TN: తిరుగులేని ఆధిక్యం? స్టాలిన్ దెబ్బకు విజయ్ ఖల్లాస్!
తమిళనాడులో ఎన్నికలకు సమయం తక్కువ ఉన్నప్పటికీ, క్షేత్రస్థాయిలో రాజకీయ సమీకరణాలు శరవేగంగా మారుతున్నాయి. తాజాగా 'నక్కీరన్' మ్యాగజైన్ 119 నియోజకవర్గాల్లో నిర్వహించిన ఓటు షేర్ సర్వే ఫలితాలను విడుదల చేసింది. ఈ గణాంకాలను విశ్లేషిస్తే.. ముఖ్యమంత్రి ఎం.కె. స్టాలిన్ నేతృత్వంలోని డీఎంకే+ కూటమి తిరుగులేని ఆధిక్యం దిశగా దూసుకుపోతున్నట్లు కనిపిస్తోంది. ముఖ్యంగా చెన్నై, తిరుచిరాపల్లి, తిరువళ్లూరు, వెల్లూరు వంటి కీలక ప్రాంతాల్లో డీఎంకే హవా స్పష్టంగా కనిపిస్తోంది.
నక్కీరన్ సర్వే చేసిన 119 నియోజకవర్గాలలో దాదాపు 75 నుంచి 80 శాతం స్థానాల్లో డీఎంకే+ కూటమి ముందంజలో ఉంది. ముఖ్యంగా చెన్నై మరియు తిరువళ్లూరు జిల్లాల్లో డీఎంకే క్లీన్ స్వీప్ చేసే దిశగా వెళ్తోంది. ఇక్కడి దాదాపు అన్ని స్థానాల్లో డీఎంకే కూటమి ఓటు షేర్ 45 శాతానికి పైగా ఉండటం గమనార్హం. గత ఎన్నికల నాటి పట్టును డీఎంకే మరింత పటిష్టం చేసుకుందని ఈ సర్వే గణాంకాలు చెబుతున్నాయి.
విజయ్ ఎంట్రీ: విపక్షాలకే భారీ దెబ్బ?
తమిళ సూపర్ స్టార్ విజయ్ స్థాపించిన 'తమిళగ వెట్రి కళగం' (TVK) ఈసారి ఎన్నికల్లో కీలక పాత్ర పోషించబోతున్నట్లు సర్వే వెల్లడించింది. టీవీకే పార్టీ 7 శాతం నుంచి 15 శాతం వరకు ఓట్లను సాధించే అవకాశం ఉందని అంచనా వేసింది. అయితే, ఇక్కడే ఒక ఆసక్తికరమైన మలుపు ఉంది. విజయ్ ఓట్లు చీల్చడం వల్ల అధికార డీఎంకేకు కంటే ప్రతిపక్ష పార్టీలకే ఎక్కువ నష్టం జరుగుతున్నట్లు కనిపిస్తోంది. విపక్షాల ఓట్లు చీలిపోవడం డీఎంకే అభ్యర్థుల విజయానికి మరింత సులువుగా మారుతోంది.
బహుముఖ పోటీలో డీఎంకేదే పైచేయి!
సర్వే ఫలితాల ప్రకారం.. బహుముఖ పోటీ ఉన్న చోట ప్రతిపక్ష ఓట్లు వివిధ పార్టీల మధ్య (AIADMK, TVK, BJP) చీలిపోతున్నాయి. దీనివల్ల డీఎంకే అభ్యర్థులు స్పష్టమైన మెజారిటీతో దూసుకెళ్తున్నారు. ముఖ్యంగా మెట్రో నగరాల్లో డీఎంకే పట్ల వ్యతిరేకత కంటే మద్దతే ఎక్కువగా ఉండటం ఆ కూటమికి కలిసొచ్చే అంశం. అటు విజయ్ పార్టీ బలపడటం డీఎంకేకు పరోక్షంగా లాభం చేకూరుస్తుందా అన్న విశ్లేషణలకు ఈ సర్వే బలం చేకూరుస్తోంది.
మొత్తానికి నక్కీరన్ సర్వే తమిళ రాజకీయాల్లో కొత్త చర్చకు తెరలేపింది. దళపతి విజయ్ ఎంట్రీ స్టాలిన్ విజయయాత్రను అడ్డుకుంటుందా లేక విపక్షాలను మరింత బలహీనపరుస్తుందా అన్నది వేచి చూడాలి.
Click it and Unblock the Notifications
Sign in with Google