Fali S Nariman: న్యాయకోవిదుడు, దిగ్గజ లాయర్ ఫాలీ నారిమన్ కన్నుమూత..!

Updated: Wednesday, February 21, 2024, 9:42 [IST]

సుప్రీంకోర్టు సీనియర్ న్యాయవాది, న్యాయ కోవిదుడు ఫాలీ ఎస్ నారిమన్ ఇవాళ కన్నుమూశారు. సుప్రీంకోర్టులో ఎన్నో చారిత్రక కేసుల్లో తన వాదనలతో ఎన్నో కీలక తీర్పులు రావడానికి కృషి చేసిన నారిమన్ 95 ఏళ్ల వయసులో అనారోగ్యంతో తుదిశ్వాస విడిచారు.

దీంతో న్యాయవర్గాలు విషాదంలో మునిగిపోయాయి. నారిమన్ తన సుదీర్ఘ కెరీర్ లో దేశ చరిత్ర గతిని మలుపుతిప్పే పలు కేసుల్లో తన వాదనా పటిమతో మెప్పించారు. న్యాయ కోవిదుడిగా పేరు తెచ్చుకున్నారు.

Supreme Court Senior Advocate Fali S Nariman passes Away at 95 years age

ఫాలీ నారిమన్ మృతిపై సుప్రీంకోర్టులో ఆయన సహచర సీనియర్ న్యాయవాది ప్రశాంత్ భూషణ్ సంతాపం ప్రకటించారు. చాలా విచారకరమైన వార్త అని, ప్రముఖ న్యాయనిపుణుడు ఫాలి ఎస్ నారిమన్ కన్నుమూశారని ఎక్స్ లో వెల్లడించారు. ఆయన లాయర్ల సంఘానికి భీష్మ పితామహుడి వంటి వారన్నారు. తమ కుటుంబానికి గొప్ప న్యాయవాది , సన్నిహిత స్నేహితుడన్నారు. ఈ క్లిష్ట సమయంలో ఆయన మరణించడం మన దేశానికి తీరని లోటన్నారు.

Very sad news. Eminent Jurist Fali S Nariman Passes Away. He was also regarded as the Bhishma Pitamah of the Lawyer community. A great lawyer & close friend of our family. His passing away at this critical juncture is an enormous loss for our country https://t.co/VsTCFTSCNK
— Prashant Bhushan (@pbhushan1) February 21, 2024

సుప్రీంకోర్టులో రాజ్యాంగ కేసుల నిపుణుడిగా పేరు తెచ్చుకున్న ఫాలీ ఎస్ నారిమన్.. న్యాయ నియామకాల కమిషన్ (ఎన్జేఏసీ) కేసు, కొలీజియం ఏర్పాటుకు కారమైన ఏవోఆర్ కేసు సహా పలు కీలక పిటిషన్లలో వాదించారు. అలాగే పలు పౌర హక్కులు, లౌకిక వాద కేసులనూ వాదించిన చరిత్ర ఆయనకు ఉంది. 1975లో మాజీ ప్రధాని ఇందిరాగాంధీ విధించిన ఎమర్జెన్సీకి నిరసనగా తన అదనపు సొలిసిటర్ జనరల్ పదవికి రాజీనామా కూడా చేశారు.

ఆర్టికల్ 370 రద్దుపై సుప్రీంకోర్టు తాజాగా ఇచ్చిన తీర్పుపైనా నారిమన్ తీవ్ర విమర్శలు చేశారు. నారిమన్ కుమారుడు రోహింటన్ నారిమన్ సీనియర్ న్యాయవాది, సుప్రీంకోర్టు న్యాయమూర్తి కూడా. నారిమన్ ఆత్మకథ "బిఫోర్ మెమరీ ఫేడ్స్" న్యాయ విద్యార్ధులందరికీ కరదీపిక. ముఖ్యంగా న్యాయ విద్యార్థులు, యువ న్యాయవాదులలో ఇది ఎంతో ప్రేరణ నింపిందని చెప్పుకుంటారు. "ది స్టేట్ ఆఫ్ నేషన్", "గాడ్ సేవ్ ది హానబుల్ సుప్రీం కోర్ట్" వంటి పుస్తకాలను కూడా ఆయన రాశారు.