ప్రత్యర్థి కుటుంబ విషాదంతో రాజకీయం.. వివేక్ రామస్వామి కొంపముంచిన ఒక్క యాడ్!
అమెరికాలో ఇటీవల ముగిసిన 2026 ఓహియో గవర్నర్ ఎన్నికల్లో రిపబ్లికన్ అభ్యర్థి వివేక్ రామస్వామికి ఊహించని బిగ్ షాక్ తగిలింది. అధ్యక్షుడు డొనాల్డ్ ట్రంప్ సంపూర్ణ మద్దతు, ఉపాధ్యక్షుడు జేడీ వ్యాన్స్ అండదండలు, దాదాపు 100 మిలియన్ల డాలర్లు (దాదాపు రూ.830 కోట్లు) భారీ ప్రచార నిధులు ఉన్నప్పటికీ.. ఆయన డెమోక్రటిక్ అభ్యర్థి అమీ యాక్టన్ చేతిలో ఘోర ఓటమిని మూటగట్టుకున్నారు. ప్రచార పర్వంలో ప్రత్యర్థి వ్యక్తిగత, బాల్య కుటుంబ విషాదాన్ని రాజకీయ లబ్ధి కోసం వాడుకోవడానికి తెగబడటమే వివేక్ రామస్వామి రాజకీయ పతనానికి ప్రధాన కారణమని విశ్లేషకులు స్పష్టం చేస్తున్నారు.
వివాదాస్పద పొలిటికల్ యాడ్.. తల్లితోనే కూతురిపై దాడి!
ఎన్నికల ప్రచారం ముగింపు దశకు చేరుకున్న కీలక సమయంలో వివేక్ రామస్వామి ప్రచార బృందం ఓ తీవ్ర వివాదాస్పద రాజకీయ ప్రకటనను విడుదల చేసింది. అందులో అమీ యాక్టన్ నుంచి దాదాపు ఐదు దశాబ్ధాలుగా దూరంగా ఉంటున్న ఆమె కన్నతల్లి డానా ఆర్థర్‌ను తెరపైకి తీసుకొచ్చారు. ఆ వీడియో ప్రకటనలో డానా ఆర్థర్ మాట్లాడుతూ.. తన కూతురు అమీ యాక్టన్ ఓ అబద్ధాలకోరు అని, ఆమె చెప్పేవన్నీ కల్పితాలని ఆరోపిస్తూ ఓహియో ఓటర్లు ఆమెను గవర్నర్‌గా ఎన్నుకోవద్దని కోరారు. అమీ యాక్టన్ విశ్వసనీయతను దెబ్బతీసి, ఓటర్లలో ఆమె వ్యక్తిత్వంపై అనుమానాలు రేకెత్తించడమే లక్ష్యంగా ఈ యాడ్‌ను రూపొందించారు.
అమీ యాక్టన్ చిన్ననాటి భయానక అనుభవం
అయితే ఈ యాడ్ వెలువడటమే ఆలస్యం.. ఓహియో సమాజంలో తీవ్ర ఆగ్రహజ్వాలలు వ్యక్తమయ్యాయి. అమీ యాక్టన్ గతంలోనే తన చిన్ననాటి భయానక అనుభవాలు, గృహరాహిత్యం, ఎదుర్కొన్న లైంగిక వేధింపుల గురించి బహిరంగంగా మాట్లాడి ఎంతోమందికి స్ఫూర్తిగా నిలిచారు. 1978లో అమీ యాక్టన్‌కు 12 ఏళ్ల వయస్సు ఉన్నప్పుడు ఆమె పెంపుడు తండ్రి ఆమెపై లైంగిక వేధింపులకు పాల్పడిన ఆరోపణలపై విచారణ ఎదుర్కొన్నారు. ఈ ఘటన అనంతరం తీవ్ర నిర్లక్ష్యం వహించినందుకు అమీ యాక్టన్ తల్లి పిల్లల సంరక్షణ హక్కులను కోల్పోయారు. ఆనాటి నుంచి నేటి వరకు అమీ యాక్టన్, ఆమె తల్లి మధ్య ఎలాంటి సంబంధాలు లేవు. వివేక్ రామస్వామి కుటుంబ విషాదాన్ని రాజకీయాస్త్రంగా మార్చుకోవడం ప్రజల్లో తీవ్ర అసహ్యాన్నీ, ఆగ్రహాన్ని రగిల్చింది.
