విజయ్ ప్రచారంలో దారుణం: అభిమానుల్ని బూట్లతో తన్నిన బౌన్సర్లు

తమిళనాడు రాజకీయ రణక్షేత్రంలో అడుగుపెట్టిన నటుడు విజయ్.. తన ప్రచారంతో సునామీ సృష్టిస్తున్నారు. మధురై నుండి చెన్నై వరకు ఆయన పర్యటించిన ప్రతి నియోజకవర్గం జనసంద్రంగా మారుతోంది. అయితే, ఈ క్రేజ్ ఇప్పుడు వివాదాలకు కేరాఫ్ అడ్రస్‌గా మారింది. ఇటీవల శివగంగ జిల్లా కారైకుడిలో జరిగిన ఘటనే ఇందుకు నిదర్శనం.

నేటి యువతకు ఇన్ స్టాగ్రామ్ రీల్స్ అంటే ఎంత పిచ్చో తెలిసిందే. విజయ్ ప్రచార వాహనం వెనుక వందలాది బైకులు, యువకులు ప్రమాదకరంగా వెంబడిస్తున్నారు. కదులుతున్న వాహనంపైకి ఎక్కి సెల్ఫీలు తీయడానికి, వీడియోలు చేయడానికి ప్రయత్నిస్తున్నారు. ఈ క్రమంలోనే కారైకుడిలో కొందరు అభిమానులు విజయ్ వాహనంపైకి ఎక్కడానికి ప్రయత్నించగా.. అక్కడ ఉన్న ప్రైవేట్ బౌన్సర్లు వారిని బూట్లతో తన్ని కిందకు తోసేసిన వీడియో ఇప్పుడు సోషల్ మీడియాలో వైరల్ అవుతోంది. ఇది చూసిన నెటిజన్లు "అభిమానం సరే.. కానీ ఈ అరాచకం ఏంటి?" అని ప్రశ్నిస్తున్నారు.

విజయ్ పై పోలీసు కేసులు..

కేవలం భద్రతా వివాదాలే కాదు, చట్టపరమైన చిక్కులు కూడా విజయ్‌ను చుట్టుముడుతున్నాయి.

మధురై & చెన్నై:

మధురై కాన్ఫరెన్స్ మరియు చెన్నై పెరంబూర్ ర్యాలీల్లో అనుమతించిన దానికంటే ఎక్కువ మందిని సమీకరించడం, ట్రాఫిక్‌కు తీవ్ర అంతరాయం కలిగించినందుకు విజయ్‌పై ఇప్పటికే పలు సెక్షన్ల కింద కేసులు నమోదయ్యాయి.

నామినేషన్ గందరగోళం:

విజయ్ దాఖలు చేసిన నామినేషన్ పత్రాల్లో కూడా తనపై ఉన్న కేసుల వివరాల విషయంలో చిన్న చిన్న వ్యత్యాసాలు రావడం, వాటిని సరిదిద్దుకోవడానికి ఆయన కోర్టు మెట్లు ఎక్కడం వంటివి చర్చనీయాంశంగా మారాయి.

బౌన్సర్ల అతి.. వృద్ధుడిపై దాడి?

జనసందోహాన్ని నియంత్రించే నెపంతో ప్రైవేట్ బౌన్సర్లు అతిగా ప్రవర్తిస్తున్నారనే ఆరోపణలు వస్తున్నాయి. మధురైలో ఒక అభిమానిని ర్యాంప్ పై నుంచి కిందకు తోసేయడం, చెన్నైలో ఒక వృద్ధుడిపై కూడా చేయి చేసుకున్నారనే వార్తలు పార్టీకి మైనస్ గా మారుతున్నాయి. "ప్రజాస్వామ్యంలో బౌన్సర్ల సంస్కృతి ఏంటి?" అని ప్రతిపక్షాలు విజయ్‌ను టార్గెట్ చేస్తున్నాయి.

ప్రభుత్వం వర్సెస్ టీవీకే

ఇదిలా ఉంటే, అధికార డీఎంకే ప్రభుత్వం తన ప్రచారాన్ని అడ్డుకుంటోందని విజయ్ ఆరోపిస్తున్నారు. చెన్నైలోని టీ నగర్, విల్లివాక్కం వంటి ప్రాంతాల్లో ప్రచార సమయాన్ని తగ్గించడంపై టీవీకే నేతలు మండిపడుతున్నారు. తమ నాయకుడికి వస్తున్న ఆదరణ చూసి భయపడే పోలీసులు అనుమతులు నిరాకరిస్తున్నారని వారు ఆవేదన వ్యక్తం చేస్తున్నారు. ఒకవైపు అభిమానుల ఆర్తనాదాలు, మరోవైపు పోలీసుల ఆంక్షలు, ఇంకోవైపు బౌన్సర్ల దాష్టీకాలు.. వీటన్నింటి మధ్య విజయ్ 2026 లక్ష్యంగా తన ప్రయాణాన్ని ఎలా కొనసాగిస్తారో చూడాలి.

விஜய்யின் பிரச்சார வாகனத்தை பிடித்து தொங்கிய தொண்டர்களின் கையை காலால் மிதித்த பவுன்சர்.. பகீர் காட்சி!#Karaikudi #TVK #Vijay #Campaign #Bouncer #Viralvideo #2026Election #NewsTamil24x7 pic.twitter.com/S4Nbx8P4a9

— News Tamil 24x7 (@NewsTamilTV24x7) April 10, 2026

English summary

TVK Chief Vijay's election campaign in Tamil Nadu faces security issues as bouncers assault fans in Karaikudi. Explore the latest controversies involving traffic violations and police cases against Thalapathy Vijay.