ఆమ్ ఆద్మీ వీడియో: ముగ్గురు పోలీసుల సస్పెన్షన్
న్యూఢిల్లీ: ఢిల్లీ పోలీసులపై తమ పోరాటాన్ని కొనసాగిస్తూ ఆమ్ ఆద్మీ పార్టీ శుక్రవారంనాడు ఢిల్లీ పోలీసుల కిరాకత చర్యకు సంబంధించిన వీడియోను పోస్టు చేసింది. ఢిల్లీ పోలీసులకు వ్యతిరేకంగా రైల్ భవన్ వద్ద ఆమ్ ఆద్మీ పార్టీ నిర్వహించిన ధర్నా తర్వాత ఆ వీడియోను ఆమ్ ఆద్మీ పార్టీ బయటపెట్టింది.
ఎర్రకోట వద్ద ఓ వ్యక్తిని పోలీసులు కొడుతున్న దృశ్యాన్ని వీడియోలో చిత్రీకరించారు. ఢిల్లీ పోలీసులు దుర్మార్గానికి పెట్టింది పేరని, వారి దురాగతాలకు సంబంధించి కథలు వింటూనే ఉంటామని, అటువంటి వీడియో ఇది అని ఆమ్ ఆద్మీ పార్టీ తన సందేశంలో వ్యాఖ్యానించింది.
ఈ వీడియోలో పోలీసులు అమానుషంగా ప్రవర్తించిన దృశ్యమే కాకుండా డబ్బులు గుంజుతున్న దృశ్యం కూడా ఉందని ఆ పార్టీ చెప్పింది. వీడియోలో కనిపించిన ముగ్గురు పోలీసులను సస్పెండ్ చేశారు. వారిపై విచారణకు కూడా ఆదేశించారు. ఇటువంటి సంఘటనలను సహించేది లేదని ఢిల్లీ పోలీసు కమిషనర్ బిఎస్ బస్సీ అన్నారు .
మూడు కేసులకు సంబంధించి ముగ్గురు పోలీసులను సస్పెండ్ చేయాలని డిమాండ్ చేస్తూ ఢిల్లీ ముఖ్యమంత్రి అరవింద్ కేజ్రీవాల్ ధర్నాకు దిగిన విషయం తెలిసిందే. ఇద్దరు పోలీసులను సెలవుపై పంపించడంతో ఆయన ధర్నాను విరమించారు.
Click it and Unblock the Notifications
Sign in with Google