సొంత పార్టీ నుంచే తీవ్ర నిరసనలు
వివేక్ రామస్వామి చేసిన ఈ దిగజారుడు పనిని డెమోక్రాట్లు మాత్రమే కాకుండా రిపబ్లికన్ పార్టీకి చెందిన సీనియర్ నాయకులు కూడా ఖండించారు. ఓహియో నిష్క్రమిత రిపబ్లికన్ గవర్నర్ మైక్ డివైన్ ఈ ప్రచార చిత్రాన్ని వెంటనే టీవీల నుంచి, సోషల్ మీడియా నుంచి ఉపసంహరించుకోవాలని బహిరంగంగా డిమాండ్ చేశారు. పలువురు రిపబ్లికన్ ప్రతినిధులు కూడా కుటుంబ చరిత్రను ఆయుధంగా చేసుకోవడాన్ని తప్పుబట్టారు. అయితే ఈ విషయంలో డొనాల్డ్ ట్రంప్, జేడీ వ్యాన్స్ మాత్రం రామస్వామికి అండగా నిలవడం గమనార్హం.
సవాలును తిప్పికొట్టిన అమీ యాక్టన్.. రామస్వామి శరణాగతి
ఈ వివాదాన్ని అమీ యాక్టన్ అత్యంత పరిణతితో తన ప్రచారానికి అనుకూలంగా మలుచుకున్నారు. వ్యక్తిగత విమర్శ జోలికి వెళ్లకుండా బాధితుల హక్కులు, పిల్లల సంరక్షణ, ప్రజాసేవ ప్రాధాన్యతను స్పష్టం చేశారు. ఆమె సోదరుడు ఫిల్ స్టెర్న్స్ కూడా రంగంలోకి దిగి తమ చిన్ననాటి చేదు అనుభవాలను వివరిస్తూ రామస్వామి విమర్శలను తిప్పికొట్టడంతో ప్రజల సానుభూతి పూర్తిగా అమీ యాక్టన్ వైపు మొగ్గింది. తీవ్ర ప్రజా వ్యతిరేకతను తట్టుకోలేక ఎన్నికల పోలింగ్ రోజుకు ముందే వివేక్ రామస్వామి ఆ ప్రకటనను వెనక్కి తీసుకోక తప్పలేదు.
2026 ఎన్నికలు నేర్పిన రాజకీయ పాఠాలు
2024 రిపబ్లికన్ ప్రెసిడెన్షియల్ రేసు నుంచి తప్పుకుని ట్రంప్ కు మద్దతు తెలిపిన వివేక్ రామస్వామి.. జాతీయ స్థాయిలో గుర్తింపు పొందినప్పటికీ ఓహియో పోరులో ఘోర పరాజయాన్ని మూటగట్టుకున్నారు. ఈ ఎన్నికల ద్వారా మూడు కీలక విషయాలు తేటతెల్లమయ్యాయి. ట్రంప్ మద్దతు ఉంటేనే విజయం ఖాయం కాదని స్పష్టమైంది. వందల కోట్ల డాలర్ల ప్రచార వ్యయం ఓటర్ల నమ్మకాన్ని కొనలేదని తెలిసింది. వ్యక్తిగత దిగజారుడు విమర్శలు, నెగెటివ్ రాజకీయం చివరకు తలపెట్టిన వారికే చేటు తెస్తాయని తేటతెల్లం అయింది.
Click it and Unblock the Notifications
Sign in with Google
