ఒబామా సరికొత్త వ్యూహం! ట్రంప్‌కు ఇదే ఆఖరి అవకాశం..
అమెరికా ప్రతినిధుల సభ, సెనేట్ ఎన్నికల ప్రచారం ఊపందుకున్న వేళ డెమొక్రాట్ల తరఫున మాజీ అధ్యక్షుడు బరాక్ ఒబామా రంగంలోకి దిగారు. అట్లాంటాలో నిర్వహించిన భారీ బహిరంగ సభలో ఆయన ప్రసంగిస్తూ ట్రంప్ యంత్రాంగం వైఖరిపై తీవ్ర స్థాయిలో విరుచుకుపడ్డారు. డోనాల్డ్ ట్రంప్ నేతృత్వంలోని ప్రభుత్వ నిర్ణయాల వల్ల సామాన్యులు తీవ్రంగా ఇబ్బంది పడుతున్నారని, ప్రస్తుతం జరుగుతున్న ఈ ఎన్నికలే వారి నిర్ణయాలకు, తొందరపాటు చర్యలకు అడ్డుకట్ట వేయడానికి వచ్చిన "చివరి అవకాశం" అని ఒబామా వ్యాఖ్యానించారు. జార్జియా గవర్నర్ అభ్యర్థి కీషా లాన్స్ బాటమ్స్, సెనేటర్ జాన్ ఒసాఫ్‌లకు మద్దతుగా ఆయన ఈ ప్రచారంలో పాల్గొన్నారు.
అసలైన నాయకత్వం అంటే ఏమిటో చూపించాలి
ప్రస్తుతం అమెరికా ప్రజలకు మాటలు కాకుండా నిజమైన పరిష్కారాలు చూపే నాయకత్వం అవసరమని ఒబామా స్పష్టం చేశారు. "ఈ ఎన్నికలు దేశంలో బాధ్యతాయుతమైన పాలనను తిరిగి తీసుకొచ్చేందుకు వచ్చిన బ్రేకర్ లాంటివి. ఈ మార్పు స్విచ్‌ను మనమే నొక్కాలి" అని ఆయన పిలుపునిచ్చారు. సామాన్యుడిపై భారం పడకుండా నిత్యావసరాల ఖర్చులు, వైద్యం, ఇళ్ల రెంట్లు, కరెంట్ బిళ్లను అదుపులోకి తీసుకొచ్చే స్పష్టమైన ప్రణాళికలున్న నాయకులను గెలిపించాలని ఆయన కోరారు. జార్జియాలో కీషా లాన్స్ బాటమ్స్‌ను గవర్నర్‌గా, జాన్ ఒసాఫ్‌ను తిరిగి సెనేట్‌కు పంపడం ద్వారా దేశాన్ని మంచి భవిష్యత్తు వైపు నడిపించవచ్చని ఆశాభావం వ్యక్తం చేశారు.
ట్రంప్ విమర్శలు - పొలిటికల్ హీట్
మరోవైపు డోనాల్డ్ ట్రంప్ సైతం ప్రచారంలో జోరు పెంచుతూ ప్రత్యర్థులపై తీవ్ర స్థాయిలో ధ్వజమెత్తారు. జార్జియాలోని పెర్రీలో జరిగిన రిపబ్లికన్ ప్రచార సభలో పాల్గొన్న ట్రంప్.. డెమొక్రాట్ సెనేటర్ జాన్ ఒసాఫ్‌ను లక్ష్యంగా చేసుకున్నారు. హైతీ ప్రజలకు తాత్కాలిక రక్షణ కల్పించే బిల్లుకు ఒసాఫ్ మద్దతు ఇవ్వడంపై ట్రంప్ మండిపడ్డారు. గతంలో తాను సంచలన వ్యాఖ్యలు చేసిన ప్రాంతాల పేర్లను ప్రస్తావిస్తూ, అలాంటి దేశాల నుంచి వలసదారుల సైన్యాన్ని తీసుకొచ్చేందుకు ఒసాఫ్ ప్రయత్నిస్తున్నారంటూ విమర్శలు గుప్పించారు.
అభ్యర్థుల హామీలు.. మారుతున్న సమీకరణాలు
అధికారంలోకి వస్తే జార్జియా గ్రామీణ ప్రాంతాల ఆరోగ్య సంరక్షణ వ్యవస్థను పూర్తిస్థాయిలో ప్రక్షాళన చేస్తామని, అత్యవసర వైద్య సేవలు, గర్భధారణ చికిత్సలను అందరికీ అందుబాటులోకి తెస్తామని కీషా లాన్స్ బాటమ్స్ హామీ ఇచ్చారు. అలాగే జాన్ ఒసాఫ్ వయోవృద్ధులకు ఇన్సులిన్ ధరలను తగ్గించడం, మెడికైడ్ సేవలను విస్తరించడం, నిరుద్యోగ యువతకు ఉద్యోగ శిక్షణ ఇవ్వడంపై దృష్టి పెడతానని తెలిపారు. ఈ ఎన్నికల్లో డెమొక్రాట్లు గెలిచి కాంగ్రెస్‌లో ఆధిక్యం సాధిస్తే, రాబోయే రోజుల్లో ట్రంప్ ప్రభుత్వం ప్రతిపాదించే వలస విధానాలు, సరిహద్దు భద్రత వంటి కీలక నిర్ణయాలకు తీవ్ర ప్రతిబంధకాలు ఎదురయ్యే అవకాశం ఉంది.
Click it and Unblock the Notifications
Sign in with Google
