Ration Card: బయోమెట్రిక్ పై విజయ్ ప్రభుత్వం బిగ్ అప్డేట్!
తమిళనాడులోని స్మార్ట్ రేషన్ కార్డుదారులకు అక్కడి ప్రభుత్వం అత్యంత కీలక ఆదేశాలు జారీ చేసింది. ప్రజా పంపిణీ వ్యవస్థను పూర్తి పారదర్శకంగా మార్చాలనే సీఎం విజయ్ లక్ష్యంతో, కార్డులో నమోదైన కుటుంబ సభ్యులందరూ తప్పనిసరిగా ఈ-కేవైసీ బయోమెట్రిక్ ప్రక్రియను పూర్తి చేయాలని స్పష్టం చేసింది. ఈ నమోదు ప్రక్రియకు జులై 31వ తేదీని ఆఖరి గడువుగా నిర్ణయించింది.
రేషన్ బియ్యం, నిత్యావసరాల పంపిణీలో అక్రమాలను అరికట్టేందుకు ప్రభుత్వం ఈ డ్రైవ్ను వేగవంతం చేసింది. ఇందులో భాగంగా స్మార్ట్ రేషన్ కార్డుల్లో ఉన్న మరణించిన వ్యక్తుల పేర్లను తొలగించే ప్రక్రియను అధికారులు చేపట్టారు. మరణ ధృవీకరణ పత్రాలను పక్కాగా పరిశీలించిన అనంతరమే ఆయా పేర్లను కార్డుల నుంచి తొలగిస్తున్నారు. అయితే బయోమెట్రిక్ నమోదు చేసుకోని వారి పేర్లను నేరుగా కార్డుల నుంచి తొలగిస్తారంటూ జరుగుతున్న ప్రచారంపై అధికారులు స్పందిస్తూ, దీనిపై ప్రభుత్వం ఇంకా ఎలాంటి అధికారిక నిర్ణయం తీసుకోలేదని స్పష్టం చేశారు.
వృద్ధులు, బాధితులకు సౌకర్యంగా.. ఇంటింటికీ సిబ్బంది
సరిహద్దుల్లో నివసించే తెలుగు ప్రజలతో పాటు లబ్ధిదారులందరికీ ఇబ్బంది కలగకుండా రేషన్ సిబ్బంది బయోమెట్రిక్ యంత్రాలతో స్వయంగా ఇళ్లకు వెళ్లి వివరాలు సేకరిస్తున్నారు. రాష్ట్రవ్యాప్తంగా సాగుతున్న ఈ ప్రక్రియ కోయంబత్తూరు (కోవై) జిల్లాలో ముమ్మరంగా జరుగుతోంది. ఇక్కడ ఉన్న 11.25 లక్షల స్మార్ట్ రేషన్ కార్డులలో అంత్యోదయ అన్న యోజన, ప్రాధాన్యత, సాధారణ కార్డుదారుల నమోదు అత్యధిక శాతం పూర్తయినప్పటికీ, ఇంకా మిగిలి ఉన్న సుమారు 3.97 లక్షల మంది కోసం ప్రత్యేక చర్యలు చేపట్టారు. దుకాణాలకు రాలేని వృద్ధులు, అనారోగ్యంతో ఉన్నవారికి ఈ గృహ సందర్శన సౌకర్యం ఎంతో ప్రయోజనకరంగా మారింది.
జులై 31 లోపు పూర్తి చేసుకోవాలి
గడిచిన ఒక వారంలోనే కోవై జిల్లాలో దాదాపు 60 వేల మందికి పైగా లబ్ధిదారుల నుంచి వేలిముద్రలను సేకరించారు. మిగిలిన ఉన్న లబ్ధిదారుల బయోమెట్రిక్ ప్రక్రియను అనుకున్న గడువులోగా పూర్తి చేసేందుకు యంత్రాంగం వేగంగా పనిచేస్తోంది. కార్డుదారులు ఎవరైనా ఇంకా బయోమెట్రిక్ పూర్తి చేయకపోతే జులై 31 లోపు తమ పరిధిలోని రేషన్ కార్యాలయాలు లేదా దుకాణాల్లో ఈ ప్రక్రియను పూర్తి చేసుకోవాలని అధికారులు విజ్ఞప్తి చేస్తున్నారు.
Click it and Unblock the Notifications
Sign in with Google