మరో కొత్త ఆపరేషన్ ప్రారంభిస్తున్న మోడీ..! పాక్ కు దిమ్మతిరిగేలా..!

పహల్గాం ఉగ్రదాడి తర్వాత చేపట్టిన ఆపరేషన్ సింధూర్ ను విజయవంతంగా ముగించిన భారత్ ఇప్పుడు దీర్ఘకాలిక వ్యూహాలపై ఫోకస్ పెంచుతోంది. ముఖ్యంగా ఉగ్రవాదంపై ప్రపంచ దేశాల్ని ఏకం చేసేందుకు అడుగులు వేస్తోంది. పాకిస్తాన్ పై స్వల్పకాలిక యుద్ధం తాము చేయడం కంటే ప్రపంచ దేశాల నుంచి ఉగ్రవాదానికి మద్దతిస్తున్న ఆ దేశంపై ఒత్తిడి పెంచేందుకు సిద్దమవుతోంది. ఇందులో భాగంగా ప్రధాని మోడీ కొత్త ఆపరేషన్ ప్రారంభిస్తున్నారు.

ఐక్యరాజ్యసమితితో పాటు భారత్ కు కీలక మిత్రదేశాల్లో పర్యటించి ఉగ్రవాద వ్యతిరేక సందేశం వినిపించేందుకు వీలుగా ప్రధాని మోడీ ఇవాళ ఏడుగురు ఎంపీల నేతృత్వంలో వేర్వేరు అఖిలపక్ష బృందాల్ని ఏర్పాటు చేశారు. ఇందులో కాంగ్రెస్ ఎంపీ శశిధరూర్ తో పాటు బీజేపీ ఎంపీలు రవి శంకర్ ప్రసాద్, బైజయంత్ పాండ్యా, జేడీయూ ఎంపీ సంజయ్ కుమార్ ఝా, డీఎంకే ఎంపీ కనిమొళి, ఎన్సీపీ ఎంపీ సుప్రియా సూలే, శివసేన షిండే వర్గం ఎంపీ శ్రీకాంత్ షిండే ఉన్నారు. ఈ ఏడుగురు ఎంపీల నేతృత్వంలోని అఖిలపక్ష బృందాలు త్వరలో ఐరాసతో పాటు భారత్ కు కీలక మిత్రదేశాల్లో పర్యటిస్తాయని కేంద్రమంత్రి కిరణ్ రిజిజు ట్వీట్ చేశారు.

శశిథరూర్‌ నేతృత్వంలో అఖిల పక్ష బృందం అమెరికాకు వెళ్లనుంది. తూర్పు ఐరోపా దేశాలకు బైజయంత్‌ పాండా బృందం,
రష్యాకు కనిమొళి నేతృత్వంలోని బృందం, ఆగ్నేయాసియాకు సంజయ్‌ ఝా బృందం, మిడిల్‌ ఈస్ట్‌ దేశాలకు రవిశంకర్‌ ప్రసాద్‌ బృందం, పశ్చిమాసియా దేశాలకు సుప్రియా సూలే బృందం, ఆఫ్రికన్‌ దేశాలకు శ్రీకాంత్‌ షిండే బృందం వెళ్లేలా కేంద్రం షెడ్యూల్ చేసింది. ఆయా దేశాల్లో వీరు రెండు రోజుల పాటు పర్యటించే అవకాశం ఉంది.

In moments that matter most, Bharat stands united.
Seven All-Party Delegations will soon visit key partner nations, carrying our shared message of zero-tolerance to terrorism.
A powerful reflection of national unity above politics, beyond differences.@rsprasad @ShashiTharoor… pic.twitter.com/FerHHACaVK

— Kiren Rijiju (@KirenRijiju) May 17, 2025

ఆపరేషన్ సింధూర్ నేపథ్యంతో పాటు ఉగ్రవాదానికి వ్యతిరేకంగా భారత్ చేస్తున్న పోరును ఈ అఖిలపక్ష ఎంపీల బృందాలు మిత్రదేశాలకు వివరించబోతున్నాయి. వీరు ఐరాస భద్రతా మండలి సభ్యదేశాలతో పాటు భారత్ మిత్రదేశాల్లో పర్యటిస్తారని తెలిపారు. తీవ్రవాదానికి వ్యతిరేకంగా భారత్ ఏకమవుతున్న తీరు, ఏ విధమైన తీవ్రవాదానికి అయినా తాము వ్యతిరేకమన్న సందేశం వీరు మిత్రదేశాలకు వినిపిస్తారు. తీవ్రవాదంపై భారత్ అనుసరిస్తున్న జీరో టాలరెన్స్ విధానాన్ని వీరు ఆయా దేశాలకు వివరిస్తారు. తద్వారా పాకిస్తాన్ పై దౌత్యపరంగా ఒత్తిడి పెంచబోతున్నట్లు తెలుస్తోంది.