హిందూత్వవాదులపై రాహుల్ ఫైర్-ద్రవ్యోల్బణం, బాధ, దుఃఖానికి కారణం వారే

కాంగ్రెస్ నేత రాహుల్ గాంధీ ఇవాళ మరోసారి హిందూత్వవాదులపై రెచ్చిపోయారు. ఉత్తర్ ప్రదేశ్ ఎన్నికల ప్రచారంలో భాగంగా తన పాత నియోజకవర్గం అమేథీకి వచ్చిన రాహుల్.. హిందూత్వవాదులపై ఫైర్ అయ్యారు. ఈ మధ్య కాలంలో హిందూమతం వేరు, హిందూత్వ వేరని వ్యాఖ్యలు చేస్తున్న రాహుల్.. ఇవాళ దాన్ని పతాకస్ధాయికి తీసుకెళ్లారు.

దేశంలో పెరుగుతున్న ద్రవ్యోల్బణం, బాధ, దుఃఖానికి 'హిందుత్వవాదులే ప్రత్యక్ష కారణమని రాహుల్ గాంధీ ఇవాళ వ్యాఖ్యానించారు. అమేథీలో నిర్వహించిన కాంగ్రెస్ ఎన్నికల ప్రచారంలో ఆయన ఈ వ్యాఖ్యలు చేసారు. ఉత్తరప్రదేశ్‌లోని తన మాజీ కంచుకోట అమేథీలో జరిగిన బహిరంగ ర్యాలీలో రాహుల్ గాంధీ మాట్లాడుతూ, "ఈ రోజు, మన దేశంలో మెహంగై (ద్రవ్యోల్బణం), బాధ, విచారం ఉందంటే అది హిందుత్వవాదుల వల్లేనని వ్యాఖ్యానించారు. ఈరోజు హిందువులకు, హిందుత్వవాదులకు మధ్య యుద్ధం జరుగుతోంది. హిందువులు సత్యాగ్రహాన్ని విశ్వసిస్తే, హిందూత్వవాదులు 'సత్తాగ్రహ' (రాజకీయ దురాశ)ను విశ్వసిస్తున్నారని ఆయన అన్నారు.

రాహుల్ గాంధీ, పార్టీ ప్రధాన కార్యదర్శి, ఆయన సోదరి ప్రియాంక గాంధీ వాద్రాతో కలిసి ఈరోజు అమేథీలో 6 కిలోమీటర్ల మేర పాదయాత్ర నిర్వహించారు. 2019 లోక్‌సభ ఎన్నికల్లో ఓడిపోయిన తర్వాత రాహుల్ గాంధీ 2.5 ఏళ్ల తర్వాత అమేథీకి వెళ్లడం ఇదే తొలిసారి. ప్రధాని నరేంద్ర మోదీని ఉద్దేశించి రాహుల్ గాంధీ మాట్లాడుతూ, ప్రధాని గంగా నదిలో స్నానం చేస్తున్నా... నిరుద్యోగం వంటి సమస్యలపై మాత్రం నోరు మెదపడం లేదన్నారు. "ఈ రోజు దేశంలో ప్రజలు ఎందుకు ఉపాధి పొందలేకపోతున్నారు? ద్రవ్యోల్బణం ఎందుకు అంత త్వరగా పెరుగుతోంది?" అని రాహుల్ గాంధీ ప్రశ్నించారు. ముఖ్యమైన సమస్యల నుంచి ప్రజల దృష్టిని మరల్చేందుకు కేంద్ర ప్రభుత్వం మార్కెటింగ్‌లో బిజీగా ఉందని రాహుల్ గాంధీ అన్నారు.

ఇవాళ లడఖ్‌లో చైనా భారత్‌కు చెందిన భూమిని లాక్కొని దాన్ని తన సొంతం చేసుకుంది. కానీ ప్రధాని ఏమీ మాట్లాడలేదు. భూమి తీసుకోలేదని ప్రధాని చెప్పారు. కొంతకాలం తర్వాత, రక్షణ మంత్రిత్వ శాఖ భూమిని తీసుకున్నట్లు చెప్పిందని రాహుల్ గాంధీ ఎద్దేవా చేశారు.

English summary

congress mp rahul gandhi on today made sensational comments on hindutwawadis once again.