MediaOne : న్యూస్ ఛానళ్ల విమర్శలు జాతి వ్యతిరేకం కాదన్న సుప్రీం-మీడియా వన్ పై నిషేధం రద్దు..

2020లో జరిగిన పౌరసత్వ చట్ట సవరణ నిరసనలకు మద్దతుగా వార్తలు ప్రసారం చేసిన కేరళకు చెందిన మలయాళ న్యూస్ ఛానల్ మీడియా వన్ పై కేంద్రం విధించిన నిషేధాన్ని సుప్రీంకోర్టు ఇవాళ కొట్టేసింది. జాతి వ్యతిరేకం, ప్రభుత్వ వ్యతిరేకం అంటూ జాతీయ భద్రతా చట్టాన్ని ప్రయోగించడం సరికాదని తెలిపింది. దేశంలో స్వతంత్ర మీడియా అవసరం ఉందని పేర్కొంది. ప్రభుత్వాన్ని విమర్శించినంత మాత్రాన మీడియాను తప్పుబట్టలేమని సుప్రీంకోర్టు ఈ సందర్భంగా వ్యాఖ్యానించింది.

ప్రభుత్వ విధానాలు, చర్యలపై మీడియావన్ ఛానల్ చేసిన విమర్శలను దేశ వ్యతిరేక లేదా ప్రభుత్వ వ్యతిరేకం అని భావించలేమని, సజీవ ప్రజాస్వామ్యానికి స్వతంత్ర మీడియా అవసరమని సుప్రీంకోర్టు పేర్కొంది. సెక్యూరిటీ క్లియరెన్స్ కోసం మీడియా వన్ ఛానెల్ ప్రసార లైసెన్స్‌ను పునరుద్ధరించడానికి నిరాకరించిన సమాచార, ప్రసార మంత్రిత్వ శాఖ ఆదేశాల్ని సుప్రీంకోర్టు రద్దు చేసింది. ఈ వ్యవహారంలో జాతీయ భద్రత వాదన లేవనెత్తడం సరికాదని తెలిపింది.

ప్రజల హక్కుల్ని కాలరాయడానికి జాతీయ భద్రత అభియోగాలు చేయలేరని కేంద్రాన్ని ఉద్దేశించి సుప్రీంకోర్టు ఛీఫ్ జస్టిస్ డీవై చంద్రచూడ్ వ్యాఖ్యానించారు. కానీ ఈ కేసులో కేంద్ర హోం మంత్రిత్వ శాఖ అత్యద్భుతంగా ఈ వ్యవహారాన్ని తీసుకొచ్చిందంటూ ప్రధాన న్యాయమూర్తి డివై చంద్రచూడ్ నేతృత్వంలోని న్యాయస్థానం కేరళ హైకోర్టును సమర్థిస్తూ తీర్పు చెప్పింది. ఢిల్లీ, ఇతర ప్రాంతాలలో పౌరసత్వ సవరణ చట్ట వ్యతిరేక నిరసనలపై విస్తృతంగా వార్తలు అందించిన అతికొద్ది ఛానెల్‌లలో ఒకటైన మీడియావన్‌పై ప్రసార నిషేధాన్ని విధించే నిర్ణయాన్ని సమర్థించేందుకు ఎలాంటి వాస్తవాలు లేదా సాక్ష్యాలను చూపడంలో కేంద్రం విఫలమైందని న్యాయమూర్తులు తెలిపారు.

English summary

supreme court has scrapped central govt's ban on malayalam news channel mediaone for expressing views against the govt.