లకు పరిమితం కావచ్చని సర్వే అంచనా వేస్తోంది. మరోవైపు, గతంలో కేవలం రెండు సీట్లకే పరిమితమైన యూడీఎఫ్, ఈసారి 5 నుండి 7 స్థానాల్లో జెండా పాతే అవకాశం కనిపిస్తోంది. ఓట్ల శాతం పరంగా కూడా యూడీఎఫ్ 40 శాతంతో ఎల్‌డీఎఫ్ (39%) కంటే స్వల్పంగా ముందంజలో ఉండటం గమనార్హం. ఇక్కడ ఎన్డీయే 14 శాతం ఓట్లను చీల్చే అవకాశం ఉంది.

కన్నూరులో లెఫ్ట్ హవా.. వయనాడ్, UDF ప్రభంజనం!

ఎల్‌డీఎఫ్‌కు కంచుకోటగా పేరొందిన కన్నూరు జిల్లాలో మాత్రం లెఫ్ట్ మ్యాజిక్ కొనసాగుతోంది. 11 స్థానాల్లో 6 నుండి 8 సీట్లు ఎల్‌డీఎఫ్ ఖాతాలోకి వెళ్లే అవకాశం ఉండగా, 43 శాతం ఓట్లతో స్పష్టమైన ఆధిక్యం కనబరుస్తోంది. అయితే, వయనాడ్ మరియు మలప్పురం జిల్లాల్లో యూడీఎఫ్ ప్రభంజనం స్పష్టంగా కనిపిస్తోంది.

• వయనాడ్: ఇక్కడ యూడీఎఫ్ 45 శాతం ఓట్లతో 2 నుండి 3 సీట్లు క్లీన్ స్వీప్ చేసే దిశగా సాగుతోంది.
• మలప్పురం: ముస్లిం లీగ్ పట్టున్న ఈ జిల్లాలో యూడీఎఫ్ తిరుగులేని ఆధిపత్యాన్ని ప్రదర్శిస్తోంది. మొత్తం 16 సీట్లలో ఏకంగా 14 నుండి 16 స్థానాలను కైవసం చేసుకుని ఎల్‌డీఎఫ్‌ను నామమాత్రపు ఉనికికే పరిమితం చేయవచ్చని సర్వే చెబుతోంది.

కీలక పోరు: సురేంద్రన్‌కు మళ్ళీ చుక్కెదురేనా?

కాసర్‌గోడ్ జిల్లాలోని మంజేశ్వర్ నియోజకవర్గంపై అందరి దృష్టి నెలకొంది. గత ఎన్నికల్లో స్వల్ప తేడాతో ఓడిపోయిన బీజేపీ రాష్ట్ర మాజీ అధ్యక్షుడు కె. సురేంద్రన్‌కు ఈసారి కూడా నిరాశే ఎదురయ్యే సూచనలు కనిపిస్తున్నాయి. ముస్లిం లీగ్ అభ్యర్థి ఏ.కె.ఎం. అష్రఫ్ ఇక్కడ తన పట్టును నిలబెట్టుకుంటారని సర్వే పేర్కొంది. అలాగే, పెరవూర్‌లో మాజీ మంత్రి కె.కె. శైలజపై కాంగ్రెస్ అభ్యర్థి సన్నీ జోసెఫ్ స్వల్ప ఆధిక్యంలో ఉండటం లెఫ్ట్ వర్గాల్లో ఆందోళన కలిగిస్తోంది.

ఓట్ల శాతం, బీజేపీ ఉనికి..

రాష్ట్రవ్యాప్తంగా బీజేపీ (NDA) ఓట్ల శాతం కొన్ని జిల్లాల్లో 10 నుంచి 16 శాతం వరకు నమోదవుతున్నప్పటికీ, సీట్లు గెలుచుకునే స్థాయిలో మాత్రం ప్రభావం చూపలేకపోతోంది. కాసర్‌గోడ్ మినహా మిగిలిన ఉత్తర కేరళం జిల్లాల్లో ఎన్డీయే ఖాతా తెరవడం కష్టమేనని సర్వే స్పష్టం చేస్తోంది.

మొత్తానికి, 2026 ఎన్నికలు కేరళంలో హోరాహోరీగా సాగనున్నాయని, ముఖ్యంగా మధ్యతరగతి ఓటర్లు, జిల్లా స్థాయి అంశాలు అధికార మార్పిడికి లేదా కొనసాగింపునకు కీలకం కానున్నాయని ఈ సర్వే ఫలితాలు విశ్లేషిస్తున్నాయి.

English summary

Explore the 2026 Kerala Assembly Election trends based on the Manorama News-C Voter survey. LDF holds Kannur while UDF sees a surge in Kozhikode and Malappuram.